ആ​ഗോള ഇന്ധനവില വർധിച്ചു

തുടർച്ചയായ രണ്ടാം വർഷവും ചൈനയിലെ ഇന്ധന ഇറക്കുമതിയിൽ ഇടിവ്. കഴി‍ഞ്ഞ വർഷം പ്രതിദിനം 10.17 മില്യൺ ബാരൽ ഇറക്കുമതിയാണ് നടന്നത്. ഡിമാൻഡ് കുറയുന്നതും, എണ്ണശുദ്ധീകരണ ശാലകളുടെ ലാഭം കുറയുന്നതുമാണ് ഇതിന് പ്രധാന കാരണം. അതേസമയം 2022 ഡിസംബറിൽ ചൈനയിൽ നിന്നുള്ള ഇന്ധന കയറ്റുമതിയിൽ വർധനയുണ്ട്.

ആഗോളതലത്തിൽ ഇന്ധനവില ക്രമാനുഗതമായി വർധിക്കുന്നു. പുതുവർഷത്തിന്റെ രണ്ടാമത്തെ ആഴ്ചയിൽ മാത്രം ഏകദേശം 6% നേട്ടമാണ് ഇന്ധനവിലയിലുള്ളത്.

ആഗോള തലത്തിൽ അസംസ്കൃത എണ്ണവിലയിൽ വർധന. ക്രൂഡ് ഓയിൽ ബാരലിന് 85.28 ഡോളർ നിലവാരത്തിലാണ്. തിരുവനന്തപുരത്ത് ഒരു ലിറ്റർ പെട്രോളിന് 107.71 രൂപയും ഡീസൽ ലിറ്ററിന് 96.52 രൂപയുമാണ് വില. കൊച്ചിയിൽ പെട്രോൾ ലിറ്ററിന് 105.38 രൂപയാണ് വില. ഡീസൽ ലിറ്ററിന് 94.38 രൂപയാണ് വില. കോഴിക്കോട് ഒരു ലിറ്റർ പെട്രോളിന് ഇന്ന് 105.82 രൂപയും ഡീസലിന് 94.82 രൂപയുമാണ് വില. ന്യൂഡൽഹിയിൽ ഒരു ലിറ്റർ പെട്രോളിന് 96.72 രൂപയാണ് പുതുക്കിയ വില. ഡീസൽ ലിറ്ററിന് 89.62 രൂപയിൽ വിൽപ്പന നടത്തുന്നു. മുംബൈയിൽ ഒരു ലിറ്റർ പെട്രോളിന് 106.31 രൂപയും ഡീസൽ ലിറ്ററിന് 94.27 രൂപയുമാണ്.

Also Read : നിങ്ങളുടെ സാമ്പത്തിക ലക്ഷ്യങ്ങളിലേക്കെത്താൻ ഈ ചെറിയ കാര്യങ്ങൾ ശ്രദ്ധിക്കാം
ഏതാനും നാളുകളായി ഇന്ത്യയിൽ ഒരേ നിരക്കിലാണ് ഇന്ധനവില. വർധിക്കുന്ന പണപ്പെരുപ്പത്തെ നേരിടുന്നതിനായി 2022 മെയ് 21 ന് കേന്ദ്ര ധനമന്ത്രി നിർമലാ സീതാരാമൻ, നികുതി ഇളവുകൾ പ്രഖ്യാപിച്ചിരുന്നു. എക്സൈസ് തീരുവ കുറച്ചതോടെ പെട്രോൾ ലിറ്ററിന് 9.50 രൂപ, ഡീസൽ ലിറ്ററിന് ഏഴു രൂപ എന്ന തോതിൽ വില കുറഞ്ഞിരുന്നു. ഇതോടെ രാജ്യത്തെ ഇന്ധന വിലയുടെ കയറ്റത്തിന് ഒരു പരിധി വരെ തടയിടാനായി. ഇന്ധനവില വർധിച്ചതിനെ തുടർന്ന് കേന്ദ്രത്തിനു പിന്നാലെ കേരളത്തിലെ സർക്കാരും ഇന്ധന നികുതി കുറച്ചിരുന്നു. പെട്രോൾ ടാക്സ് 2.41 രൂപയും, ഡീസലിന് 1.36 രൂപയുമാണ് കുറച്ചത്. ഇതോടെ സംസ്ഥാനത്ത് പെട്രോൾ ലിറ്ററിന് 10.52 രൂപയും, ഡീസൽ ലിറ്ററിന് 7.40 രൂപയും വില കുറഞ്ഞിരുന്നു.

ഭാരത് പെട്രോളിയം കോർപ്പറേഷൻ ലിമിറ്റഡ് ബിപിസിഎൽ, ഇന്ത്യൻ ഓയിൽ കോർപ്പറേഷൻ ലിമിറ്റഡ് (ഐഒസിഎൽ), ഹിന്ദുസ്ഥാൻ പെട്രോളിയം കോർപ്പറേഷൻ ലിമിറ്റഡ് (എച്ച്പിസിഎൽ) എന്നിവയുൾപ്പെടെ പൊതുമേഖലാ കമ്പനികൾ, അന്താരാഷ്‌ട്ര ക്രൂഡ് ബെഞ്ച്മാർക്ക് വിലകൾക്കും, വിദേശ വിനിമയ നിരക്കുകൾക്കും ആനുപാതികമായിട്ടാണ് ഇന്ധനവില പരിഷ്കരിക്കുന്നത്.

രൂപ
ഡോളറിനെതിരെ 81.28 എന്ന നിലവാരത്തിലാണ് രൂപയുടെ വിനിമയനിരക്ക്. ‍


Read Latest Business News and Malayalam News