ഇന്ധനവിലയിൽ വൻ വര്‍ധനവ്; തലസ്ഥാനത്ത് പെട്രോളിന് 84 രൂപ കടന്നു

തിരുവനന്തപുരം: ഇന്ധനവിലയിൽ വൻ വര്‍ധനവ് രേഖപ്പെടുത്തി. തലസ്ഥാനത്ത് പെട്രോൾ വില 84 രൂപ കടന്നു. തിരുവനന്തപുരത്ത് പെട്രോൾ വില 84.05 യിലെത്തി പുരോഗമിക്കുമ്പോൾ കൊച്ചിയിൽ 82.72 രൂപയാണ് ഇന്നത്തെ പെട്രോൾ വില. കൊച്ചിയിൽ ഡീസലിന് 76.73 രൂപയിൽ വ്യാപാരം പുരോഗമിക്കുമ്പോൾ തിരുവനന്തപുരത്ത് ഡീസലിന് 77.99 രൂപയാണ്. ഇന്ന് പെട്രോൾ ലിറ്ററിന് 23 പൈസയും ഡീസലിന് 24 പൈസയുമാണ് വര്‍ധനവുണ്ടായിട്ടുള്ളത്. കഴിഞ്ഞ രണ്ടാഴ്ചയ്ക്കിടെ പെട്രോളിന് 2.55 രൂപയും ഡീസലിന് 3.30 രൂപയുമാണ് വര്‍ധിച്ചത്. ഇന്ധന വില സർവ്വകാലറെക്കോർഡിലെത്തിയാണ് വ്യാപാരം നടക്കുന്നത്. മുംബൈയിലാണ് ഏറ്റവും ഉയർന്ന നിരക്ക് 87. 89 രൂപ.

അതേസമയം കോഴിക്കോട് പെട്രോളിന് 82.97 രൂപയിലാണ് വ്യാപാരം പുരോഗമിക്കുന്നത്. ഡീസലിന് ലിറ്റര്‍ 77.00 രൂപയിലാണ് വ്യാപാരം നടക്കുന്നത്. തൃശൂര്‍ ജില്ലയിൽ പെട്രോളിന് 83 രൂപയും ഡീസലിന് ലിറ്റര്‍ 77 രൂപയും കടന്നു. ഒരു വര്‍ഷത്തിനിടെ പെട്രോളിന് കൂടിയത് 9.81 രൂപയും ഡീസലിന് കൂടിയത് 14.85 രൂപയുമാണ്.

ഇന്ധനവില ക്രമാതീതമായി വർധിക്കുന്നതിമെ തുടർന്ന് രാജ്യവ്യാപകമായി ഇന്ന് ഭാരത ബന്ദ് നടക്കുകയാണ്. കേരളത്തിൽ എൽഡിഎഫും യുഡിഎഫും ഹർത്താലിനും ആഹ്വാനം ചെയ്തിട്ടുണ്ട്. രാവിലെ ആറു മുതൽ വൈകിട്ട് ആറ് വരെയാണ് ഹർത്താൽ നടക്കുക.