ക്രൂഡ് ഓയിൽ വിലയിൽ വർധന

യുഎസിലെ നാച്ചുറൽ ഗ്യാസ് വിലയിൽ ഇടിവ്. യൂറോപ്യൻ യൂണിയനിലേക്കുള്ള തങ്ങളുടെ ഇന്ധന കയറ്റുമതിയിൽ 33% ഇടിവ് സംഭവിച്ചതായി റഷ്യ അറിയിച്ചു. ജർമ്മനിയിൽ ഊർജ്ജ പ്രതിസന്ധി ഇനിയും വർധിക്കുമെന്ന് റിപ്പോർട്ടുകൾ.

റഷ്യയിലെ ഇന്ധനം കുറഞ്ഞ വിലയ്ക്ക് ലഭിക്കുന്നത് ഇന്ത്യയിലെ പണപ്പെരുപ്പത്തിന്റെ തീവ്രത കുറയ്ക്കുന്നതായി റിപ്പോർട്ടുകൾ. ആഗോള തലത്തിൽ ലോകരാജ്യങ്ങൾ പണപ്പെരുപ്പത്തിനെതിരെ പോരാടുമ്പോഴാണ് ഇന്ത്യയ്ക്ക് റഷ്യൻ ഇന്ധന ഇറക്കുമതി ആശ്വാസമാകുന്നത്.

ക്രൂഡ് ഓയിൽ വില
ക്രൂഡ് ഓയിൽ വില ഇന്നലെ ക്ലോസ് ചെയ്ത വിലയേക്കാള്‍ വര്‍ധിച്ചു . രാജ്യാന്തര വിപണിയിൽ ക്രൂഡ് ഓയിൽ ബാരലിന് 91.08 ഡോളറിലാണ് ഇപ്പോൾ വ്യാപാരം നടക്കുന്നത്. കഴിഞ്ഞ ആഴ്ച വില 100 ഡോളർ കടന്നായിരുന്നു വ്യാപാരം നടന്നിരുന്നത്. ഡോളറുമായുള്ള വിനിമയത്തിൽ രൂപയുടെ മൂല്യത്തിൽ ഇന്നും നേരിയ വർധന. ഡോളറിനെതിരെ ഇന്ന് 79.84 എന്ന നിലവാരത്തിലാണ് രൂപയുടെ ഇപ്പോഴത്തെ മൂല്യം.

പണപ്പെരുപ്പത്തെ നേരിടുന്നതിനായി മെയ് 21 നാണ് കേന്ദ്ര ധനമന്ത്രി നിർമലാ സീതാരാമൻ ഇളവുകൾ പ്രഖ്യാപിച്ചത്. എക്സൈസ് തീരുവയിലെ ഇടപെടലോടെ പെട്രോൾ ലിറ്ററിന് എട്ട് രൂപയും, ഡീസൽ ലിറ്ററിന് ആറ് രൂപയും കുറച്ചിരുന്നു. ഇതോടെ പെട്രോൾ ലിറ്ററിന് 9.50 രൂപയും, ഡീസൽ ലിറ്ററിന് ഏഴു രൂപ എന്ന നിലവാരത്തിലെത്തി.

ഇന്ത്യ ക്രൂഡ് ഓയിലിന്റെ കയറ്റുമതിക്കു മേലുള്ള വിൻഡ്ഫാൾ‌ ടാക്സ് അടുത്തിടെ വർധിപ്പിച്ചിരുന്നു. 4.41 ശതമാനമാണ് വർധന. രാജ്യത്തെ ഓയിൽ നിർമാണ കമ്പനികൾക്കും, ഓയിൽ റിഫൈനറികൾക്കും വിൻഡ് ഫാൾ ടാക്സ് ഏർപ്പെടുത്തിയത് കഴിഞ്ഞ ജൂലൈഒന്നിനായിരുന്നു. ഇന്ധനവില ഒരു ബാരലിന് 40 ഡോളറിന് താഴേക്കു പോയാൽ ഇത് പിൻവലിക്കുമെന്നാണ് സർക്കാർ അറിയിച്ചിരിക്കുന്നത്. കേന്ദ്രത്തിനു പിന്നാലെ സംസ്ഥാന സർക്കാരും നികുതി കുറച്ചു. പെട്രോൾ നികുതി 2.41 രൂപയും, ഡീസലിന് 1.36 രൂപയുമാണ് കുറച്ചത്. ഇതോടെ ഫലത്തിൽ സംസ്ഥാനത്ത് പെട്രോൾ ലിറ്ററിന് 10.52 രൂപയും, ഡീസൽ ലിറ്ററിന് 7.40 രൂപയും കുറഞ്ഞിരുന്നു.

പ്രധാന നഗരങ്ങളിലെ ഇന്ധനവില
കഴിഞ്ഞ ഏതാനും ദിവസങ്ങളായി രാജ്യത്തെ പെട്രോൾ വിലയിൽ മാറ്റമില്ല. ന്യൂഡൽഹിയിൽ ഒരു ലിറ്റർ പെട്രോളിന് 96.72 രൂപയാണ് പുതുക്കിയ വില. ഡീസൽ ലിറ്ററിന് 89.62 രൂപയിൽ വിൽപ്പന നടത്തുന്നു. മുംബൈയിൽ ഒരു ലിറ്റർ പെട്രോളിന് 106.31 രൂപയും ഡീസൽ ലിറ്ററിന് 94.27 രൂപയുമാണ്. തിരുവനന്തപുരത്ത് ഒരു ലിറ്റർ പെട്രോളിന് 107.41 രൂപയും ഡീസൽ ലിറ്ററിന് 96.52 രൂപയുമാണ് വില. കൊച്ചിയിൽ പെട്രോൾ ലിറ്ററിന് 105.70 രൂപയാണ് വില. ഡീസൽ ലിറ്ററിന് 92.64 രൂപയാണ് വില. കോഴിക്കോട് ഒരു ലിറ്റർ പെട്രോളിന് ഇന്ന് 105.89 രൂപയും ഡീസലിന് 96.52 രൂപയുമാണ് വില.