'ഹിൻഡൻബർ​ഗാവുന്ന ട്രേഡർമാർ?'; അദാനി ഓഹരികളിൽ ഇപ്പോൾ നടക്കുന്നത് ഊഹക്കച്ചവടമോ?

ഹിൻഡൻബർഗ് റിപ്പോർട്ട് പുറത്തു വന്നതിനു ശേഷം അദാനി ഓഹരികൾ ഒരു മാസത്തോളം 30 മുതൽ 80 ശതമാനം വരെ ഇടിവ് നേരിട്ടു. പിന്നീട് ജിക്യുജി പാർട്ണേഴ്സിന്റെ നിക്ഷേപം ലഭിച്ചതോടെ ഓഹരിവിലകൾ 11 മുതൽ 86% വരെ തിരിച്ചു കയറി. എന്നാൽ കഴിഞ്ഞ ഏതാനും വ്യാപാര സെഷനുകളിലായി പല ഓഹരികളിലും ഇടിവുണ്ട്. അദാനി ഓഹരികൾ വാങ്ങുന്നവർ കൃത്യമായ ഉറപ്പോടെയാണോ, ഊഹക്കച്ചവടത്തിനാണോ ഓഹരികൾ വാങ്ങുന്നതെന്ന് പരിശോധിക്കാം.

ദിവസ വ്യാപാരത്തിൽ, ആകെ ഓഹരികളുടെ ഒരു ശതമാനമാണ് ഡെലിവറി ക്വാണ്ടിറ്റി എന്നത് കൊണ്ട് ഉദ്ദേശിക്കുന്നത്. ഇത് ഉയർന്നു നിൽക്കുന്നത് ഇൻട്രാഡേ ട്രേഡിങ് വോളിയത്തിലെ വർധനയും, ഹ്രസ്വകാലത്തേക്ക് ഓഹരിയിലുള്ള വാങ്ങൽ താല്പര്യവും പ്രകടമാക്കുന്നു.


2023 ജനുവരി 2, മുതൽ ഹിൻഡൻബർഗ് റിപ്പോർട്ട് പുറത്തു വരുന്നതിനു തലേ ദിവസമായ ജനുവരി 23 വരെ അദാനി ഗ്രൂപ്പിന്റെ ഫ്ലാഗ്ഷിപ്പ് കമ്പനിയായ അദാനി എന്റർപ്രൈസസിന്റെ പ്രതിദിന ശരാശരി ട്രേഡിങ് വോളിയം 17.5 ലക്ഷം ഓഹരികളായിരുന്നു. എന്നാൽ ജനുവരി 24 നു ശേഷം ഇത് പത്ത് മടങ്ങിലധികം വർധിച്ച് 1.77 കോടിയായി. അദാനി പോർട്സ് & സ്പെഷ്യൽ ഇക്കണോമിക് സോൺ ഓഹരികളുടെ ട്രേഡഡ് വോളിയം, ജനുവരി 24 നു ശേഷം 3 കോടി ഓഹരികളായി എട്ടു മടങ്ങ് വർധിച്ചു. മറ്റ് അദാനി ഓഹരികളിലും ട്രേഡഡ് ക്വാണ്ടിറ്റിയിൽ വലിയ വർധനവുണ്ട്.

Also Read : രണ്ട് അദാനി ഓഹരികൾ കൂടി സ്റ്റോക്ക് എക്സ്ചേഞ്ചുകളുടെ നിരീക്ഷണത്തിലേക്ക്
അദാനി എന്റർപ്രൈസിൽ പ്രതിദിനാടിസ്ഥാനത്തിലുള്ള ശരാശരി ഡെലിവറബിൾ ക്വാണ്ടിറ്റി ജനുവരി 24 ന് ശേഷം പലമടങ്ങ് വർധിച്ചു. എന്നാൽ ആകെ ട്രേഡ് ചെയ്ത ഓഹരികളുമായി താരതമ്യപ്പെടുത്തുമ്പോൾ ശരാശരി ഡെലിവറബിൾ ക്വാണ്ടിറ്റി 20 ശതമാനത്തിൽ നിന്ന് 17 ശതമാനമായി ഇടിഞ്ഞു. സർക്യൂട്ട് അടിസ്ഥാനത്തിൽ ട്രേഡിങ് നിയന്ത്രണമുള്ള നോൺ എഫ്&ഒ ഓഹരികളിൽ ഈ ഡെലിവറി ക്വാണ്ടിറ്റി ശതമാനം ഉയർന്നതായും കാണാം. ഇതെല്ലാം കൂടുതൽ ഊഹക്കച്ചവടം നടക്കുന്നു എന്നതിന്റെ സൂചനയാണ്.

തുടർച്ചയായ ദിവസങ്ങളിൽ ലോവർ സർക്യൂട്ടിലെത്തിയ ഓഹരികളിൽ ബയേഴ്സിന് വിറ്റൊഴിയാൻ നിർവാഹമില്ലായിരുന്നു. ഇത് ട്രേഡ് ചെയ്ത് ലാഭമുണ്ടാക്കാൻ കയറിയവർക്ക് ഓഹരി വാങ്ങേണ്ട നിലയിലേക്ക് കാര്യങ്ങളെത്തിച്ചു. അതിനാൽത്തന്നെ ട്രേഡേഴ്സ് ഇൻവെസ്റ്റേഴ്സായി മാറിയതായുള്ള കണക്കുകളും ഇതിനോട് ചേർത്തു വായിക്കേണ്ടതാണ്.

Read Latest Business News and Malayalam News