അറ്റാദായത്തിലെ ഇടിവ്; സിഎസ്ബി ബാങ്ക് ഓഹരികൾ ഇടിഞ്ഞു

കഴിഞ്ഞ സാമ്പത്തിക വർഷത്തിൻെറ നാലാം ത്രൈമാസത്തിൽ അറ്റാദായം ഇടിഞ്ഞത് മൂലം സിഎസ്ബി ബാങ്ക് ഓഹരികൾ ഇടിഞ്ഞു . മുൻ പാദത്തെ അപേക്ഷിച്ച് അറ്റാദായത്തിൽ മൂന്ന് ശതമാനമാണ് ഇടിവ്.
കഴിഞ്ഞ വർഷം ഇതേ പാദത്തിലെ 156.34 കോടി രൂപയുമായി താരതമ്യം ചെയ്യുമ്പോൾ മാർച്ച് പാദത്തിൽ 151.46 കോടി രൂപയാണ് അറ്റാദായം. ബാങ്കിൻെറ ഓഹരികൾ 4.11 ശതമാനം ഇടിഞ്ഞു. ഇന്നലെ ഓഹരി വില 388.25 രൂപയിലാണ്. പാദഫല റിപ്പോർട്ട് പുറത്ത് വന്നതിന് ശേഷം ഓഹരി വില ബിഎസ്ഇയിൽ 8.3 ശതമാനം ഇടിഞ്ഞ് 371.05 രൂപ വരെയെത്തിയിരുന്നു.

ബാങ്കിൻെറ മറ്റ് വരുമാനങ്ങൾ 52 ശതമാനം ഉയർന്ന് 179.38 കോടി രൂപയായെങ്കിലും ലാഭം കുറഞ്ഞു. ‌മൊത്തം പലിശ വരുമാനം 11 ശതമാനം ഉയർന്ന് 348.45 കോടി രൂപയിൽ നിന്ന് 386.03 കോടി രൂപയായി. പലിശേതര വരുമാനം 125.99 കോടിയിൽ നിന്ന് 56 ശതമാനം ഉയർന്ന് 196.51 കോടി രൂപയായി. മൊത്ത നിഷ്‌ക്രിയ ആസ്തി 1.47 ശതമാനമായി കൂടിയിട്ടുണ്ട്.