'ഐടിസി ഓഹരിവില 520 രൂപ വരെ ഉയരാം'; വാങ്ങൽ നിർദേശം നൽകി പ്രമുഖ ബ്രോക്കിങ് സ്ഥാപനങ്ങൾ

മികച്ച നാലാം പാദഫലങ്ങളാണ് ഇത്തവണ ഐടിസി പ്രഖ്യാപിച്ചത്. ഇതേ തുടർന്ന് മെയ് 9 ന് ഓഹരി വില 52 ആഴ്ച്ചയിലെ പുതിയ നിലവാരമായ 433.45 രൂപയിലെത്തി. 2022 ജൂൺ 17 ലെ, ബിഎസ്ഇയിൽ 52 ആഴ്ച്ചയിലെ താഴ്ന്ന നിലവാരമായ 258.05 രൂപയിൽ നിന്ന് 67.97% ഉയർച്ചയാണിത്. മുൻനിര ബ്രോക്കിങ് സ്ഥാപനങ്ങൾ, 500 രൂപയിലധികം ലക്ഷ്യവില നിശ്ചയിച്ച് ഈ ഓഹരിയിൽ വാങ്ങൽ നിർദേശം നൽകിയിരിക്കുന്നു.

ഐടിസി
വിവിധ ബിസിനസ് സെഗ്മെന്റുകളിലൂടെയാണ് കമ്പനി പ്രവർത്തിക്കുന്നത്. ഐടിസി എഫ്എംസിജി, ഹോട്ടൽസ്, പേപ്പർ ബോർഡ്സ്, പേപ്പർ & പാക്കേജിങ്, അഗ്രിബിസിനസ് എന്നിവയാണവ. സിഗരറ്റ്, ബ്രാൻഡഡ് പാക്കേജ്ഡ് ഫുഡ്, സ്റ്റേഷനറി, സ്പെഷ്യാലിറ്റി പേപ്പർ & പാക്കേജിങ്, പേഴ്സണൽ കെയർ പ്രൊഡക്ട്സ്, അപ്പാരൽ, സേഫ്റ്റി മാച്ചസ് & അഗർബത്തീസ് തുടങ്ങിയവ കമ്പനിയുടെ ഉല്പന്നങ്ങളിൽ ഉൾപ്പെടുന്നു. കൂടാതെ, കമ്മോഡിറ്റി വിഭാഗത്തിൽ സോയ, സുഗന്ധ വ്യഞ്ജനങ്ങൾ, കോഫി, ലീഫ് ടൊബാക്കോ തുടങ്ങിയവയിലും ബിസിനസ് നടത്തുന്നു. ഇൻഫർമേഷൻ ടെക്നോളജി സർവീസസും കമ്പനിയുടെ ബിസിനസിൽ ഉൾപ്പെടുന്നു.


നാലാം പാദഫലങ്ങൾ
സീക്വൻഷ്യൽ അടിസ്ഥാനത്തിൽ, കമ്പനിയുടെ വരുമാനം 17,569.76 കോടി രൂപയിൽ നിന്ന് 7% വർധിച്ച് 18,799.18 കോടി രൂപയായി മാറി. ഇതേ കാലയളവിൽ അറ്റാദായം 4259.68 കോടിയിൽ നിന്ന് 22.06% ഉയർന്ന് 5225.02 കോടി രൂപയായി.

അതേ സമയം YoY അടിസ്ഥാനത്തിൽ കമ്പനിയുടെ വരുമാനത്തിൽ ചെറിയ ഇടിവുണ്ട്. 2022 മാർച്ച് പാദത്തിൽ 18,901.76 കോടി രൂപയായിരുന്ന വരുമാനം 0.54% ഇടിഞ്ഞ് 2023 മാർച്ച് പാദത്തിൽ 18,799.18 കോടി രൂപയായി മാറി. അതേ സമയം ഇതേ കാലയളവിലെ അറ്റാദായം 5,70.09 കോടിയിൽ നിന്ന് 5,225.02 കോടി രൂപയായി 3.06% വർധിച്ചിട്ടുണ്ട്.

Also Read : 2000 രൂപ നോട്ട് പിൻവലിക്കൽ; പൊതുമേഖലാ ബാങ്ക് ഓഹരികൾ കുതിക്കാൻ സാധ്യതയെന്ന് പ്രവചനം
2022-23 സാമ്പത്തിക വർഷം മുഴുവനായി പരിഗണിക്കുമ്പോൾ, തൊട്ടു മുമ്പത്തെ സാമ്പത്തിക വർഷത്തേതിനേക്കാൾ കമ്പനിയുടെ വരുമാനത്തിൽ,17.35% അറ്റാദായത്തിൽ 25.46% എന്നിങ്ങനെ വർധനയുണ്ട്. കമ്പനി ഓഹരിയൊന്നിന് 2.75 രൂപ എന്ന നിരക്കിൽ അന്തിമ ലാഭവിഹിതം നൽകുന്നത് പരിഗണിക്കുന്നുണ്ട്

ലക്ഷ്യവില
ആഗോള ബ്രോക്കിങ് സ്ഥാപനമായ ജെഫറീസ് ഐടിസി ഓഹരികൾ 520 രൂപ ലക്ഷ്യവില നിശ്ചയിച്ച് വാങ്ങാമെന്ന് നിർദേശിക്കുന്നു. നിലവിലെ ഓഹരിവില 419.85 രൂപയാണ്. ഇതിൽ നിന്നും ഏകദേശം 23.50% ഉയർച്ചയാണ് ഇത്തരത്തിൽ പ്രവചിക്കുന്നത്.

Also Read : ഈ 3 ടാറ്റ ഓഹരികൾ നോക്കി വെക്കാം; 52 ആഴ്ച്ചയിലെ ഉയർച്ചയിൽ നിന്ന് 33% വരെ താഴ്ച്ച
നുവാമ ഇന്റർനാഷണൽ ഇക്വിറ്റീസ്, ഐടിസി ഓഹരികളിൽ 18.50% ൽ അധികം ഉയർച്ചയാണ് പ്രതീക്ഷിക്കുന്നത്. ഇത്തരത്തിൽ ലക്ഷ്യവിലയായി 500 രൂപയാണ് നിർദേശിക്കുന്നത്.

മോട്ടിലാൽ ഓസ്വാൾ ലക്ഷ്യവിലയായി 485 രൂപയാണ് നിശ്ചയിച്ചിരിക്കുന്നത്. ഇപ്പോഴത്തെ ഓഹരിവിലയിൽ നിന്ന് 15% ൽ‌ അധികം ഉയർച്ചയാണിത്.

Disclaimer : ഇവിടെ നൽകിയിരിക്കുന്നത് ഏതെങ്കിലും തരത്തിലുള്ള നിക്ഷേപ/വ്യാപാര നിർദേശങ്ങളല്ല

Read Latest Business News and Malayalam News