വർധിക്കുന്ന വിപണി പങ്കാളിത്തം
കോവിഡ് കാലം ഓഹരി വിപണികളിൽ വലിയ തോതിലുള്ള നിക്ഷേപ പങ്കാളിത്തത്തിന് കാരണമായി. നേരിട്ടുള്ള ഓഹരി നിക്ഷേപത്തിൽ കുത്തനെയുള്ള വർധനയാണ് ഉണ്ടായിരിക്കുന്നത്. ഇന്ത്യയിൽ റെക്കോർഡ് സൃഷ്ടിച്ചു കൊണ്ടാണ് ഡീമാറ്റ് അക്കൗണ്ടുകൾ ഓപ്പൺ ചെയ്തിരിക്കുന്നത്. ഓഹരി വിപണിയുമായി ബന്ധപ്പെട്ട മ്യൂച്വൽ ഫണ്ട് പോലെയുള്ള ഉല്പന്നങ്ങളിലും ലൈഫ് ടൈം ഹൈ ഇൻവെസ്റ്റ്മെന്റുകളാണ് നടന്നുകൊണ്ടിരിക്കുന്നത്. ബോധവൽക്കരണത്തിലൂടെയും, അനുഭവ സമ്പത്ത് ഉപയോഗപ്പെടുത്താൻ ശ്രമിച്ചു കൊണ്ടും ഓഹരി വിപണിയെ മുഖ്യധാരയിലുള്ള ഒരു നിക്ഷേപ മാർഗമാക്കാനാണ് ഇന്ത്യ ശ്രമിക്കുന്നത്.
നിങ്ങളുടെ അറിവ്
വിജയകരമായ ഏതൊരു നിക്ഷേപത്തിന്റെയും പിന്നിലുള്ള ഏറ്റവും അതിപ്രധാനമായ ഒരു ഘടകമാണ് അറിവ്. നിക്ഷേപ ഉല്പന്നം എന്തു തന്നെയായാലും ഉയർന്ന നിലവാരത്തിലുള്ള അറിവിനെ വിജയകരമായ നിക്ഷേപ തന്ത്രങ്ങളാക്കി മാറ്റുക എന്നതാണ് പ്രധാനം. ഓഹരികളിൽ നിക്ഷേപിക്കുന്നവർക്ക് സ്ഥൂല സാമ്പത്തിക ശാസ്ത്രം, വ്യവസായ മേഖലകൾ, ബിസിനസിന്റെ അടിസ്ഥാനം, ഫിനാൻഷ്യൽ സ്റ്റേറ്റ്മെന്റുകൾ, വിപണിയുടെ വിശാലമായ ഘടകങ്ങൾ എന്നിവയിലൊക്കെ മികച്ച രീതിയിലുള്ള അറിവ് ഉണ്ടായിരിക്കേണ്ടതാണ്.
ഇത്തരം കാര്യങ്ങളെപ്പറ്റി വേണ്ടത്ര അറിവില്ലെങ്കിൽ തീർച്ചയായും മ്യൂച്വൽ ഫണ്ടിൽ നിക്ഷേപിക്കുന്നതാണ് നിങ്ങൾക്ക് നല്ലത്. ഇവിടെ ഫണ്ട് മാനേജർമാരും അവരുടെ ടീമും ഓഹരിവിപണിയിൽ പ്രഫഷണൽ അറിവ് നേടിയവരായിരിക്കും. അവരുടെ വൈദഗ്ധ്യം നിങ്ങൾക്ക് ഉപയോഗപ്പെടുത്താം.
ടൂളുകൾ
ലഭ്യമായ വിവരങ്ങളും, ഷെയർ മാർക്കറ്റ് നിക്ഷേപത്തിന് ആവശ്യമായ ടൂളുകളും ഒരുമിക്കേണ്ടത് ആവശ്യമാണ്. ഇക്കാലത്ത് ഇവയെല്ലാം സൗജന്യമായി ഓൺലൈനായിത്തന്നെ ലഭിക്കും. അടിസ്ഥാനപരമായ അറിവ് നേടിക്കഴിഞ്ഞാൽ സാങ്കേതിക കാര്യങ്ങളിൽ പരിശീലനം നേടുകയുമാവാം. ഇത്തരത്തിൽ ടൂളുകൾ ഉപയോഗിക്കാൻ അറിവുള്ള ഒരു വ്യക്തിക്ക് ഓഹരി വിപണിയിൽ നേരിട്ട് പണം നിക്ഷേപിക്കാം. ഇവിടെയും നിങ്ങളുടെ അറിവും, അനുഭവസമ്പത്തും കുറവാണെങ്കിൽ മ്യൂച്വൽ ഫണ്ടുകളെ ആശ്രയിക്കുന്നതാണ് നല്ലത്.
സമയമെന്ന ഘടകം
പ്രഫഷണലായ നിക്ഷേപം, യഥാർത്ഥത്തിൽ കൂടുതൽ സമയം ആവശ്യപ്പടുന്നു. ദിവസവും ഓഹരിയിൽ ട്രേഡ് ചെയ്യാത്ത ഒരു ദീർഘകാല നിക്ഷേപകനു പോലും ഗവേഷണം, വിശകലനം, പോർട്ഫോളിയോ മാനേജ്മെന്റ് എന്നിവയ്ക്കായി നല്ല തോതിൽ സമയം ചിലവാകുന്നുണ്ട്. ആവശ്യത്തിന് സമയം നൽകി ക്ഷമയോടെ ഓഹരിയെ സമീപിക്കേണ്ടത് ആവശ്യമാണ്. ഇതിന് നിങ്ങൾക്ക് സാധിക്കുന്നില്ലെങ്കിൽ മ്യൂച്വൽ ഫണ്ടുകളെ ആശ്രയിക്കാവുന്നതാണ്.
വിജയകരമായ നിക്ഷേപത്തിൽ അച്ചടക്കത്തിന് വലിയ പ്രാധാന്യമുണ്ട്. ഒരു നിക്ഷേപകൻ കൃത്യമായ നിയമങ്ങൾ സെറ്റ് ചെയ്യേണ്ടതാണ്. ഇതനുസരിച്ച് കാര്യങ്ങൾ നടപ്പാക്കുകയും ഇവ റിവ്യൂ ചെയ്യുകയും വേണം. ഈ ക്രമം ആവർത്തിച്ചു കൊണ്ടിരിക്കുകയും ചെയ്യും. ഇവിടെ കാര്യങ്ങൾ ശരിയായി ചെയ്യുന്നതിനായി അച്ചടക്കം ആവശ്യമാണ്. നിക്ഷേപത്തിൽ അച്ചടക്കത്തോടെ നിലനിൽക്കാൻ നിങ്ങൾ തയ്യാറാണോ എന്നത് പ്രധാനമാകുന്നു. ഇടയ്ക്കിടെ മുൻവിധികളാൽ മാർക്കറ്റിനെ സമീപിക്കുന്നത് ഒഴിവാക്കേണ്ടതാണ്. ഇതിനൊന്നും നിങ്ങൾക്ക് സാധിക്കുന്നില്ലെങ്കിൽ മ്യൂച്വൽ ഫണ്ടുകൾ തന്നെയായിരിക്കും നിങ്ങൾക്ക് യോജിച്ച നിക്ഷേപ മാർഗം എന്നറിയുക.
എന്നാൽ നേരിട്ട് ഓഹരികളിൽ നിക്ഷേപിക്കുകയും, ഒരു നിശ്ചിത ശതമാനം മ്യൂച്വൽ ഫണ്ട് നിക്ഷേപത്തിന് മാറ്റി വെക്കുകയും ചെയ്യുന്നവരുണ്ട്. നിങ്ങളുടെ സാമ്പത്തിക ലക്ഷ്യങ്ങൾ നേടാൻ ഇത്തരത്തിലും പ്ലാൻ ചെയ്യാവുന്നതാണ്.