ആപ്പ്ജില്ല

ഓഹരിവിപണികളിൽ ശുഭപ്രതീക്ഷ; സെൻസെക്സും, നിഫ്റ്റിയും ഇന്ന് ലാഭം നേടി

ഇന്നലെ ഇന്ത്യൻ ഓഹരി സൂചികകൾ ലാഭത്തിലാണ് വ്യാപാരം ക്ലോസ് ചെയ്തത്. കമ്പനികളുടെ ശക്തമായ നാലാം പാദഫലങ്ങൾ വിപണിക്ക് തുണയായി. ഇന്നലെ, തുടർച്ചയായ ആറ് വ്യാപാര സെഷനുകളിലെ നേട്ടത്തിനു ശേഷം സൂചികകളിൽ ഇടിവ് നേരിട്ടിരുന്നു.

Authored byശിവദേവ് സി.വി | Samayam Malayalam 4 May 2023, 3:46 pm
ഇന്ന് ഇന്ത്യൻ ഓഹരിവിപണികൾ മികച്ച ലാഭം നേടി. നിഫ്റ്റി 50 സൂചിക, 165.95 പോയിന്റുകൾ (0.92%) വർധിച്ച് 18,225.80 പോയിന്റുകളിലെത്തി. ബിഎസ്ഇ സെൻസെക്സ് സൂചിക 536.33 പോയിന്റുകൾ (0.88%) കയറി 61,729.63 നിലവാരത്തിൽ വ്യപാരം ക്ലോസ് ചെയ്തു. നിഫ്റ്റിയിലെ സെക്ടറുകളിൽ എഫ്എംസിജി മാത്രമാണ് ഇന്ന് നഷ്ടം നേരിട്ടത്.
Samayam Malayalam Stock Market News May 4
പ്രതീകാത്മക ചിത്രം


ഇന്നലെ ഇന്ത്യൻ ഓഹരിവിപണികൾ നഷ്ടം നേരിട്ടു. നിഫ്റ്റി 50 സൂചിക, 57.80 പോയിന്റുകൾ (0.32%) ഇടിഞ്ഞ് 18,089.85 പോയിന്റുകളിലെത്തി. ബിഎസ്ഇ സെൻസെക്സ് സൂചിക 119.91 പോയിന്റുകൾ (0.20%) താഴ്ന്ന് 61,356.13 നിലവാരത്തിൽ വ്യപാരം ക്ലോസ് ചെയ്തു. നിഫ്റ്റിയിലെ സെക്ടറുകളിൽ എഫ്എംസിജി, മീഡിയ, റിയൽറ്റി സെക്ടറുകൾ മാത്രമാണ് ഇന്നലെ ലാഭം നേടിയത്. യുഎസ് ഫെഡ് നയ തീരുമാനത്തിലെ ആശങ്കയിൽ ഐടി സെക്ടറിൽ വലിയ ഇടിവ് നേരിട്ടത് വിപണിയെ ബാധിച്ചു. ഇന്നലെ യുഎസ് ഫെഡ്, പലിശ നിരക്കുകളിൽ 25 ബേസിസ് പോയിന്റിന്റെ വർധന വരുത്തി.


നിലവിൽ വിപണിയിൽ അപട്രെൻഡാണ് ഉള്ളതെന്ന് ഷേർഖാൻ ബിഎൻപി പാരിബാസ് ടെക്നിക്കൽ റിസർച്ച് അനലിസ്റ്റായ ജതിൻ ഗഡിയ പറഞ്ഞു. നിലവിൽ കൺസോളിഡേഷൻ പാറ്റേണാണ് രൂപപ്പെട്ടിരിക്കുന്നത്. ഇത് പുതിയ ലോങ് ടേം പൊസിഷനുകൾക്ക് പറ്റിയ സാഹചര്യമാണ്. നിഫ്റ്റി സൂചികയിൽ, 18,000-17,960 നിലവാരത്തിലാണ് സപ്പോർട്ട് സോൺ രൂപപ്പെട്ടിരിക്കുന്നത്. ഇന്നലെ രൂപപ്പെട്ട 18,115-18,130 സോൺ തൊട്ടടുത്ത പ്രതിരോധ മേഖലയായി മാറാൻ സാധ്യതയുണ്ടെന്നും അദ്ദേഹം പറഞ്ഞു.

ഇന്നലെ, നിഫ്റ്റിയുടെ പ്രതിദിന ചാർട്ടിൽ, ചെറിയ ലോവർ ഷാഡോയോടു കൂടിയ ഒരു ചെറിയ നെഗറ്റീവ് കാൻഡിലാണ് രൂപപ്പെട്ടിരിക്കുന്നത്. സാങ്കേതികമായി, ഹ്രസ്വകാലത്തേക്കുള്ള റിവേഴ്സൽ സൂചനയാണിതെന്ന് വിദഗ്ധർ വിലയിരുത്തുന്നു. ഇതിനു തൊട്ടു മുമ്പത്തെ 6 സെഷനുകളിലും വിപണി ലാഭം നേടിയിരുന്നു. ഉയരങ്ങളിൽ ചെറിയ താഴ്ച്ച സംഭവിക്കുന്നത് വലിയ സെല്ലിങ് നടക്കുന്നില്ല എന്നതിന്റെ സൂചനയായും വിലയിരുത്തപ്പെടുന്നു.

Also Read : ഇന്ത്യക്കാരിൽ ഭൂരിപക്ഷവും ഓഹരിവിപണിയിൽ നിന്ന് അകന്നു നിൽക്കുന്നതെന്തു കൊണ്ട്? 8 കാരണങ്ങൾ അറിയാം
നിലവിൽ നിഫ്റ്റിയിലെ ഇടിവ്/കൺസോളിഡേഷൻ താഴ്ന്ന നിലവാരങ്ങളിൽ മറ്റൊരു ഹയർ ബോട്ടം രൂപീകരിക്കുമെന്ന് എച്ച്ഡിഎഫ്സി സെക്യൂരിറ്റീസ് ടെക്നിക്കൽ റിസർച്ച് അനലിസ്റ്റ് നാഗരാജ് ഷെട്ടി അഭിപ്രായപ്പെട്ടു. റേഞ്ച് മൂവ്മെന്റോടു കൂടിയ നിലവിലെ ദൗർബല്യം, താഴ്ന്ന നിലവാരങ്ങളിൽ വാങ്ങാനുള്ള അവസരമാണെന്നും അദ്ദേഹം പറഞ്ഞു.

ഡെറിവേറ്റീവ് കോൺട്രാക്ടുകളിൽ ഇന്ന് പ്രതിവാര എക്സ്പയറി ദിനമാണ്. ഇന്ത്യാ വിക്സ് 0.48% ഇടിഞ്ഞ്, 11.84 നിലവാരത്തിൽ നിൽക്കുന്നു. നിലവിൽ ഈ ലേഖനം തയ്യാറാക്കുമ്പോൾ എസ്ജിഎക്സ് നിഫ്റ്റി 59.50 പോയിന്റുകൾ (0.33%) ഇടിഞ്ഞു. ഇത് ഇന്ത്യൻ ഓഹരിവിപണിയിൽ നെഗറ്റീവ്/ഫ്ലാറ്റ് ഓപ്പണിങ് സൂചന നൽകുന്നു.

Disclaimer : ഇവിടെ നൽകിയിരിക്കുന്നത് ഏതെങ്കിലും തരത്തിലുള്ള നിക്ഷേപ/വ്യാപാര നിർദേശങ്ങളല്ല

Read Latest Business News and Malayalam News
ഓതറിനെ കുറിച്ച്
ശിവദേവ് സി.വി
ശിവദേവ് സി.വി- സമയം മലയാളത്തിൽ ബിസിനസ് സെക്ഷനിൽ ഡിജിറ്റൽ കണ്ടൻ്റ് പ്രൊഡ്യൂസർ. മാത‍ൃഭൂമി ദിനപ്പത്രത്തിൽ ഒരു വർഷത്തോളം റിപ്പോർട്ടർ/സബ് എഡിറ്ററായി ജോലി ചെയ്തു. ജേണലിസം മേഖലയിൽ 9 വർഷത്തെ അധ്യാപന പരിചയം. സാമ്പത്തിക ശാസ്ത്രത്തിൽ ബിരുദവും, കമ്മ്യൂണിക്കേഷൻ ആൻഡ് ജേണലിസത്തിൽ ബിരുദാനന്തര ബിരുദവും കാലിക്കറ്റ് സർവ്വകലാശാലയ്ക്ക് കീഴിൽ നേടി. 2022 ജൂൺ 6 മുതൽ സമയം മലയാളത്തിനൊപ്പം.... കൂടുതൽ

ആര്‍ട്ടിക്കിള്‍ ഷോ

ട്രെൻഡിങ്