നിഫ്റ്റിയും, സെൻസെക്സും ഫ്ലാറ്റായി വ്യാപാരം അവസാനിപ്പിച്ചു; ഓഹരി വിപണി വിവരങ്ങൾ

ഇന്ന് ഇന്ത്യൻ ഓഹരിവിപണികൾ ഏകദേശം ഫ്ലാറ്റായാണ് വ്യാപാരം അവസാനിപ്പിച്ചത്. നിഫ്റ്റി 50 സൂചിക 18.10 പോയിന്റുകൾ (0.10%) ഇടിഞ്ഞ് 18,297 നിലവാരത്തിലെത്തി. ബിഎസ്ഇ സെൻസെക്സ് സൂചിക 27.12 പോയിന്റുകൾ (0.04%) ഉയർന്ന് 61,967.32 പോയിന്റുകളിൽ വ്യാപാരം ക്ലോസ് ചെയ്തു. നിഫ്റ്റിയിലെ സെക്ടറുകളിൽ മെറ്റൽ, ഫാർമ എന്നിവ നഷ്ടം നേരിട്ടു.

ഇന്നലെ ഇന്ത്യൻ ഓഹരിവിപണികൾ ലാഭത്തിലാണ് വ്യാപാരം അവസാനിപ്പിച്ചത്. നിഫ്റ്റി 50 സൂചിക 49.15 പോയിന്റുകൾ (0.27%) കയറി 18,315.10 നിലവാരത്തിലെത്തി. ബിഎസ്ഇ സെൻസെക്സ് സൂചിക 173.26 പോയിന്റുകൾ (0.28%) ഉയർന്ന് 61,934.59 പോയിന്റുകളിൽ വ്യാപാരം ക്ലോസ് ചെയ്തു. നിഫ്റ്റിയിലെ സെക്ടറുകളിൽ ഐടി, മെറ്റൽ, പി എസ് യു ബാങ്ക് എന്നിവ നഷ്ടം നേരിട്ടു. കമ്പനികളുടെ ശക്തമായ നാലാം പാദഫലങ്ങളും, പുറത്തു വിടാനിരിക്കുന്ന യുഎസ് പണപ്പെരുപ്പ സൂചനകളും വിപണിക്ക് പ്രതീക്ഷ നൽകി.


വലിയ ലെഗുള്ള, ഒരു ഡോജി കാൻഡിലാണ് നിഫ്റ്റിയുടെ പ്രതിദിന ചാർട്ടിൽ രൂപപ്പെട്ടിരിക്കുന്നതെന്ന് എച്ച്ഡിഎഫ്സി സെക്യൂരിറ്റീസ്, റീടെയിൽ റിസർച്ച് വിഭാഗം മേധാവി ദീപക് ജസാനി പറഞ്ഞു. എന്നാൽ തൊട്ടു മുമ്പത്തെ വ്യാപാര സെഷന്റെ ഉയർന്ന നിലവാരത്തെ ഈ കാൻഡിൽ മറികടന്നിട്ടില്ല. നിഫ്റ്റി അപ് ട്രെൻഡിലാണ് തുടരുന്നത്. എന്നാൽ സൂചികയുടെ മൊമന്റം നാടകീയമായി കുറഞ്ഞു. ഇന്നലെ വൈകുന്നേരം പുറത്തു വന്ന കർണാടക തെരഞ്ഞെടുപ്പിന്റെ എക്സിറ്റ് പോൾ ഫലങ്ങൾ ഇന്നത്തെ മാർക്കറ്റ് ഓപ്പണിങ്ങിനെ സ്വാധീനിച്ചേക്കാം. 18,180-18,344 സോൺ മറികടക്കുന്നത് അനുസരിച്ചായിരിക്കും സമീപ കാലത്ത് വിപണിയുടെ ഗതി നിർണയിക്കപ്പെടുകയെന്നും അദ്ദേഹം പറഞ്ഞു.

നിഫ്റ്റിയിൽ 18,250-18,300 നിലവാരങ്ങളിൽ പ്രതിരോധമുള്ളതായി എച്ച്ഡിഎഫ്സി സെക്യൂരിറ്റീസ് ടെക്നിക്കൽ അനലിസ്റ്റ് നാഗരാജ ഷെട്ടി പറഞ്ഞു. ഉയർന്ന നിലവാരങ്ങളിൽ റിവേഴ്സലിനുള്ള സൂചനകളൊന്നും പ്രകടമായിട്ടില്ല. 18,300-18,400 നിലവാരങ്ങൾ മറികടന്നാൽ 18,600-18,700 ലെവലുകൾ വരെ മൂവ്മെന്റിന് സാധ്യതയുണ്ടെന്നും അദ്ദേഹം വിലയിരുത്തുന്നു.

Also Read : ലാഭത്തിൽ 1300% വർധന; ടാറ്റ ​ഗ്രൂപ്പ് ഓഹരിയിൽ വാങ്ങൽ നിർദേശം
ഏഷ്യൻ പെയിന്റ്സ്, ദീപക് നൈട്രേറ്റ്, ഐഷർ മോട്ടോഴ്സ്, സൗത്ത് ഇന്ത്യൻ ബാങ്ക്, ബൽറാംപുർ ചിനി, സൈമൻസ്, ആദിത്യ ബിർള ക്യാപിറ്റൽ, ഡോക്ടർ ലാൽ പാത്ത് ലാബ്സ്, ഗുജറാത്ത് സ്റ്റേറ്റ് പെട്രോനെറ്റ്സ് തുടങ്ങി നിരവധി കമ്പനികളുടെ നാലാം പാദഫലങ്ങൾ ഇന്ന് പ്രഖ്യാപിക്കും.

Disclaimer : ഇവിടെ നൽകിയിരിക്കുന്നത് ഏതെങ്കിലും തരത്തിലുള്ള നിക്ഷേപ/വ്യാപാര നിർദേശങ്ങളല്ല

Read Latest Business News and Malayalam News