അദാനിക്ക് കടം നൽകാതിരുന്ന ക്രെഡിറ്റ് സ്വീസ് വീഴുന്നു; ഹിൻഡൻബർ​ഗിനെതിരെ വീണ്ടും ട്രോൾ മഴ

സ്വിസ് ധനകാര്യസ്ഥാപനമായ ക്രെഡിറ്റ് സ്വീസിന്റെ ഓഹരി വില ബുധനാഴ്ച്ച ഇടിഞ്ഞതിനെ തുടർന്ന് ഹിൻഡൻബർഗിനെതിരെ ട്രോളുകൾ. അദാനിക്കെതിരെ റിപ്പോർട്ട് പുറത്തു വിട്ട യുഎസ് ഷോർട് സെല്ലറാണ് ഹിൻഡൻബർഗ് റിസർച്ച്. ബുധനാഴ്ച്ച 25% ൽ അധികമാണ് ക്രെഡിറ്റ് സ്വീസിന്റെ ഓഹരിവില ഇടിഞ്ഞത്. സൗദി നാഷണൽ ബാങ്ക് ക്രെഡിറ്റ് സ്വീസിൽ ഇനി നിക്ഷേപം നടത്തില്ല എന്ന റിപ്പോർട്ട് പുറത്തു വന്നതോടെയാണ് ഓഹരിവില ഇടിഞ്ഞത്. ഈയാഴ്ച്ചയുടെ തുടക്കത്തിൽ, സിലിക്കൺ വാലി ബാങ്കിന്റെ തകർച്ചയെ തുടർന്നും, ബാങ്കിന്റെ ഓഹരികൾ നഷ്ടം നേരിട്ടിരുന്നു.

ക്രെഡിറ്റ് സ്വീസിന്റെ സ്വകാര്യ വായ്പാ സ്ഥാപനം, അദാനി ഗ്രൂപ്പിന്റെ ബോണ്ടുകൾ സ്വീകരിക്കുന്നത് നിർത്തി വെച്ചിരുന്നു. അദാനി പോർട്സ് & സെസ്, അദാനി ഗ്രീൻ എനർജി, അദാനി ഇലക്ട്രിസിറ്റി മുംബൈ തുടങ്ങിയ കമ്പനികൾക്ക്, ഈട് പണയം നൽകിയുള്ള വായ്പകൾ നൽകില്ലെന്നാണ് ഹിൻഡൻബർഗ് റിപ്പോർട്ടിനെ തുടർന്ന് അറിയിച്ചിരുന്നത്.

Also Read : ഹിൻഡൻബർ​ഗിന് കരുത്തേകുന്ന ആരോപണം; എ.സി.സി, അംബുജ സിമന്റ്സ് ഉടമസ്ഥർ അദാനി ​ഗ്രൂപ്പല്ലെന്ന് റിപ്പോർട്ട്
ഇതേത്തുടർന്നാണ് ഇപ്പോൾ സോഷ്യൽ മീഡിയയിൽ ഹിൻഡൻബർഗിനെതിരെ പരിഹാസവുമായി ആളുകൾ രംഗത്ത് എത്തിയത്. ട്വിറ്ററിലാണ് ഹിൻഡൻബർഗിനെതിരായ ട്രോളുകൾ കൂടുതലുമുണ്ടായത്. അദാനി ബോണ്ടുകൾ ഈടായി സ്വീകരിക്കാൻ തയ്യറാവാതിരുന്ന ക്രെഡിറ്റ് സ്വീസിന്റെ തന്നെ ഓഹരികൾ ഇടിയുന്നു. ഇനി അവരുടെ ആസ്തികൾ ആരാണ് ഈടായി സ്വീകരിക്കുക എന്നതാണ് ഒരു ട്വീറ്റ്.


ക്രെഡിറ്റ് സ്വീസിനേയും, യുഎസ് ബാങ്കുകളെയും ഷോർട് ചെയ്തിരുന്നെങ്കിൽ അദാനി ഓഹരികളെ ഷോർട് സെൽ ചെയ്തുണ്ടാക്കിയതിനേക്കാൾ കൂടുതൽ പണം ഹിൻഡൻബർഗിനുണ്ടാക്കാമായിരുന്നു എന്നതാണ് ഒരു കുറിപ്പ്.



എല്ലാ സമയത്തും സാമ്പത്തിക സ്ഥാപനങ്ങളിലോ, മറ്റ് സ്ഥാപനങ്ങളിലോ ഒരു പ്രശ്നമുണ്ടാവുമെന്ന് ലളിതമായി പറയാം. അതിനാൽ എല്ലായ്പ്പോഴും ഹിൻഡൻബർഗ് റിസർച്ച് ഓർമിക്കപ്പെടുമെന്നാണ് മറ്റൊരു പരിഹാസം.


എസ് വി ബി ഓഹരികൾ ഒരു ദിവസത്തിൽ 65% ഇടിഞ്ഞു. ക്രെഡിറ്റ് സ്വീസിന്റെ ഓഹരികൾ 65% വീണു. ബാർക്ലെയ്സിന്റെ വിപണി മൂല്യം ഇപ്പോൾ കഷ്ടിച്ച് 30 ബില്യൺ ഡോളറുകളാണ്. ഹിൻഡൻബർഗിന് ഇതെല്ലാം മിസ്സായി, അല്ലെങ്കിൽ റിപ്പോർട്ട് ചെയ്യാൻ അനുമതി ലഭിച്ചില്ലെന്നാണ് മറ്റൊരു ട്വീറ്റ്.

Also Read : Credit Suisse Crisis:ക്രെഡിറ്റ് സ്വീസ് പ്രതിസന്ധി; സ്വിസ് കേന്ദ്രബാങ്കിൽ നിന്ന് 54 ബില്യൺ ഡോളർ വായ്പയെടുക്കും
അദാനി തിരികെ വരുമെന്നും, യുഎസ് ബാങ്കുകൾക്കാണ് സഹായം ആവശ്യമായി വരികയെന്നും അഭിപ്രായങ്ങളുണ്ട്. യുഎസിലെ സിലിക്കൺ വാലി ബാങ്ക് തകർന്നപ്പോഴും ഹിൻഡൻബർഗിനെതിരെ സോഷ്യൽ മീഡിയയിൽ പരിഹാസം നിറഞ്ഞ ട്രോളുകൾ പ്രചരിച്ചിരുന്നു.

Read Latest Business News and Malayalam News