Kerala SET 2019: സെറ്റ് പരീക്ഷയ്ക്ക് ജൂലൈ 27 വരെ അപേക്ഷിക്കാം

തിരുവനന്തപുരം: അധ്യാപക നിയമനത്തിനുള്ള കേരള സ്റ്റേറ്റ് എലിജിബിലിറ്റി ടെസ്റ്റിന് ജൂലൈ 27 വരെ അപേക്ഷിക്കാം. പരീക്ഷാര്‍ത്ഥികള്‍ ഇതിന് മുമ്പ് തന്നെ ടെസ്റ്റിനായുള്ള രജിസ്ട്രേഷന്‍ പൂര്‍ത്തിയാക്കണം. എല്‍ബിഎസ് സെന്‍റര്‍ ഫോര്‍ സയന്‍സ് ആന്‍റ് ടെക്നോളജിയെയാണ് സംസ്ഥാനത്ത് പരീക്ഷ നടത്താന്‍ ചുമതലപ്പെടുത്തിയിരിക്കുന്നത്. പരീക്ഷയ്ക്കായി അപേക്ഷിക്കുന്നവര്‍ എല്‍.ബി.എസ്. സെന്‍ററിന്‍റെ www.lbscentre.kerala.gov.in എന്ന വെബ്സൈറ്റില്‍ ഓണ്‍ലൈനായാണ് രജിസ്റ്റര്‍ ചെയ്യേണ്ടത്.

ഏതെങ്കിലും വിഷയത്തിലെ ബിരുദാനന്ത ബിരുദ പരീക്ഷയില്‍ 50 ശതമാനത്തില്‍ കുറയാത്ത മാര്‍ക്കോ അല്ലെങ്കില്‍ തത്തുല്യ ഗ്രേഡും ഉണ്ടായിരിക്കണം. ഇതോടൊപ്പം ബിഎഡുമാണ് സെറ്റ് പരീക്ഷയ്ക്കുള്ള അടിസ്ഥാന യോഗ്യത. എന്നാല്‍ ചില വിഷയങ്ങളില്‍ ബിരുദാനന്തര ബിരുദം നേടിയവരെ ബിഎഡ് വേണമെന്ന നിബന്ധനയില്‍ നിന്ന് ഒഴിവാക്കിയിട്ടുണ്ട്. ഡി.എല്‍.ഇ.ഡി, എല്‍.ടി.ടി.സി എന്നീ ട്രെയിനിങ്ങുകള്‍ പൂര്‍ത്തിയാക്കിയവര്‍ക്ക് സെറ്റ് പരീക്ഷ എഴുതാം.

അടിസ്ഥാന യോഗ്യതയായ ബിരുദാനന്തര ബിരുദമോ ബി.എഡോ ഏതെങ്കിലും ഒന്ന് നേടിയവര്‍ക്കും ചില നിബന്ധനകള്‍ അനുസരിച്ച് പരീക്ഷ എഴുതാവുന്നതാണ്. ബിരുദാനന്തര ബിരുദം അവസാനവര്‍ഷം പഠിക്കുന്നവര്‍ക്ക് പരീക്ഷ എഴുതാം. എന്നാല്‍ അവര്‍ ബിഎഡ് നേടിയവരായിരിക്കണം. അതുപോലെ ബിഎഡ് അവസാന വര്‍ഷം പഠിക്കുന്നവര്‍ക്ക് ബിരുദാനന്തര ബിരുദം ഉണ്ടായിരിക്കണം എന്നതാണ് നിബന്ധന. ബയോ ടെക്നോളജിയില്‍ പിജിയും നാച്വറല്‍ സയന്‍സില്‍ ബിഎഡും ഉള്ളവര്‍ക്ക് ബയോടെക്നോളജിയില്‍ സെറ്റ് എഴുതാവുന്നതാണ്.