വിദ്യാർഥികൾ ഫോൺ ഉപയോഗിക്കുന്നത് വിലക്കണം: ബാലാവകാശ കമ്മീഷൻ

തിരുവനന്തപുരം: സ്‌കൂൾ വിദ്യാർഥികൾ മൊബൈൽ ഫോൺ ഉപയോഗിക്കുന്നതിൽ നിയന്ത്രണം വേണമെന്ന് ബാലാവകാശ കമ്മീഷൻ. ഇത് സംബന്ധിച്ച് പുതിയ ഉത്തരവ് ഇറക്കണമെന്നും കമ്മീഷൻ ആവശ്യപ്പെട്ടു. 2017 ൽ തലശേരിയിൽ സഹപാഠിയുടെ ഫോട്ടോ മൊബൈലിൽ പകർത്തിയതിന് തുടർന്ന് ഒരു കുട്ടി ആത്മഹത്യ ചെയ്തിരുന്നു.

സ്‍മാർട്ട് ഫോണുകളുടെ ഉപയോഗം കുട്ടികളെ കുറ്റകൃത്യങ്ങളിലേക്ക് നയിക്കുന്നുവെന്ന് മനസിലായതിനെ തുടർന്നാണ് ബാലാവകാശ കമ്മീഷൻ പുതിയ ഉത്തരവിറക്കാൻ വിദ്യാഭ്യാസവകുപ്പിന് നിർദേശം നൽകിയത്. 2017 ൽ ആത്മഹത്യ ചെയ്ത പെൺകുട്ടിയുടെ മാതാപിതാക്കളുടെ പരാതിയെ തുടർന്ന് കമ്മീഷൻ അന്വേഷണം നടത്തിയിരുന്നു.

ഡിപിഐയുടെ കർശന നിർദേശ പ്രകാരം ക്ലാസ് സമയത്ത് അധ്യാപകർ മൊബൈൽ ഫോൺ ഉപയോഗിക്കാൻ പാടില്ല. എന്നാൽ, പലരും ഇത് പാലിക്കുന്നില്ലെന്ന പരാതി വ്യാപകമാകുന്നുണ്ട്.പ്ലസ് ടൂ വരെയുള്ള വിദ്യാർഥികൾക്ക് മൊബൈൽ ഫോൺ ഉപയോഗിക്കുന്നതിന് കർശന വിലക്കുണ്ട്. വിദ്യാഭ്യാസ വകുപ്പ് ഉദ്യോഗസ്ഥർ മൊബൈൽ ഫോൺ ഉപയോഗം കർശനമായി നിരീക്ഷിക്കണമെന്നും ബാലാവകാശ കമ്മീഷൻ നിർദേശിച്ചു.