ASAP: മാറ്റങ്ങളുടെ പച്ചത്തുരുത്തുമായി ഇടപ്പള്ളി Govt HSS

കൊച്ചി: സാമൂഹികമായും സാമ്പത്തികമായും പിന്നോക്കം നിൽക്കുന്ന വിദ്യാർത്ഥികളുടെ ഭാഷാ നൈപുണ്യവും തൊഴിൽ വൈദഗ്ധ്യവും വർധിപ്പിക്കാനായി 2014 ല്‍ തുടങ്ങിയ പദ്ധതി ആണ് അസാപ് (അഡീഷണൽ സ്കിൽ അക്വിസിഷൻ പ്രോഗ്രാം). അസാപ് അഞ്ചാം വര്‍ഷത്തിലേക്കടുക്കുമ്പോൾ സാമൂഹിക പ്രതിബദ്ധത കൊണ്ടും വേറിട്ട ആശയങ്ങൾ കൊണ്ടും നമ്മെ വിസ്മയിപ്പിക്കുകയാണ് ഇടപ്പള്ളി ഗവണ്മെന്‍റ് ഹയർ സെക്കന്‍ററി സ്കൂളിലെ വിദ്യാ‍ര്‍ത്ഥികൾ!

വിത്ത് പേന നിർമാണം:

കഴിഞ്ഞ ദിവസം നടന്ന വിത്ത് പേന നിർമാണ (സീഡ് പെൻ മേക്കിങ് ) ശില്പശാല കുട്ടികളെ പ്രകൃതിയിലേക്ക് കൂടുതൽ അടുക്കാൻ പ്രേരിപ്പിച്ചു. വിത്ത് പേനയുടെ ഉത്ഭവത്തെ കുറിച്ചും, പെരുകി വരുന്ന പ്ലാസ്റ്റിക് പേന മാലിന്യങ്ങളിൽ നിന്നും ലോകത്തെ രക്ഷിക്കാൻ വിത്ത് പേന വഹിക്കാൻ പോകുന്ന പങ്കിനെ കുറിച്ചും പരിശീലനം നൽകിയ അഭിമന്യു സി എസ് കുട്ടികളോട് സംസാരിച്ചു. പത്രം (ന്യൂസ് പേപ്പർ) ഉപയോഗിച്ചും, കളർ പേപ്പർ/ചാർട്ട് എന്നിവ ഉപയോഗിച്ചും എങ്ങനെ പേന നിർമിക്കാം എന്നതിൽ കുട്ടികൾക്ക് പരിശീലനം നൽകി.


ആദി ശങ്കര എഞ്ചിനീയറിംഗ് കോളേജിലെ അവസാന വർഷ വിദ്യാർത്ഥി ആണ് അഭിമന്യു. കഴിഞ്ഞ വര്ഷം കേന്ദ്ര സർക്കാർ സഹായത്തോടു കൂടി പ്ലാസ്റ്റിക് നിർമാർജ്ജന പരിപാടികളിൽ ശങ്കര കോളേജിലെ നേതൃ നിരയിൽ അഭിമന്യു ഉണ്ടായിരുന്നു. വെറും ഒരു മണിക്കൂറിൽ താഴെ സമയം കൊണ്ട് അസാപ് കുട്ടികൾ നിർമിച്ച പേനകൾ സോഷ്യൽ മീഡിയയിൽ തരംഗമായിരിക്കുകയാണ്. യുവ തലമുറയുടെ ഈ പരിസ്ഥിതി താല്പര്യം സമാഹ്യ മാധ്യമങ്ങളും ഏറ്റെടുക്കുന്നത് വളരെ പ്രതീക്ഷ നൽകുന്നുണ്ട്.


പ്രതീക്ഷയുടെ വാർത്താ പത്രിക (Newsletter):

പരിസ്ഥിതി ദിനത്തിന്റെ ഭാഗമായി ജൂൺ 5 നു പുറത്തിരിക്കാനിരിക്കുന്ന "Meliorism" (പ്രത്യാശ) എന്ന ന്യൂസ്‍ലെറ്റെറിന്‍റെ ഭാഗമായുള്ള വിവിധ പഠനങ്ങളിൽ ഒന്ന് മാത്രം ആണ് ഇത്. "അസാപ്പിലെ 27 കുട്ടികളെ 5 ഗ്രൂപ്പുകളായി തിരിക്കുകയും അവർ ഓരോ നൂതന പാരിസ്ഥിതിക ആശയങ്ങളുമായി വരികയും ചെയ്തു. അങ്ങനെ ഒരു ടീം വിത്ത് പേന നിർമിച്ചപ്പോൾ മറ്റൊരു ടീം കടലാസ്സു കൊണ്ട് കരകൗശല വസ്തുക്കൾ നിർമിച്ചു. അതിന്റെ പ്രദർശനം ഈ ആറാം തിയതി സ്കൂളിൽ വെച്ച് നടക്കും. ഇതിന് പുറമെ മറ്റു ടീമുകൾ നെടുമ്പാശ്ശേരി ഉള്ള സുവർണോദ്യാനത്തെ കുറിച്ചും, CNG ഇന്ധന പമ്പുകളെകുറിച്ചും, ഇടപ്പള്ളി സ്കൂളിലെ തന്നെ മറ്റു പരിസ്ഥിതി സംരക്ഷണ യജ്ഞങ്ങളെക്കുറിച്ചും പഠിച്ചു” എന്ന് അസാപ് ട്രെയിനർ ആയ ആനന്ദ് കൃഷ്ണമൂർത്തി പറഞ്ഞു.