ജവഹര്ലാല് നെഹ്റു സര്വകലാശാലയിലേക്കുള്ള (ജെ.എന്.യു) പ്രവേശന പരീക്ഷയുടെ തീയതികള് പ്രഖ്യാപിച്ച് നാഷണല് ടെസ്റ്റിങ് ഏജന്സി (എന്.ടി.എ). ഒക്ടോബര് 5 മുതല് ഒക്ടോബര് 8 വരെയാണ് പ്രവേശന പരീക്ഷ. വിദ്യാര്ത്ഥികള്ക്ക് അഡ്മിറ്റ് കാര്ഡ് jnuexams.nta.nic.in എന്ന വെബ്സൈറ്റില് നിന്ന് ഡൗണ്ലോഡ് ചെയ്യാം.
അഡ്മിറ്റ് കാര്ഡ് ലഭ്യമാകുന്നതോടെ വെബ്സൈറ്റില് രജിസ്ട്രേഷന് വിവരങ്ങള് നല്കി ലോഗിന് ചെയ്ത് ഡൗണ്ലോഡ് ചെയ്യാവുന്നതാണ്. മെയ് 11 മുതല് 14 വരെ പരീക്ഷ നടത്താനായിരുന്നു ആദ്യം തീരുമാനിച്ചിരുന്നത്. എന്നാല് കൊവിഡ് 19 ന്റെ പശ്ചാത്തലത്തില് നീട്ടിവെക്കുകയായിരുന്നു. പരീക്ഷ നടക്കുന്ന ദിവസം വിദ്യാര്ത്ഥികള് JNUEE അഡ്മിറ്റ് കാര്ഡിനോടൊപ്പം ഒരു ഐഡി കാര്ഡും ഫോട്ടോകളും കൈയില് കരുതുക. അഡ്മിറ്റ് കാര്ഡില്ലാതെ ഒരു കാരണവശാലും പരീക്ഷയെഴുതാന് അനുവദിക്കില്ല.
Also Read: ആറു മാസങ്ങള്ക്ക് ശേഷം ഇന്ന് സ്കൂളുകള് തുറക്കുമ്പോള്
കംപ്യൂട്ടര് അതിഷ്ഠിതമായാണ് പ്രവേശന പരീക്ഷ നടത്തുക. പരീക്ഷ എഴുതുന്ന വിദ്യാര്ത്ഥികള് റഫ് വര്ക്കുകള് ചെയ്യാന് പേപ്പറുകള് നല്കും. ഓരോ ഷിഫ്റ്റ് കഴിയുമ്പോഴും റഫ് ഷീറ്റുകള് തിരികെ നല്കണം.
Also Read: UGC NET 2020: അഡ്മിറ്റ് കാര്ഡ് ഡൗണ്ലോഡ് ചെയ്യാം
കൊവിഡ് 19 ന്റെ പശ്ചാത്തലത്തില് സുരക്ഷാ മാനദണ്ഡങ്ങള് പാലിച്ചായിരിക്കും പരീക്ഷ നടത്തുക. വിദ്യാര്ത്ഥികള് നിര്ബന്ധമായും മാസ്കും ഹാന്ഡ് ഗ്ലൗസും ധരിച്ചിരിക്കണം. കൂടുതല് വിവരങ്ങള് അഡ്മിറ്റ് കാര്ഡില് നിന്ന് മനസ്സിലാക്കാം.