2020ലെ ചാര്‍ട്ടേഡ് അക്കൗണ്ടൻ്റ് പരീക്ഷക്ക് അപേക്ഷ ക്ഷണിച്ച് ഐസിഎഐ. വിദ്യാര്‍ഥികൾക്ക് ഇന്നുമുതൽ ഫെബ്രുവരി 26 വരെ അപേക്ഷകൾ സമര്‍പ്പിക്കാം.

അപേക്ഷിക്കാം

1. ഐസിഎഐയുടെ ഔദ്യോഗിക വെബ്സൈറ്റ് സന്ദര്‍ശിക്കുക
2. ഐസിഎഐ സിഎ മേയ് 2020 പരീക്ഷ എന്ന ലിങ്കിൽ ക്ലിക്ക് ചെയ്യുക
3. നിങ്ങളുടെ പ്രോഗ്രാം, മറ്റ് വിവരങ്ങൾ എന്നിവ നൽകുക
4. അപേക്ഷാഫോം പൂരിപ്പിക്കുക
5. അപേക്ഷാ ഫീസ് അടക്കുക
6. രജിസ്ട്രേഷൻ ഫോമിൻ്റെ പിഡിഎഫ് ഡൗൺലോഡ് ചെയ്യുക

ഇന്ത്യയിൽ മാത്രമല്ല, വിദേശത്തും പ്രത്യേകിച്ച് ഗൾഫ് രാജ്യങ്ങളിൽ സി.എ പഠിച്ചവര്‍ക്ക് വൻ സാധ്യതയാണ് ഉള്ളത്. ആദായ നികുതി നിയമ പ്രകാരവും കമ്പനി നിയമപ്രകാരവും അക്കൗണ്ടുകൾ ഓഡിറ്റ് ചെയ്യേണ്ടത് ചാര്‍ട്ടേഡ് അക്കൗണ്ടൻ്റുമാരാണ്. ചാര്‍ട്ടേഡ് അക്കൗണ്ടൻസി കോഴ്സ് നടത്തുകയും ചാര്‍ട്ടേഡ് അക്കൗണ്ടൻ്റുമാരുടെ തൊഴിൽപരമായ കാര്യങ്ങൾ നിയന്ത്രിക്കുന്നതും ന്യൂഡൽഹി ആസ്ഥാനമായ ഇൻസ്റ്റിറ്റ്യൂട്ടാണ്. പ്ലസ്ടു പരീക്ഷ കഴിഞ്ഞവര്‍ക്കാണ് കോമൺ പ്രൊഫിഷൻസി ടെസ്റ്റ് അഥവാ സിപിറ്റി എഴുതാൻ സാധിക്കുന്നത്. ബിരുദധാരികൾക്കും ബിരുദാനന്തരബിരുദം കഴിഞ്ഞവര്‍ക്കും പ്രവേശന പരീക്ഷ എഴുതാതെ ഐപിസിയിലേക്ക് കടക്കാം.

സ്ഥാപനങ്ങളുടെ അക്കൗണ്ടുകൾ എഴുതുകയും ഫിനാൻഷ്യൽ സ്റ്റേറ്റ്മെൻ്റ് അക്കൗണ്ടിംഗ്, കമ്പനികളുടേയും ലിമിറ്റഡ് ലയബിലിറ്റി പാര്‍ട്ണര്‍ ഷിപ്പുകളുടേയും രൂപവത്കരണം, ലിക്വഡേഷൻ തുടങ്ങിയവയുമായി ബന്ധപ്പെട്ട ജോലികളും ആദായ നികുതി, വിൽപ്പന നികുതി, സേവന നികുതി, റിട്ടേണുകൾ തയ്യാറാക്കുന്നതടക്കമുള്ള ടാക്സേഷൻ ജോലികൾ, ഓഡിറ്റിങ് തുടങ്ങി വിപുലവും വൈവിധ്യങ്ങളുമായ സേവനങ്ങളാണ് ചാര്‍ട്ടേഡ് അക്കൗണ്ടൻ്റുമാര്‍ നൽകുന്നത്.

ആര്‍ക്കിൾഷിപ്പ് രണ്ടരവര്‍ഷം പൂര്‍ത്തിയാക്കിയവര്‍ക്കേ ഫൈനൽ കോഴ്സ് എഴുതാൻ കഴിയൂ. രണ്ട് ഗ്രൂപ്പുകളായാണ് പരീക്ഷ. തുടര്‍ന്ന്, ഫൈനൽ പരീക്ഷകൾ പാസാവുകയും ആര്‍ട്ടിക്കിൾഷിപ്പ് പൂര്‍ത്തിയാക്കുകയും ചെയ്തവര്‍ക്ക് സിഎ ഇൻസ്റ്റിറ്റ്യൂട്ടിൻ്റെ അംഗത്വത്തിന് അപേക്ഷിക്കാം. ഇതിനായി ജനറൽ മാനേജ്മെൻ്റ് ആൻഡ് കമ്മ്യൂണിക്കേഷൻ സ്കിൽസ് എന്ന കോഴ്സും പൂര്‍ത്തിയാക്കേണ്ടതുണ്ട്.

സമര്‍ഥരായ വിദ്യാര്‍ഥികൾ പൊതുവെ നാലുവര്‍ഷം കൊണ്ട് സിഎ പരീക്ഷകൾ പൂര്‍ത്തിയാക്കാറുണ്ട്. എല്ലാ വര്‍ഷവും ജൂൺ - ഡിസംബര്‍ മാസങ്ങളിൽ പ്രവേശന പരീക്ഷകളും മേയ്-നവംബര്‍ മാസങ്ങളിൽ മറ്റ് പരീക്ഷകളും നടക്കും.

എൻജി, മെഡിക്കൽ വിജ്ഞാപനം പ്രസിദ്ധീകരിച്ചു; പ്രധാനപ്പെട്ട തീയതികളറിയാം

വിദൂര വിദ്യാഭ്യാസ രീതിയിൽ അധിഷ്ഠിതമായ സിഎ കോഴ്സിൻ്റെെ വിവിധ ഘട്ടങ്ങൾക്കായി ഐസിഎഐ സെൻ്റുകൾക്ക് പുറമേ നിരവധി സ്വകാര്യ ഇൻസ്റ്റിറ്റ്യൂട്ടുകളും പ്രത്യേക പരിശീലനം നൽകുന്നുണ്ട്. ഇവയിൽ പല സ്ഥാപനങ്ങളും പതിനായിരങ്ങൾ ട്യൂഷൻ ഫീസായി വാങ്ങുന്നുമുണ്ട്. 100 ശതമാനം വിജയം ഉറപ്പ് നൽകിക്കൊണ്ട് പ്രവര്‍ത്തിക്കുന്ന ഇത്തരം സ്ഥാപനങ്ങളൊന്നും ഐസിഎഐ അംഗീകരിക്കുന്നില്ല. അവിടെ പഠിച്ചിറങ്ങുന്ന വിദ്യാര്‍ഥികൾക്ക് പരീക്ഷയിൽ എന്തെങ്കിലും തരത്തിലുള്ള മുൻഗണന ലഭിക്കുകയുമില്ല. ഔദ്യോഗിക പഠന കേന്ദ്രങ്ങളുടെ വിശദാംശങ്ങൾ ഐസിഎൽ വെബ്സൈറ്റിൽ ലഭ്യമാണ്.