Group Discussion: തയ്യാറെടുക്കുമ്പോൾ ശ്രദ്ധിക്കേണ്ട കാര്യങ്ങൾ

സുപ്രധാന പൊതു പരീക്ഷകൾക്കും ജോലിക്കുമൊക്കെ തയ്യാറെടുക്കുന്നവർ ഏറെ ശ്രദ്ധിക്കേണ്ട കാര്യമാണ് ഗ്രൂപ്പ് ഡിസ‍്‍കഷൻ. ജോലിക്കുള്ള തെരഞ്ഞെടുപ്പിൽ നിങ്ങളുടെ ഗ്രൂപ്പ് ഡിസ‍്‍കഷനിലെ പ്രകടനം പലപ്പോഴും നിർണായകമായിരിക്കും. ഇതാ തയ്യാറെടുക്കുമ്പോൾ ശ്രദ്ധിക്കേണ്ട കാര്യങ്ങൾ.

തയ്യാറെടുപ്പ്:

സ്വന്തം കഴിവുള്ള ആത്മവിശ്വാസമാണ് ഏറ്റവും പ്രധാനം. ആത്മവിശ്വാസത്തോടെ തന്നെ തയ്യാറെടുക്കുക. നിങ്ങളുടെ അഭിപ്രായം പ്രകടിപ്പിക്കുമ്പോൾ അത് ആത്മവിശ്വാസത്തോടെ തന്നെ അവതരിപ്പിക്കാൻ സാധിക്കണം. ഓരോ അഭിമുഖത്തിനും അനുസരിച്ച് വിഷയത്തിൽ കൃത്യമായി ധാരണയുണ്ടാക്കുക എന്നത് തയ്യാറെടുപ്പിൽ ശ്രദ്ധിക്കേണ്ട കാര്യമാണ്.

പരിശീലനം:

ഗ്രൂപ്പ് ഡിസ‍്‍കഷനിൽ വരാവുന്ന ചോദ്യങ്ങൾ കണ്ടെത്തി അതിന് ഉത്തരം പറഞ്ഞ് സ്വയം പരിശീലിക്കുക. സുഹൃത്തുക്കളോടോ മറ്റോ ചോദ്യങ്ങൾ ചോദിക്കാൻ പറയുകയും അതിന് അനുസരിച്ച് വാദപ്രതിവാദങ്ങൾ നടത്തുകയും ചെയ്യാവുന്നതാണ്. ഗ്രൂപ്പ് ഡിസ്കഷൻ പരിശീലിക്കുന്നതിന് അവസാനം സ്വയം വിശകലനം ചെയ്യുകയും തിരുത്താനുള്ളത് കണ്ടെത്തി മനസ്സിലാക്കുകയും ചെയ്യുക.

വിഷയങ്ങളിലുള്ള അറിവ്:

ആനുകാലിക വിഷയങ്ങളിലും മറ്റും അത്യാവശ്യം ധാരണയുണ്ടാവുന്നത് പ്രധാനമാണ്. അതിനാവശ്യമായ പുസ്തകങ്ങളും മറ്റും കണ്ടെത്തി വായിക്കുക. പത്രങ്ങൾ മനസ്സിരുത്തി വായിക്കുക. പ്രധാന വിഷയങ്ങളിൽ നോട്ട് തയ്യാറാക്കുകയും ചെയ്യുന്നത് നന്നായിരിക്കും.

നിയമങ്ങൾ പാലിക്കുക:

ഗ്രൂപ്പ് ഡിസ്കഷനിൽ പങ്കെടുക്കുമ്പോൾ സംസാരം തുടങ്ങി വെക്കുന്ന ആദ്യത്തെ മൂന്നിൽ ഒരാളെങ്കിലും ആവാൻ ശ്രമിക്കുക. ഉറക്കെ സംസാരിക്കുന്നതിൽ അല്ല കാര്യം. പറയുന്ന കാര്യങ്ങളിൽ വ്യക്തത ഉണ്ടാവുന്നതിലാണ് കാര്യം. വ്യത്യസ്ത അഭിപ്രായങ്ങളെ പരിഗണിക്കുക. അത് മനസ്സിലാക്കിയ ശേഷം വിയോജിച്ച് നിങ്ങളുടെ അഭിപ്രായങ്ങൾ ഉന്നയിക്കാം.