ബോറടിക്കുന്ന വിഷയം എങ്ങനെ പഠിച്ചെടുക്കാം?

ചില വിഷയങ്ങള്‍ ചിലര്‍ക്ക് പഠിച്ചെടുക്കാന്‍ വളരെ ബുദ്ധിമുട്ടുള്ളതായി തോന്നും. ബുദ്ധിമുട്ട് അനുഭവപ്പെടുമ്പോള്‍ പഠനം ഉപേക്ഷിക്കുമെങ്കിലും ജീവിതത്തില്‍ ഏതെങ്കിലും ഘട്ടത്തില്‍ ആ വിഷയത്തിലുള്ള അറിവ് അത്യാവശ്യമായേക്കാം. അങ്ങനെയുള്ള സാഹചര്യത്തില്‍ അത് എങ്ങനെ പഠിച്ചെടുക്കാം.

കാനഡയിലെ മക്മാസ്റ്റര്‍ സര്‍വകലാശാലയില്‍ എഞ്ചിനിയറിങ് അധ്യാപികയായ ബാര്‍ബറ ഓക്ലേ ഇതിന് ഒരു വഴി ഉപദേശിക്കുന്നു. പഠനകാലത്ത് കണക്ക് വെറുത്തിരുന്ന ബാര്‍ബറ ഹൈസ്‍കൂള്‍ വിദ്യാഭ്യാസത്തിനു ശേഷം കണക്ക് പഠിച്ചില്ല. എന്നാല്‍ 10 വര്‍ഷത്തിനുശേഷം സൈന്യത്തിലെ ഏറ്റവും താഴ്‍ന്ന റാങ്കില്‍ ജോലി ചെയ്യുമ്പോള്‍ ബാര്‍ബറ തിരിച്ചറിഞ്ഞു ജീവിതത്തില്‍ മുന്നേറണമെങ്കില്‍ കണക്ക് അറിയേണ്ടത് അത്യാവശ്യമാണെന്ന്. പിന്നീടുള്ള പ്രയത്‍നംകൊണ്ടാണ് അവര്‍ കണക്കിന്‍റെ കട്ടിയേറിയ പാഠങ്ങള്‍ പഠിച്ചെടുത്തത്.

ബോറടിപ്പിക്കുന്ന വിഷയം പഠിക്കാനുള്ള ആദ്യപടി അതിന് ഒരു കാരണം കണ്ടെത്തുക എന്നതാണ്. ജീവിതത്തില്‍ വിജയിക്കാന്‍, അല്ലെങ്കില്‍ നല്ല ജോലി ലഭിക്കാന്‍ ഈ വിഷയം പഠിക്കേണ്ടത് അത്യാവശ്യമാണെന്ന് ആദ്യം മനസിലാക്കുക.

ഒറ്റയിരുപ്പിന് കുറേനേരം പഠിക്കാതിരിക്കുക എന്നതാണ് രണ്ടാമത്തെ ഘട്ടം. ഉദാഹരണത്തിന് 25 മിനിറ്റ് തുടര്‍ച്ചയായി പഠിച്ചുകഴിഞ്ഞാല്‍ പത്തു മിനിറ്റ് ഇടവേളയെടുത്ത് ഒരു ചായയോ മറ്റോ ഉണ്ടാക്കി കുടിക്കുക. ബോറിങ് വിഷയം പഠിക്കുന്നതിന്‍റെ മടുപ്പ് ഒഴിവാക്കാന്‍ ഈ ടെക്നിക് സഹായിക്കും.

ഒരു കാര്യം മനസിലാകാതിരിക്കുമ്പോള്‍ വിഷമിക്കാതിരിക്കുക എന്നതാണ് മൂന്നാമത്തെ ഘട്ടം. നിങ്ങള്‍ക്ക് ഒരു കാര്യം മനസിലാകുന്നില്ല എന്നതുകൊണ്ട് നിങ്ങള്‍ക്ക് മിടുക്ക് കുറവാണ് എന്ന് അര്‍ത്ഥമില്ല. ചില കാര്യങ്ങള്‍ മനസിലാകാന്‍ പ്രയാസം ഉണ്ടാകും എന്നത് സ്വാഭാവികമാണ്.

പഠിച്ച കാര്യങ്ങള്‍ പല ആവൃത്തി ആവര്‍ത്തിച്ച് ഹൃദിസ്ഥമാക്കുക എന്നതാണ് അവസാന ഘട്ടം. എത്ര തവണ കൂടുതല്‍ ആവര്‍ത്തിക്കുന്നുവോ അത്രയും നിങ്ങള്‍ ആ വിഷയത്തില്‍ വൈദഗ്‍ധ്യം നേടും.

How to start enjoying a subject you find boring

The four-step way to learn a subject you find boring.