Velicham Project: വൈപ്പിൻ കരയുടെ വെളിച്ചം ഒന്‍പതാം വര്‍ഷത്തിലേക്ക്

കൊച്ചി: വൈപ്പിന്‍ നിയോജക മണ്ഡലത്തിൽ ഒൻപതാം വർഷം നടപ്പിലാക്കുന വെളിച്ചം പദ്ധതി വൈദ്യുതി വകുപ്പ് മന്ത്രി എം.എം.മണി ഉദ്ഘാടനം ചെയ്തു. മൂല്യമുള്ള വിദ്യഭ്യാസം നൽകി എങ്കിൽ മാത്രമേ നമ്മുടെ കുട്ടികൾക്ക് ലോക രാജ്യങ്ങളിൽ തുടർ വിദ്യാഭ്യാസത്തിനും ജോലിക്കും അവസരങ്ങൾ ലഭിക്കൂ . പൊതുവിദ്യാഭ്യാസ സംരക്ഷണ യജ്ഞത്തിന്റെ പ്രവർത്തനങ്ങൾക്ക് വെളിച്ചം പദ്ധതി കൂടുതൽ പ്രചോദനം നൽകുന്നു എന്ന് അദ്ദേഹം പറഞ്ഞു. തന്റെ മണ്ഡലത്തിലും ഇത്തരത്തിൽ ഒരു പദ്ധതി ആരംഭിക്കുന്നതിനുള്ള ആഗ്രഹവും ഉദ്ഘാടന ചടങ്ങിനിടയിൽ മന്ത്രി പ്രകടിപ്പിച്ചു .

വൈപ്പിന്‍ നിയോജക മണ്ഡലത്തിലെ കാൽ ലക്ഷത്തോളം വരുന്ന വിദ്യാര്‍ത്ഥികളുടെ സമഗ്രവികസനം ലക്ഷ്യമിട്ടാണ് എസ്.ശര്‍മ്മ എംഎൽഎ വെളിച്ചം പദ്ധതി ആരംഭിച്ചത്. സർക്കാരിന്റെ ഉച്ച ഭക്ഷണം പദ്ധതിയിൽ എട്ടാം ക്ലാസ്സ് വരെയുള്ള വിദ്യാർത്ഥികൾക്ക് ഉച്ചഭക്ഷണം നൽകുമ്പോൾ എല്ലാ പ്രവൃത്തി ദിവസങ്ങളിലും പ്ലസ് ടു വരെയുള്ള വിദ്യാർത്ഥികൾക്ക് പോഷകസമൃദ്ധമായ ഉച്ചഭക്ഷണം ഉറപ്പാക്കുന്ന അമ്മതന്‍ഭക്ഷണം പദ്ധതിയുടെ ഉദ്ഘാടനവും മന്ത്രി നിർവ്വഹിച്ചു.

എടവനക്കാട് എസ്. ഡി .പി .വൈ. കെ. പി. എം. എച്ച്. എസ് ഹാളിൽ നടന്ന ചടങ്ങിൽ മുന്‍ വര്‍ഷത്തെ വെളിച്ചം അവാര്‍ഡ് ഫെസ്റ്റും വിരമിച്ച അദ്ധ്യാപകരെയും അനദ്ധ്യാപകരെയും ആദരിച്ചു. വെളിച്ചം പൊതുപരീക്ഷയിൽ മണ്ഡലതലത്തിൽ ഒന്നാമതെത്തിയ വിദ്യാര്‍ത്ഥികള്‍ക്കും, മികച്ച പ്രകടനം കാഴ്ചവച്ച സ്കൂളുകള്‍ക്കും ചടങ്ങിൽ അവാര്‍ഡുകള്‍ വിതരണം ചെയ്തു. ജേതാക്കളായ സ്കൂളുകളിലെ അടിസ്ഥാനസൗകര്യ വികസനത്തിനായി എംഎൽഎ സ്പെഷ്യൽ ഡെവലപ്പ്മെന്‍റ് ഫണ്ടിൽ നിന്നും ആകെ ഇരുപത്തിനാല് ലക്ഷം രൂപ അനുവദിക്കുമെന്ന് എം എൽ എ പറഞ്ഞു. എൽ.പി,യു.പി,ഹൈസ്കൂള്‍ തലങ്ങളിൽ മികച്ച പ്രവര്‍ത്തനം കാഴ്ചവച്ച സ്കൂള്‍ മാനേജ്മെന്‍റ്, സ്കൂള്‍ ടീം, പ്രധാന അദ്ധ്യാപകര്‍, അദ്ധ്യാപകര്‍, സ്പെഷ്യ അദ്ധ്യാപകര്‍, പിടിഎ, മദര്‍ പിടിഎ, പാചകസേവിക, കോര്‍ഡിനേറ്റര്‍മാര്‍ എന്നിവര്‍ക്കും അവാര്‍ഡുകള്‍ നൽകി.

പൊതു വിദ്യാഭ്യാസ ഉപഡയറക്ടര്‍, ജില്ലാവിദ്യാഭ്യാസ ഓഫീസര്‍, എറണാകുളം എ.ഇ.ഒ, വൈപ്പിൻ എ.ഇ.ഒ, വെളിച്ചം കൗണ്‍സിൽ അംഗങ്ങള്‍ എന്നിവരടങ്ങിയ സമിതിയാണ് ജേതാക്കളെ കണ്ടെത്തിയത്.

കാൽലക്ഷത്തോളം വരുന്ന വിദ്യാർഥികളുടെ വിദ്യാഭ്യാസ നിലവാരം ഉയർത്തുന്നതിനും സ്കൂളുകളിലെ പശ്ചാത്തല സൗകര്യം ലക്ഷ്യമിടുന്നതാണ് പദ്ധതി . പൊതുവിജ്ഞാനം ഉൾപ്പെടുത്തി ലളിതമാക്കിയ സിലബസ് , സപ്പോർട്ടിങ് സ്റ്റഡി മെറ്റീരിയൽസ് എന്നിവ വിദ്യാർഥികൾക്ക് ലഭ്യമാക്കുന്നു. ഇതുവഴി വിദ്യാർത്ഥികളെ മികച്ച വിദ്യാഭ്യാസ നിലവാരത്തിലേക്ക് എത്തിക്കുന്നതിന് അദ്ധ്യാപകർക്ക് സാധിക്കുന്നു.

പൊതുവിദ്യാഭ്യാസ രംഗത്ത് വൈപ്പിൻ മോഡൽ എന്ന പേരിൽ വെളിച്ചം പദ്ധതിയുടെ ഭാഗമായി നിരവധി മാതൃക പദ്ധതികളാണ് നടപ്പാക്കിവരുന്നത്. എല്ലാ പ്രവൃത്തി ദിവസങ്ങളിലും പ്ലസ് ടു വരെയുള്ള വിദ്യാർത്ഥികൾക്ക് പോഷകസമൃദ്ധമായ ഉച്ചഭക്ഷണം ഉറപ്പാക്കുന്ന അമ്മതൻ ഭക്ഷണ പദ്ധതി, പ്രത്യാശ കൗൺസലിംഗ് പദ്ധതി, നിർദ്ധന വിദ്യാർത്ഥികൾക്കായി നടപ്പിലാക്കുന്ന സൗജന്യ മെഡിക്കൽ എൻജിനീയറിങ് എൻട്രൻസ് കോച്ചിങ് പദ്ധതി തുടങ്ങിയവ വെളിച്ചം പദ്ധതിയുടെ കീഴിൽ നടപ്പിലാക്കുന്നുണ്ട്.