ലോക്ക്ഡൗൺ കാലത്ത് കേന്ദ്ര ഓൺലൈൻ പഠന പ്ലാറ്റ്ഫോമായ സ്വയം മൂക്കിലൂടെ പഠിക്കുന്നവര്‍ 26 ലക്ഷമെന്ന് മാനവവിഭവശേഷി മന്ത്രാലയം. 574 കോഴ്സുകളാണ് വിദ്യാര്‍ഥികൾ പഠിക്കുന്നത്.

സ്വയം, സ്വയംപ്രഭ പ്ലാറ്റ്ഫോമുകളെക്കുറിച്ച് ചര്‍ച്ച ചെയ്യുന്നതിനായി കേന്ദ്ര മാനവവിഭവ ശേഷി മന്ത്രി രമേഷ് പെക്രിയാൽ നിശാങ്ക് നടത്തിയ യോഗത്തിലാണ് കണക്കുകൾ പുറത്തുവിട്ടത്. നിലവിൽ 1902 കോഴ്സുകളാണ് സ്വയത്തിൽ ലഭ്യമാകുന്നത്. സ്വയം കോഴ്സുകൾ പൂര്‍ത്തിയാക്കുന്ന വിദ്യാര്‍ഥികൾക്ക് ക്രെഡിറ്റ് നൽകുന്നത് സംബന്ധിച്ച് വിദ്യാഭ്യാസ സ്ഥാപനങ്ങൾക്ക് നിര്‍ദേശം നൽകാൻ യുജിസിയേയും എഐസിടിഇയേയും ചുമതലപ്പെടുത്തുമെന്നും മന്ത്രാലയം വ്യക്തമാക്കി. 1900 മൂക് കോഴ്സുകളും സ്വയം പ്രഭ ചാനലിലെ 60000 വീഡിയോകളും പത്ത് പ്രാദേശിക ഭാഷകളിലേക്ക് ലഭ്യമാക്കാനുള്ള നടപടികൾ ഉടൻ സ്വീകരിക്കുമെന്നും മന്ത്രാലയം അറിയിച്ചു. കൂടുതൽ കുട്ടികൾ പഠിക്കുന്ന കോഴ്സുകളാവും ആദ്യം ലഭ്യമാക്കുക.

അതേസമയം, ഇന്ത്യയിലെ ഇൻ്റര്‍നെറ്റ് സൗകര്യങ്ങൾ ലോക്ക്ഡൗൺ കാലത്ത് ഓൺലൈൻ പഠന സൗകര്യങ്ങളൊരുക്കുന്നതിന് അപര്യാപ്തമെന്ന് റിപ്പോര്‍ട്ട്. 7600 ലേറെപ്പേറെ ഉൾപ്പെടുത്തിക്കൊണ്ടുള്ള സര്‍വേയുടെ അടിസ്ഥാനത്തിലാണ് ക്യുഎസ് റിപ്പോര്‍ട്ട് തയ്യാറാക്കിയത്. ലണ്ടൻ കേന്ദ്രീകരിച്ച് പ്രവര്‍ത്തിക്കുന്ന ആഗോള വിദ്യാഭ്യാസ കൺസൾട്ടൻസിയായ ക്വാക്കറൈലി സൈമണ്ട്സിൻ്റേതാണ് റിപ്പോര്‍ട്ട്. പലയിടത്തും മികച്ച നെറ്റ് വര്‍ക്ക് ഇല്ല, ബ്രോഡ്ബാൻഡ് കണക്ഷനില്ല തുടങ്ങി വിവിധ കാരണങ്ങളാണ് റിപ്പോര്‍ട്ട് ചൂണ്ടിക്കാണിക്കുന്നത്. ഇതിനിടെ ഇടക്കിടെ വൈദ്യുതി കണക്ഷൻ പോകുന്നതും പഠനത്തിന് വെല്ലുവിളിയാകുന്നുണ്ട്. സര്‍വേയിൽ പങ്കെടുത്തതിൽ 72.6 ശതമാനം പേരും മൊബൈൽ ഹോട്ട്സ്പോട്ടാണ് ഉപയോഗിക്കുന്നത്. 15 ശതമാനം പേര്‍ ബ്രോഡ്ബാൻഡ് കണക്ഷനുകളും 9.68 ശതമാനം പേര്‍ വൈഫൈ ഡോംഗിളുകളും ഉപയോഗിക്കുന്നുണ്ട്.

World Book Day; ഏകദിന കേരള ലിറ്ററേച്ചര്‍ ഫെസ്റ്റിവല്‍ നാളെ