രാജ്യത്ത് കേന്ദ്ര സര്ക്കാരിന്റെ മേല്നോട്ടത്തില് പ്രവര്ത്തിക്കുന്ന എന്.ഐ.ടി ഉള്പ്പടെയുള്ള സാങ്കേതിക സ്ഥാപനങ്ങളിലേക്കുള്ള പ്രവേശന മാനദണ്ഡത്തില് ഇളവ്.
ഈ സ്ഥാപനങ്ങളിലേക്കുള്ള പ്രവേശനത്തിന് ജെ.ഇ.ഇ മെയിന് യോഗ്യത നേടുന്നതിന് പുറമെ പന്ത്രണ്ടാം ക്ലാസ് ബോര്ഡ് പരീക്ഷകളില് കുറഞ്ഞത് 75 ശതമാനം മാര്ക്ക് നേടുകയോ അല്ലെങ്കില് യോഗ്യതാ പരീക്ഷകളില് ആദ്യ 20 പെര്സെന്റൈലില് ഇടംനേടുകയോ വേണമായിരുന്നു. എന്നാല് ഇത്തവണ ജെ.ഇ.ഇ മെയിന് യോഗ്യത നേടുന്ന വിദ്യാര്ത്ഥികള് പന്ത്രണ്ടാം ക്ലാസ് പരീക്ഷ പാസായാല് മതിയെന്ന് സെന്ട്രല് സീറ്റ് അലോക്കേഷന് ബോര്ഡ് തീരുമാനിച്ചിതായി മാനവവിഭവശേഷി വികസന മന്ത്രി രമേഷ് പൊഖ്രിയാല് പറഞ്ഞു.
ഐ.ഐ.ടി കളിലേക്കുള്ള പ്രവേശനത്തിനും യോഗ്യതാ മാനദണ്ഡങ്ങളില് നേരത്തെ കേന്ദ്രം ഇളവു വരുത്തിയിരുന്നു. ജെ.ഇ.ഇ മെയിന് പരീക്ഷയ്ക്ക് ആദ്യത്തെ 2,50,000 സ്ഥാനങ്ങളിലെത്തുന്നവര്ക്ക് ജെ.ഇ.ഇ അഡ്വാന്സ് എഴുതാം. ഇതില് ലഭിക്കുന്ന റാങ്കിന്റെ അടിസ്ഥാനത്തിലായിരിക്കും പ്രവേശനം. പന്ത്രണ്ടാം ക്ലാസില് 75 ശതമാനം മാര്ക്ക് വേണമെന്ന നിബന്ധന ഇത്തവണ ബാധകമായിരിക്കില്ല. പന്ത്രണ്ടാം ക്ലാസ് പാസാകുന്നവര് പ്രവേശനത്തിന് അര്ഹരയാരിക്കും.
Also Read: പ്ലസ് വണ് പ്രവേശനം ഇന്നു മുതല്; അപേക്ഷിക്കേണ്ടത് എങ്ങനെ?
കൊവിഡ് 19 ന്റെ പശ്ചാത്തലത്തിലാണ് പ്രവേശന മാനദണ്ഡങ്ങളില് മാറ്റം വരുത്തിയിട്ടുള്ളത്. ഇതേ സാഹചര്യത്തില് ജെ.ഇ.ഇ പരീക്ഷ രണ്ടു തവണ മാറ്റിവെച്ചിരുന്നു. മാറ്റിവെച്ച പരീക്ഷ സെപ്റ്റംബര് 1 മുതല് 6 വരെ നടത്താനാണ് ഇപ്പോള് നാഷണല് ടെസ്റ്റിങ് ഏജന്സിയുടെ തീരുമാനം. സെപ്റ്റംബര് 27 ന് ജെ.ഇ.ഇ അഡ്വാന്സ്ഡ് പരീക്ഷ നടത്താന് നിശ്ചയിച്ചിരിക്കുന്നത്.