കൊറോണ വൈറസ് വ്യാപനം തടയുന്നതിൻ്റെ ഭാഗമായി ലോക്ക്ഡൗൺ പ്രഖ്യാപിച്ച സാഹചര്യത്തിൽ വിദ്യാര്‍ഥികൾക്ക് ഓൺലൈൻ ഹെൽപ് പോര്‍ട്ടലുമായി കാലിക്കറ്റ് യൂണിവേഴ്സിറ്റി. 24 മണിക്കൂറിനുള്ളിൽ അധികാരികൾ വിദ്യാര്‍ഥികൾക്ക് മറുപടി നൽകും.

കാലിക്കറ്റ് സര്‍വകലാശാലയുടെ സപ്പോര്‍ട്ട് വെബ്സൈറ്റ് വഴിയാണ് സംശയങ്ങൾ ചോദിക്കേണ്ടത്. പോര്‍ട്ടൽ വഴി ചോദിക്കുന്ന ചോദ്യങ്ങൾക്ക് സര്‍വകലാശാലയിൽ നേരിട്ട് ഹാജരാകാതയും ഫോൺ വഴി ബന്ധപ്പെടാതെയും വിദ്യാര്‍ഥികൾക്ക് ഉത്തരം ലഭിക്കും. വിദ്യാര്‍ഥികൾക്ക് അവര്‍ സമര്‍പ്പിച്ച ആപ്ലിക്കേഷനുകളുടെ തൽസ്ഥിതി അറിയുന്നതിനും കൃത്യമായ വിവരങ്ങൾ ലഭിക്കുന്നതിനും പോര്‍ട്ടലിൽ സൗകര്യമുണ്ട്. തുടക്കം എന്ന നിലയിൽ യൂണിവേഴ്സിറ്റി അന്വേഷണ വിഭാഗം, പരീക്ഷാഭവൻ, ജനറൽ ആൻഡ് അക്കാദമിക്, ഡയറക്ടേറ്റ് ഓഫ് അഡ്മിഷൻ, ഡയറക്ടേറ്റ് ഓഫ് റിസര്‍ച്ച്, വിദൂര വിദ്യാഭ്യാസ വിഭാഗം, മൈഗ്രേഷൻ വിഭാഗങ്ങളാണ് പോര്‍ട്ടലിൽ ബന്ധപ്പെടുത്തിയിരിക്കുന്നത്.

അതേസമയം, മഹാത്മാഗാന്ധി സര്‍വകലാശാല വിവിധ പഠനവകുപ്പുകളിലെയും ഇൻ്റര്‍സ്കൂൾ സെൻ്ററിലെയും പിജി പ്രോഗ്രാമുകളിലെ പ്രവേശനത്തിനായി നടത്താൻ നിശ്ചച്ചയിച്ചിരുന്ന പരീക്ഷ മാറ്റിവെച്ചു. ഏപ്രിൽ 25, 26 തീയതികളിൽ നടത്താനിരുന്ന പരീക്ഷകളാണ് മാറ്റിവെച്ചത്. ഓൺലൈൻ രജിസ്ട്രേഷൻ്റെ അവസാന തീയതിയടക്കമുള്ള പുതുക്കിയ സമയക്രമം പിന്നീട് അറിയിക്കും. വിശദ വിവരങ്ങൾ എംജിയുടെ ഔദ്യോഗിക വെബ്സൈറ്റിൽ ലഭ്യമാണ്.

കൊറോണക്കാലം; വിദ്യാര്‍ഥികളെ ക്ഷണിച്ച് എഡുമിത്ര ഫൗണ്ടേഷൻ