പതിനൊന്നാം ക്ലാസിലെ വിദ്യാര്‍ഥികൾക്ക് പുതിയ കോഴ്സുകളുമായി സിബിഎസ്ഇ. ഡിസൈൻ തിങ്കിങ്, ഫിസിക്കൽ ആക്ടിവിറ്റി, ആര്‍ട്ടിഫിഷ്യൽ ഇൻ്റലിജൻസ് തുടങ്ങിയ കോഴ്സുകളാണ് സിബിഎസ്ഇ അവതരിപ്പിക്കുന്നത്.

സെക്കണ്ടറി തലത്തിൽ പതിനേഴിലധികം നൈപുണ്യ കോഴ്സുകളും സീനിയര്‍ സെക്കണ്ടറി തലത്തിൽ 37 നൈപുണ്യ വികസന കോഴ്സുകളും സിബിഎസ്ഇ വിഭാവനം ചെയ്യുന്നുണ്ട്. 2020-2021 അധ്യയന വര്‍ഷം മുതൽ എല്ലാ സ്കൂളുകളും ഒന്നോ അതിലധികമോ നൈപുണ്യ കോഴ്സുകൾ കുട്ടികളെ പഠിപ്പിക്കണമെന്നും സിബിഎസ്ഇ അറിയിച്ചു. അതേസമയം, കൊറോണ വൈറസ് വ്യാപനത്തിൻ്റെ പശ്ചാത്തലത്തിൽ 10, 12 ക്ലാസുകളുടെ മാറ്റിവെച്ച എല്ലാ പരീക്ഷകളും സിബിഎസ്ഇ നടത്തില്ല. ഉപരി പഠനത്തിന് അര്‍ഹത നേടാൻ ആവശ്യമുള്ള പ്രധാന വിഷയങ്ങളിൽ മാത്രമേ പരീക്ഷ നടത്തൂ എന്ന് സിബിഎസ്ഇ അധികൃതര്‍ വാര്‍ത്താകുറിപ്പിൽ അറിയിച്ചു. വിദേശത്ത് പ്രവര്‍ത്തിക്കുന്ന സിബിഎസ്ഇ സ്കൂളുകളിലെ പരീക്ഷ പൂര്‍ണമായും ഉപേക്ഷിക്കുന്നതായും അധികൃതര്‍ അറിയിച്ചിട്ടുണ്ട്.

വടക്കു കിഴക്കൻ ഡൽഹിയിൽ മാത്രമാണ് പത്താം ക്ലാസ് പരീക്ഷ നടത്താൻ ശേഷിക്കുന്നത്. ഹിന്ദി കോഴ്സ് എ, ഹിന്ദി കോഴ്സ് ബി, ഇംഗ്ലീഷ് കോമൺ, ഇംഗ്ലീഷ് ലാംഗ്വേജ് ആൻഡ് ലിറ്ററേച്ചര്‍, സയൻസ്, സോഷ്യൽ സയൻസ് എന്നിവയാണ് ഇവിടെ പത്താംക്ലാസുകാര്‍ക്ക് നടത്താനുള്ളത്. ബിസിനസ് സ്റ്റഡീസ്, ജോഗ്രഫി, ഇലക്ടീവ്, ഹോം സയൻസ്, സോഷ്യോളജി, കമ്പ്യൂട്ടര്‍ സയൻസ്, ഇൻഫര്‍മേഷൻ പ്രാക്ടീസ്, ഇൻഫര്‍മേഷൻ ടെക്നോളജി, ബയോടെക്നോളജി എന്നിങ്ങനെ 12 വിഷയങ്ങളിലാണ് പന്ത്രണ്ടാം ക്ലാസുകാര്‍ക്ക് പരീക്ഷ നടക്കാനുള്ളത്. വടക്കു കിഴക്കൽ ഡൽഹിയിൽ 11 വിഷയങ്ങളിലും പരീക്ഷ നടക്കും.

ക്വാറൻ്റൈൻ കാലത്ത് വെറുതെ ഇരിക്കേണ്ട; അൽപം മോഡേൺ ആവാം

ഏതൊക്കെ പരീക്ഷകളാണ് നടത്തുന്നതെന്ന് ഉൾപ്പടെയുള്ള വിശദമായ വിവരങ്ങൾ ഔദ്യോഗിക വെബ്സൈറ്റ് വഴി അറിയിക്കുമെന്നും സിബിഎസ്ഇ അറിയിച്ചു. അതേസമയം, കൊറോണ വൈറസ് വ്യാപനത്തെ തുടര്‍ന്ന് നീട്ടിവെച്ച സിബിഎസ്ഇ 10, 12 ക്ലാസുകളില ബോര്‍ഡ് പരീക്ഷകൾ മേയിൽ പൂര്‍ത്തിയാക്കി ജൂണിൽ ഫലം പ്രഖ്യാപിക്കാനാകുമെന്ന് പ്രതീക്ഷിക്കുന്നതായി കേന്ദ്ര ഉന്നതവിദ്യാഭ്യാസ സെക്രട്ടറി അമിത് ഖാരെ അറിയിച്ചു. ഏതെങ്കിലും സാഹചര്യത്തിൽ അടച്ചിടൽ ഏപ്രിൽ 14 കഴിഞ്ഞും നീണ്ടാൽ പന്ത്രണ്ടാം ക്ലാസിൻ്റെ ശേഷിക്കുന്ന പരീക്ഷകൾ അടച്ചിടൽ കാലയളവിൽത്തന്നെ നടത്തുന്നതിനെക്കുറിച്ച് സര്‍ക്കാര്‍ ആലോചിക്കുന്നുണ്ടെന്നും ഉന്നതവിദ്യാഭ്യാസ സെക്രട്ടറി വ്യക്തമാക്കി.