കലാലയങ്ങളില്‍ പെരുമാറ്റച്ചട്ടം വേണമെന്ന് ഗവര്‍ണര്‍ പി സദാശിവം

തിരുവനന്തപുരം: സംസ്ഥാനത്തെ കലാലയങ്ങളില്‍ പെരുമാറ്റച്ചട്ടം കൊണ്ടുവരണമെന്ന് ഗവര്‍ണര്‍ പി സദാശിവം. വിധ്യാഭ്യാസ കാര്യങ്ങള്‍ക്കും വിദ്യാര്‍ത്ഥി സമൂഹത്തിന്‍റെ വളര്‍ച്ചയ്ക്കുമാണ് നാം പ്രഥമ പരിഗഗണന നല്‍കേണ്ടത്. നിലവാരമുള്ള വിദ്യാഭ്യാസത്തില്‍ കലാലയങ്ങളില്‍ സമാധാനപരമായ അന്തരീക്ഷം അനിവാര്യമാണെന്നും അദ്ദേഹം കൂട്ടിച്ചേര്‍ത്തു.

കലാലയങ്ങളില്‍ നഷ്ടപ്പെട്ട സമാധാനം തിരിച്ചുകൊണ്ടുവരാനുള്ള ശ്രമങ്ങള്‍ ഉണ്ടാകണം. രാഷ്ട്രീയ പാര്‍ട്ടികളും വിദ്യാര്‍ത്ഥികളും ഇതിനായി ചര്‍ച്ചകള്‍ നടത്തണമെന്നും ക്യാമ്പസുകളില്‍ കുഴപ്പങ്ങളുണ്ടാക്കുന്നവരെ തിരിച്ചറിയണമെന്നും ഇത്തരം ശക്തികളെ പുറത്തുനിര്‍ത്തണമെന്നും ഗവര്‍ണര്‍ ആവശ്യപ്പെട്ടു.

തിരുവനന്തപുരം യൂണിവേഴ്സിറ്റി കോളേജിലെ അക്രമ സംഭവങ്ങളുമായി ബന്ധപ്പെട്ട വിഷയത്തില്‍ ഗവര്‍ണര്‍ നേരത്തേ ഇടപെട്ടിരുന്നു. സംഭവവുമായി ബന്ധപ്പെട്ട് കേരള സര്‍വ്വകലാശാല വൈസ് ചാന്‍സിലറോട് ഗവര്‍ണര്‍ നേരിട്ട് വിശദീകരണം തേടിയിരുന്നു. ഇതിന് പിന്നാലെയാണ് കലാലയങ്ങളില്‍ പെരുമാറ്റച്ചട്ടം വേണമെന്ന നിര്‍ദ്ദേശവുമായി ഗവര്‍ണര്‍ രംഗത്തെത്തിയിരിക്കുന്നത്.

ഈ മാസം 12 നാണ് കോളജിലെ മൂന്നാം വർഷ ബിരുദ വിദ്യാർഥിയായ അഖിൽ ചന്ദ്രനെ എസ്എഫ്ഐ നേതാക്കൾ കുത്തിയത്. കേസിലെ ഒന്നും രണ്ടും പ്രതികളായ ശിവരഞ്‍ജിത്ത്‌, നസീം എന്നിവരെ പോലീസ് അറസ്റ്റ് ചെയ്ത് റിമാൻഡ് ചെയ്തു. കേസിലെ മറ്റ് പ്രതികളും യൂണിവേഴ്‌സിറ്റി കോളജിലെ എസ്എഫ്ഐ യൂണിറ്റ് അംഗങ്ങളുമായ അദ്വൈത്, ആരോമൽ , ആദിൽ മുഹമ്മദ് എന്നിവരും അറസ്റ്റിലായി. ഇവരും ഇപ്പോൾ റിമാൻഡിലാണ്.

സംസ്ഥാന ഉന്നതവിദ്യാഭ്യാസ മന്ത്രി കെ.ടി ജലീലും കേരള സർവകലാശാല വിസിയും സംഭവത്തിൽ കേരള ഗവർണറെ കണ്ട് വിശദീകരണം നൽകി. അഖിലിനെ കുത്താനുപയോഗിച്ച കത്തി ഒന്നും രണ്ടും പ്രതികലെ കൂട്ടി നടത്തിയ തെളിവെടുപ്പിനിടെ പോലീസ് കണ്ടെടുത്തിരുന്നു. ചവറുകൾക്കിടയിൽ നിന്നാണ് അഖിലിനെ കുത്താൻ ഉപയോഗിച്ച കത്തി കണ്ടെത്തിയത്. കോളജ് ക്യാമ്പസിൽ അക്രമരാഷ്ട്രീയം വെച്ച് പൊറുപ്പിക്കില്ലെന്നും സമാധാനാന്തരീക്ഷം സൃഷിക്കുമെന്നും സർക്കാരും വിദ്യാർഥികൾക്ക് ഉറപ്പു നൽകിയിട്ടുണ്ട്. കോളജിൽ സമാധാനാന്തരീക്ഷം നിലനിർത്തണമെന്ന് ഗവർണർ നിർദേശം നൽകി.