ജെ.ഇ.ഇ വ്യാജനെ സൂക്ഷിക്കുക!! രജിസ്‌ട്രേഷന്‍ അവസാനിക്കാനിരിക്കെ പ്രധാന അറിയിപ്പുമായി എന്‍.ടി.എ

ഫെബ്രുവരി 2021 സെഷന്‍ ജെ.ഇ.ഇ മെയിന്‍ പരീക്ഷയ്ക്കായുള്ള രജിസ്‌ട്രേഷന്‍ അവസാനിക്കാന്‍ മണിക്കൂറുകള്‍ മാത്രം ശേഷിക്കെ പ്രധാനപ്പെട്ട ഒരു അറിയിപ്പ് പുറപ്പെടുവിച്ച് നാഷണല്‍ ടെസ്റ്റിങ് ഏജന്‍സി (എന്‍.ടി.എ). ജെ.ഇ.ഇ മെയിന്‍ 2021 പരീക്ഷയുമായി ബന്ധപ്പെട്ട് ഒരു വ്യാജ വെബ്‌സൈറ്റ് പ്രചിരിക്കുന്നുണ്ടെന്നും വിദ്യാര്‍ത്ഥികളും രക്ഷകര്‍ത്താക്കളും ശ്രദ്ധിക്കണമെന്നും എന്‍.ടി.എ അറിയിപ്പില്‍ പറയുന്നു.

jeeguide.co.in എന്ന യു.ആര്‍.എല്ലാണ് വ്യാജമായി പ്രവര്‍ത്തിക്കുന്നത്. വ്യാജമായി അപേക്ഷ സ്വീകരിക്കുകയും അപേക്ഷാ ഫീസ് ആവശ്യപ്പെടുകയും ഒക്കെ ചെയ്യുന്നതായി ശ്രദ്ധയില്‍പ്പെട്ടിട്ടുണ്ട്. ഈ വെബ്‌സൈറ്റിലൂടെ പണമടയ്ക്കുകയോ രജിസ്‌ട്രേഷന്‍ നടത്താന്‍ ശ്രമിക്കുകയോ ചെയ്യരുതെന്ന് എന്‍.ടി.എ മുന്നറിയിപ്പ് നല്‍കുന്നു. എന്‍.ടി.എയ്‌ക്കോ എന്‍.ടി.എയിലെ ജീവനക്കാര്‍ക്കോ വ്യാജ വെബ്‌സൈറ്റുമായി ഒരുതരത്തിലുള്ള ബന്ധവുമില്ലെന്നും അറിയിച്ചിട്ടുണ്ട്.

നീറ്റ് പി.ജി 2021 പ്രവേശന പരീക്ഷ: തീയതി പ്രഖ്യാപിച്ചു
രജിസ്‌ട്രേഷന്‍ നടപടികള്‍ക്കായി ജെ.ഇ.ഇ മെയിന്‍ 2021 ന്റെ ഔദ്യോഗിക വെബ്‌സൈറ്റായ jeemain.nta.nic.in സന്ദര്‍ശിക്കുക. അതല്ലെങ്കില്‍ എന്‍.ടി.എയുടെ ഔദ്യോഗിക വെബ്‌സൈറ്റായ nta.ac.in സന്ദര്‍ശിക്കാം. രജിസ്‌ട്രേഷന്‍ നടത്താന്‍ മുകളിലത്തെ ലിങ്കുകളില്‍ ക്ലിക്ക് ചെയ്താല്‍ മതിയാകും. വ്യാജ വെബ്‌സൈറ്റുകളുടെ ചതിക്കുഴിയില്‍ വീണാല്‍ ഉടന്‍ തന്നെ പോലീസ് സ്‌റ്റേഷനുമായോ സൈബര്‍ സെല്ലുമായോ ബന്ധപ്പെടുക. എന്‍.ടി.എയുടെ പരാതി പരിഹാര സെല്ലിന്റെ ഇമെയില്‍ ഐഡിയായ grivance@nta.ac.in ലേക്ക് മെയിലും അയക്കുക.