ഈ വര്‍ഷത്തെ എസ്എസ്എൽസി പരീക്ഷയുടെ ഹാൾടിക്കറ്റുകൾ ബുധനാഴ്ച മുതൽ ഡൗൺലോഡ് ചെയ്യാം. 2945 പരീക്ഷാ കേന്ദ്രങ്ങളിലായി 422347 വിദ്യാര്‍ഥികളാണ് ഇത്തവണ പരീക്ഷ എഴുതുന്നത്.

മാര്‍ച്ച് 10 മുതൽ 26 വരെയാണ് പരീക്ഷ. 1749 വിദ്യാര്‍ഥികൾ പ്രൈവറ്റായി പരീക്ഷ എഴുതുന്നുണ്ട്. മലയാളം മീഡിയത്തിൽ നിന്നും 217184 വിദ്യാര്‍ഥികളും ഇംഗ്ലീഷ് മീഡിയത്തിൽ നിന്ന് 201259 വിദ്യാര്‍ഥികളും ഇത്തവണ പരീക്ഷ എഴുതും. പ്രാദേശിക ഭാഷകളിൽ തമിഴ്, കന്നഡ ഭാഷയിലും വിദ്യാര്‍ഥികളുണ്ട്.

ഈ വര്‍ഷത്തെ എസ്.എസ്.എൽ.സി മൂല്യനിര്‍ണയം ഏപ്രിൽ രണ്ടിന് ആരംഭിച്ച് 23ന് അവസാനിക്കും. അതേസമയം, എസ്.എസ്.എൽ.സി ചോദ്യക്കടലാസുകളുടെ സൂക്ഷിപ്പ് ഇത്തവണ സ്കൂളുകൾക്കാണ്. ചോദ്യ ചോര്‍ച്ച ഉൾപ്പെടെയുള്ള ക്രമക്കേടുകളുടെ പശ്ചാത്തലത്തിൽ ബാങ്കുകളിൽ സൂക്ഷിച്ചിരുന്ന ചോദ്യക്കടലാസുകളാണ് ഇത്തവണ മുതൽ സ്കൂളുകളിൽ തന്നെ സംരക്ഷിക്കുന്നത്. ഏതാനും വര്‍ഷമായി ചോദ്യക്കടലാസുകൾ ബാങ്കുകളിലാണ് സൂക്ഷിച്ചിരുന്നത്. എന്നാൽ, സ്കൂളുകളിൽ തന്നെ സുരക്ഷയൊരുക്കാൻ കഴിയുമെന്ന കണക്കുക്കൂട്ടലിലാണ് പുതിയ തീരുമാനം. തീരുമാന പ്രകാരം ചോദ്യക്കടലാസുകൾ സൂക്ഷിക്കാൻ സ്കൂളുകളിൽ താഴെ പറയുന്ന സൗകര്യങ്ങളുണ്ടായിരിക്കണം.

1. സുരക്ഷിതമായ മുറി
2. രണ്ട് അലമാരകൾ
3. മുറിക്ക് രണ്ട് പൂട്ട്
4. മുറിക്ക് കാവൽ
5. 24 മണിക്കൂറും സിസിടിവി
6. പോലീസിൻ്റെ സഹായം

CBSE പരീക്ഷ; ഈ മാറ്റം അറിയാതെ പോവരുത്

മേൽ പറഞ്ഞ സജ്ജീകരണങ്ങൾക്ക് സ്കൂളിലെ പിഡി ഫണ്ടിൽ നിന്നോ പിടിഎ ഫണ്ടിൽനിന്നോ തുക വിനിയോഗിക്കാനാണ് വിദ്യാഭ്യാസ വകുപ്പിൻ്റെ നിര്‍ദേശം. എന്നാൽ, കുട്ടികൾ കുറവുള്ള സ്കൂളുകളിൽ ഇതിനാവശ്യമായ ഫണ്ടില്ലെന്നാണ് അധ്യാപകരുടെ വാദം. എന്നാൽ, ഇത്തരം സ്കൂളുകൾ നേരത്തെ തന്നെ വിവരം അറിയിക്കണമെന്ന് വിദ്യാഭ്യാസ വകുപ്പ് അറിയിച്ചു.