കൃഷി വകുപ്പിൽ ജോലി ലഭിക്കാൻ പൂജ്യം മാര്‍ക്ക് നേടിയാൽ മതിയെന്ന് തെളിയിക്കുകയാണ് പി.എസ്.സി.ബുധനാഴ്ച പ്രസിദ്ധീകരിച്ച കൃഷിവകുപ്പിലെ കൃഷി അസിസ്റ്റൻ്റ് തസ്തികയിലേക്കുള്ള ചുരുക്ക പട്ടികയിലാണ് ഒരു മാര്‍ക്ക് പോലും ഇല്ലാത്തവരും ഇടംനേടിയിരിക്കുന്നത്.

കാര്‍ഷിക സര്‍വകലാശാല നടത്തുന്ന അഗ്രിക്കൾച്ചര്‍ ഡിപ്ലോമയാണ് കൃഷി അസിസ്റ്റൻ്റ് ആകാനുള്ള അടിസ്ഥാന യോഗ്യത. അതേസമയം, ഇവരുടെ അഭാവത്തിൽ വി.എച്ച്.എസ്.സി അഗ്രിക്കൾച്ചര്‍ കഴിഞ്ഞവരെയും പരിഗണിക്കും. 2012ൽ ഈ തസ്തികയിലേക്ക് വിജ്ഞാപനം വന്നപ്പോൾ ബി.എസ്.സി അഗ്രിക്കൾച്ചര്‍ കഴിഞ്ഞവര്‍ ഹൈക്കോടതിയെ സമീപിച്ച് അധികയോഗ്യത അയോഗ്യതയായി കണക്കാക്കരുത് എന്ന് അനുകൂല വിധി നേടിയിരുന്നു.

എന്നാൽ, പി.എസ്.സി റാങ്ക് ലിസ്റ്റ് പ്രസിദ്ധീകരിച്ചപ്പോൾ നെഗറ്റീവ് മാര്‍ക്ക് ലഭിച്ച ബി.എസ്.സിക്കാര്‍ക്കും അധിക യോഗ്യതയുണ്ടെന്ന് പറഞ്ഞ് കൃഷി വകുപ്പിൽ ജോലി നൽകുകയും അന്ന് ആയിരത്തിലധികം ഒഴിവുണ്ടായതിനാൽ വി.എച്ച്.എസ്.സി കഴിഞ്ഞവര്‍ക്ക് ജോലി ലഭിക്കുകയും ചെയ്തിരുന്നു. തുടര്‍ന്ന് 2016ൽ ഈ തസ്തികയിലേക്ക് പുതിയ വിജ്ഞാപനം വീണ്ടും പ്രസിദ്ധീകരിച്ചപ്പോൾ ഡിപ്ലോമക്കാര്‍ക്കൊപ്പം ബി.എസ്.സിക്കാര്‍ അപേക്ഷിക്കുകയും വി.എച്ച്.എസ്.സിക്കാര്‍ കോടതിയെ സമീപിക്കുകയും ചെയ്തു. എന്നാൽ, ആ ഉത്തരവിന് മുൻകാല പ്രാബല്യം നൽകാൻ അന്ന് സര്‍ക്കാര്‍ തയ്യാറായില്ല. ഇതിൻ്റെ ഫലമാണ് ഇപ്പോൾ പുറത്തിറങ്ങിയ സാധ്യത പട്ടികയിൽ പൂജ്യം മാര്‍ക്കാണെങ്കിലും ജോലി ലഭിക്കുന്ന അവസ്ഥയായത്.

ഇംഗ്ലീഷ് ഇനി ഈസിയാണ്; ഇ-ക്യൂബ് വരുന്നു

സാധ്യതാ പട്ടിക പുറത്തുവന്നതോടെ പി.എസ്.സി എന്തിനാണ് യോഗ്യതാ പരീക്ഷാ നടത്തുന്നതെന്നാണ് ഉദ്യോഗാര്‍ഥികളുടെ ചോദ്യം. രോക്ഷാകുലരായ ഉദ്യോഗാര്‍ഥികൾ കോടതിയെ സമീപിക്കാൻ ഒരുങ്ങുകയാണ്.