വിദ്യാർഥികളേ... ഇനിയും ഈ ആപ്പിനെക്കുറിച്ച് അറിയാത്തവരുണ്ടോ?

കൊറോണ വൈറസ് വ്യാപനം തടയാൻ സാമൂഹ്യ അകലം പാലിക്കുകയാണ് നാം ഓരോരുത്തരും. പഠനവും ജോലിയും യാത്രകളും മാറ്റിവെച്ച് എല്ലാവരും വീട്ടിൽ തന്നെയുണ്ട്. കൊറോണയെ നേരിടുന്നതിൻ്റെ ഭാഗമായി കേരളത്തിലെ വിദ്യാഭ്യാസ സ്ഥാപനങ്ങൾ നേരത്തെതന്നെ അടച്ചിരുന്നു. അവധിക്കാല ക്ലാസുകളും സര്‍ക്കാര്‍ നിരോധിച്ചിട്ടുണ്ട്.

ഈ അവസരത്തിൽ വിദ്യാര്‍ഥികൾക്കും അധ്യാപകര്‍ക്കും പാഠങ്ങൾ പഠിക്കാനും പഠിപ്പിക്കാനും അവസരം ഒരുക്കുകയാണ് കേരള സ്റ്റാര്‍ട്ടപ്പ് മിഷൻ. ലിൻവേയ്സ് ടെക്നോളജീസ് എന്ന സ്ഥാപനമാണ് വിദ്യാര്‍ഥികൾക്കും അധ്യാപകര്‍ക്കുമായി ഇത്തരം ഒരു ആപ്പ് ഒരുക്കിയിരിക്കുന്നത്. നിലവിൽ സൗജന്യ സേവനങ്ങളാണ് ഈ ആപ്പ് വഴി ലഭിക്കുന്നത്. അത്യാവശ്യമെങ്കിൽ സൗജന്യ സേവനത്തിൻ്റെ കാലാവധി നീട്ടുമെന്ന് ലിൻവേയ്സ് കോ-ഫൗണ്ടര്‍ ബാസ്റ്റിൽ തോമസ് അറിയിച്ചിട്ടുണ്ട്.

അധ്യാപകര്‍ക്ക് ഈ ആപ്പ് വഴി കുട്ടികൾക്ക് ഓൺലൈൻ ക്ലാസുകൾ എടുക്കാൻ സാധിക്കും. നിലവിൽ രാജ്യത്തെ നൂറിലേറെ വിദ്യാഭ്യാസ സ്ഥാപനങ്ങൾ ഈ ആപ്പ് ഉപയോഗിക്കുന്നുണ്ട്. വീഡിയോ ക്ലാസുകൾ, പരീക്ഷകൾ, ക്വിസ്സുകൾ തുടങ്ങിയ സേവനങ്ങളും ആപ്പിൽ ലഭ്യമാണ്.