പരീക്ഷയിൽ ക്രമക്കേട്; 180 വിദ്യാര്‍ഥികളുടെ ഫലം തടഞ്ഞു

വിവിധ കോളേജുകളിലെ 180 എംബിബിഎസ് വിദ്യാര്‍ഥികളുടെ പരീക്ഷാഫലം തടഞ്ഞു. പരീക്ഷയിൽ ക്രമക്കേട് നടത്തിയെന്ന നിഗമനത്തിൻ്റെ അടിസ്ഥാനത്തിലാണ് ആരോഗ്യ സര്‍വകലാശാല പരീക്ഷാഫലം തടഞ്ഞത്.

ഉത്തരക്കടലാസിനൊപ്പം പരീക്ഷാഹാളിലെ വീഡിയോ ദൃശ്യങ്ങളും സര്‍വകലാശാലക്ക് നൽകണമെന്നാണ് ചട്ടം. കോളേജുകൾ സമര്‍പ്പിച്ച സിഡി പരിശോധിച്ചപ്പോഴാണ് ക്രമക്കേട് കണ്ടെത്തിയത്. കണ്ണൂര്‍ അഞ്ചരക്കണ്ടി മെഡിക്കൽ കോളേജ് ഹാജരാക്കിയ സിഡി പരിശോധിക്കാനാവാതെ വന്നതോടെയാണ് ഫലം തടഞ്ഞത്. ശരിയായ സിഡി ഹാജരാക്കണമെന്ന് ആവശ്യപ്പെട്ടെങ്കിലും നൽകാൻ കോളേജ് അധികൃര്‍ തയ്യാറായില്ല. ഇവിടെ പരീക്ഷയെഴുതിയ 150 വിദ്യാര്‍ഥികളുടെ ഫലം തടഞ്ഞിട്ടുണ്ട്.

തൊടുപുഴയിലെ അൽ അസര്‍ മെഡിക്കൽ കോളേജിലും സമാന സ്ഥിതി ആയിരുന്നെങ്കിലും കോളേജ് അധികൃതര്‍ ശരിയായ സിഡി പിന്നീട് ഹാജരാക്കി. സിഡി പരിശോധിച്ചതിൻ്റെ അടിസ്ഥാനത്തിൽ കോളേജിലെ 7 വിദ്യാര്‍ഥികളുടെ പരീക്ഷാഫലം തടഞ്ഞിട്ടുണ്ട്. ഇതിനു പുറമേ, മഞ്ചേരിയിലെ 10 വിദ്യാര്‍ഥികളുടേയും ആലപ്പുഴയിലെ 8 പേരുടേയും തൃശൂരിലെ 3 പേരുടേയും പരിയാരത്തെ ഒരാളുടേയും പരീക്ഷാഫലം സര്‍വകലാശാല പുറത്തുവിട്ടിട്ടില്ല.