കൊറോണ വൈറസ് പടര്‍ന്നു പിടിക്കുന്ന പശ്ചാത്തലത്തിൽ മാറ്റിവെച്ച പരീക്ഷകൾ ഈ മാസം 22 മുതൽ സിബിഎസ്ഇ നടത്തുമെന്ന രീതിയിൽ പ്രചരിച്ചത് വ്യാജ സര്‍ക്കുലര്‍. മാറ്റിവെച്ച പരീക്ഷകൾ കൃത്യമായി എന്ന് നടത്തുമെന്ന വിജ്ഞാപനങ്ങളൊന്നും ഇതുവരെ പ്രസിദ്ധീകരിച്ചിട്ടില്ലെന്നും സിബിഎസ്ഇ അറിയിച്ചു.

വാട്ട്സാപ്പ് പോലുള്ള സോഷ്യൽ മീഡിയകളിൽ പ്രചരിക്കുന്ന വ്യാജസര്‍ക്കുലറിൽ ഏപ്രിൽ 22 മുതൽ പരീക്ഷ നടത്തുമെന്നായിരുന്നു കാണിച്ചത്. ഏപ്രിൽ 25ന് മൂല്യനിര്‍ണയം ആരംഭിക്കുമെന്നും. വിദ്യാര്‍ഥികൾക്ക് നേരത്തെ അനുവദിച്ച പരീക്ഷാ കേന്ദ്രങ്ങൾക്ക് മാറ്റമുണ്ടാകില്ലെന്നും പുതിയ അഡ്മിറ്റ് കാര്‍ഡ് നൽകില്ലെന്നും വ്യാജസര്‍ക്കുലറിൽ പറയുന്നുണ്ട്. എന്നാൽ, ഇത്തരത്തിൽ പ്രചരിക്കുന്ന ഔദ്യോഗിക സര്‍ക്കുലറിൽ സിബിഎസ്ഇയുടെ സീൽ ഇല്ലെന്നത് ശ്രദ്ധേയമാണ്. ഏപ്രിൽ 1ന് പ്രസിദ്ധീകരിച്ചെന്ന രീതിയിലാണ് സന്ദേശം പ്രചരിച്ചത്.

അതേസമയം, കൊറോണ വൈറസ് വ്യാപനത്തെ തുടര്‍ന്ന് നീട്ടിവെച്ച സിബിഎസ്ഇ 10, 12 ക്ലാസുകളില ബോര്‍ഡ് പരീക്ഷകൾ മേയിൽ പൂര്‍ത്തിയാക്കി ജൂണിൽ ഫലം പ്രഖ്യാപിക്കാനാകുമെന്ന് പ്രതീക്ഷിക്കുന്നതായി കേന്ദ്ര ഉന്നതവിദ്യാഭ്യാസ സെക്രട്ടറി അമിത് ഖാരെ ഇന്നലെ അറിയിച്ചിരുന്നു. പന്ത്രണ്ടാം ക്ലാസിൻ്റെ ബിസിനസ് സ്റ്റഡീസ്, ജ്യോഗ്രഫി, കമ്പ്യൂട്ടര്‍ സയൻസ്, ഹിന്ദി, ഹോം സയൻസ്, സോഷ്യോളജി തുടങ്ങിയ പ്രധാന വിഷയങ്ങളുടെ പരീക്ഷകളാണ് ഇനി നടക്കാനുള്ളത്. ഏതെങ്കിലും സാഹചര്യത്തിൽ അടച്ചിടൽ ഏപ്രിൽ 14 കഴിഞ്ഞും നീണ്ടാൽ പന്ത്രണ്ടാം ക്ലാസിൻ്റെ ശേഷിക്കുന്ന പരീക്ഷകൾ അടച്ചിടൽ കാലയളവിൽത്തന്നെ നടത്തുന്നതിനെക്കുറിച്ച് സര്‍ക്കാര്‍ ആലോചിക്കുന്നുണ്ടെന്നും ഉന്നതവിദ്യാഭ്യാസ സെക്രട്ടറി വ്യക്തമാക്കിയിരുന്നു.

അവധിക്കാലം വ്യത്യസ്തമാക്കി 5 വയസ്സുകാരി; "മണിക്കുട്ടീസ് വേൾഡ്" സൂപ്പ‍ര്‍ ഹിറ്റ്

കേന്ദ്രീയ വിദ്യാലയം, സിബിഎസ്ഇ സ്കൂളുകൾ, സെൻട്രൽ ടിബറ്റൻ സ്കൂളുകൾ എന്നിവയിൽ ഓൺലൈൻ പഠനം ആരംഭിക്കുകയാണ്. ഇതിനായി നാഷണൽ ഇൻസ്റ്റിറ്റ്യൂട്ട് ഓഫ് ഓപ്പൺ സ്കൂളിനോട് ക്ലാസടിസ്ഥാനത്തിലും വിഷയാടിസ്ഥാനത്തിലും പഠന മൊഡ്യൂൾ തയ്യാറാക്കാൻ നിര്‍ദേശിച്ചിട്ടുണ്ട്. എൻഐഒഎസ് സ്വന്തംനിലക്ക് ചാനലുകളിലൂടെ പാഠഭാഗങ്ങൾ സംപ്രേഷണവും ചെയ്യുന്നുണ്ട്. റേഡിയോയിലൂടെയും പ്രക്ഷേപണം നടത്താൻ എൻഐഒഎസിനോട് നിര്‍ദേശിച്ചിട്ടുണ്ട്.