ലോകം ഓൺലൈൻ പഠനത്തിൻ്റെ വഴിയേ മുന്നേറുമ്പോൾ നിങ്ങൾ എവിടെയാണ്. സ്വയം മൂകിനെക്കുറിച്ച് കേൾക്കാത്തവര്‍ ഇനിയുമുണ്ടോ. കൊറോണ വൈറസിൽ നിന്ന് രക്ഷ തേടുന്നതിൻ്റെ ഭാഗമായി രാജ്യം മുഴുവൻ ലോക്ഡൗൺ പ്രഖ്യാപിച്ചിരിക്കുമ്പോൾ ഇത് ഫലപ്രദമായി ഉപയോഗിക്കുകയാണ് പുതുതലമുറ.

ഓൺലൈനായി പുസ്തകങ്ങൾ വായിച്ചും കോഴ്സുകൾ ചെയ്തുമാണ് പുതുതലമുറ ലോക്ഡൗൺ കാലം ഉപയോഗപ്പെടുത്തുന്നത്. മേൽപ്പറഞ്ഞ സംഭവം എന്താണെന്നാണോ ചിന്തിക്കുന്നത്. കാര്യം ഇത്രേ ഉള്ളൂ..കേന്ദ്ര സര്‍ക്കാരിൻ്റെ ഔൺലൈൻ സ്റ്റഡി പ്ലാറ്റ്ഫോമാണ് സ്വയം മൂക്. Study Webs of Active Learning for Young Aspiring Minds എന്നാണ് മുഴുവൻ പേര്. നേരത്തെ തൊട്ട് സജീവമാണെങ്കിലും ലോക്ഡൗൺ തുടങ്ങിയതോടെ ഓരോ ദിവസവും നിരവധി പേരാണ് വെബ്സൈറ്റിൽ രജിസ്റ്റര്‍ ചെയ്യുന്നത്.

അതേസമയം, സൗജന്യ ഓൺലൈൻ കോഴ്സ് ലഭ്യമാക്കുന്നതുക്കൊണ്ട് കൂടിയാണ് പഠിതാക്കളുടെ എണ്ണം കൂടിയതെന്ന് കേന്ദ്ര മാനവവിഭവ മന്ത്രാലയം വ്യക്തമാക്കി. ലോകത്തെ 60 രാജ്യങ്ങളിൽ നിന്നുള്ളവര്‍ക്ക് 1900 കോഴ്സുകൾ സ്വയം വഴി പഠിക്കാം. ഇതിലെ കോഴ്സുകൾക്ക് ഇന്ത്യയിൽ എവിടെയും അംഗീകാരമുണ്ട്. ഓരോ സ്വയം കോഴ്സിലും വിവിധ മോഡ്യൂളുകളുണ്ടാകും. എത്ര മോഡ്യൂളെന്നത് കോഴ്സിൻ്റെ ക്രഡിറ്റ് അനുസരിച്ചിരിക്കും. 15 ആഴ്ചയാണ് മിക്ക കോഴ്സുകളുടേയും ദൈര്‍ഘ്യം. അനുബന്ധ അധ്യായനക്കുറിപ്പുകൾ, ഗൃഹപാഠങ്ങൾ എന്നിവ ഉണ്ടാവും. മാര്‍ക്കില്ലാത്ത പരീക്ഷകളും മാര്‍ക്കുള്ള പരീക്ഷകളും സ്വയം കോഴ്സിൻ്റെ പ്രത്യേകതയാണ്.

'ലിറ്റിൽ കൈറ്റ്സ്' വിദ്യാര്‍ഥികൾക്ക് ഗ്രേസ് മാര്‍ക്ക്

ഒൻപതാം ക്ലാസ് മുതൽ ബിരുദാനന്തര ബിരുദം പഠിക്കുന്നവര്‍ക്ക് വരെയുള്ള കോഴ്സുകൾ സ്വയം പ്ലാറ്റ്ഫോമിലുണ്ട്. ഇതിനു പുറമേ, ദിക്ഷ, ഇ-പാഠശാല, എൻആര്‍ഒഇആര്‍, എൻഐഒഎസ് തുടങ്ങി നിരവധി സ്ഥാപനങ്ങൾ നടത്തുന്ന ഓൺലൈൻ കോഴ്സുകളിലും പഠിതാക്കളുടെ എണ്ണം കൂടിയതായി റിപ്പോര്‍ട്ടുകൾ സൂചിപ്പിക്കുന്നു.