നേതാജിയുടെ 125ാം ജന്മവാര്‍ഷികം: വിവിധ പരിപാടികള്‍ സംഘടിപ്പിക്കാൻ കോളേജുകൾക്ക് യു.ജി.സിയുടെ നിർദേശം

നേതാജി സുഭാഷ് ചന്ദ്ര ബോസിന്റെ 125ാം ജന്മവാര്‍ഷികം ആഘോഷിക്കുന്നതിന്റെ ഭാഗമായി കോളേജുകളിലും സര്‍വകലാശാലകളിലും വിവിധയിനം പരിപാടികള്‍ സംഘടിപ്പിക്കാന്‍ യു.ജി.സി നിര്‍ദേശം. ഓണ്‍ലൈന്‍ ലെക്ചറുകള്‍, വെബിനാര്‍ എന്നിവയും സൈക്ലതോണ്‍, യോഗതോണ്‍, പെയിന്റിങ്, വെര്‍ച്വല്‍ പോസ്റ്റര്‍ നിര്‍മ്മാണ മത്സരം തുടങ്ങിയ കായിക ഇനങ്ങളും സംഘടിപ്പിക്കാനാണ് യു.ജി.സി നിര്‍ദേശിച്ചിട്ടുള്ളത്.

ജനുവരി 23നാണ് സുഭാഷ് ചന്ദ്ര ബോസിന്റെ ജന്മദിനം. ഈ ദിനം പരാക്രം ദിവസ് ആയി ആചരിക്കാന്‍ കഴിഞ്ഞ ദിവസം കേന്ദ്ര സര്‍ക്കാര്‍ തീരുമാനിച്ചിരുന്നു. അദ്ദേഹത്തോടുള്ള ആദരസൂചകമായാണ് തീരുമാനം.

രാജ്യത്തിനായുള്ള നേതാജിയുടെ നിസ്വാര്‍ത്ഥ സേവനത്തെ ബഹുമാനിക്കുന്നതിനും ഓര്‍മിക്കുന്നതിനുമായി കൊവിഡ് സുരക്ഷാ മാനദണ്ഡങ്ങള്‍ പാലിച്ച് 2021 ജനുവരി 23 ന് നിരവധി പ്രവര്‍ത്തനങ്ങള്‍ സംഘടിപ്പിച്ച് സര്‍വകലാശാലകളും കോളേജുകളും ഈ അവസരത്തില്‍ അനുസ്മരിക്കണമെന്ന് അഭ്യര്‍ത്ഥിക്കുന്നു- ചാന്‍സലര്‍മാര്‍ക്കും പ്രിന്‍സിപ്പല്‍മാര്‍ക്കും അയച്ച കത്തില്‍ യു.ജി.സി പറയുന്നു.

പോളിടെക്നിക് കോളേജുകളില്‍ പാര്‍ട്ട് ടൈമായി ഡിപ്ലോമ കോഴ്സ് പഠിക്കാം; അപേക്ഷ ക്ഷണിച്ചു
വിദ്യാര്‍ത്ഥികള്‍ക്കായി കേന്ദ്ര വിദ്യാഭ്യാസ മന്ത്രാലയം മത്സരവും സജ്ജീകരിച്ചിട്ടുണ്ട്. വിദ്യാര്‍ത്ഥികള്‍ക്ക് നേതാജിയുമായി ബന്ധപ്പെട്ട വീഡിയോകള്‍ തയ്യാറാക്കി മന്ത്രാലയത്തിന്റെ ട്വിറ്റര്‍ പേജിലും ഫേസ്ബുക്ക് പേജിലും ഷെയര്‍ ചെയ്യാം. വീഡിയോ പോസ്റ്റ് ചെയ്യുമ്പോള്‍ കേന്ദ്ര വിദ്യാഭ്യാസ മന്ത്രി രമേശ് പൊഖ്രിയാലിനും ടാഗ് ചെയ്യണം. കൂടാതെ #MyInspirationBoseji, #MeriPrernaBoseji എന്നീ ഹാഷ്ടാഗുകളും ചേര്‍ക്കാം.