പുതിയ അധ്യയന വർഷത്തിന് ഇന്ന് തുടക്കം

വേനലവധി കഴിഞ്ഞ് വിദ്യാർഥികൾ സ്കൂളിലേക്ക്. പുതിയ അധ്യയന വര്‍ഷം ഇന്നു തുടങ്ങുന്നു. സംസ്ഥാനത്തു മൂന്നു ലക്ഷത്തോളം വിദ്യാര്‍ഥികളാണ് ഒന്നാം ക്ലാസില്‍ പുതുതായി എത്തുന്നത്. ഇവരെ സ്വീകരിക്കാന്‍ സംസ്ഥാനതലം മുതല്‍ സ്കൂള്‍തലം വരെ പ്രവേശനോത്സവങ്ങള്‍ സംഘടിപ്പിച്ചിട്ടുണ്ട്.



കുട്ടികൾക്കായി വൈവിധ്യമായ കാഴചകളാണ് ഓരോ വിദ്യാലയങ്ങളും ഒരുക്കിയിരിക്കുന്നത്. പ്രവേശനോത്സവ ഗാനം ആലപിച്ചാണു നവാഗതരെ എതിരേല്‍ക്കുക. പ്രവേശനോത്സവത്തിന്റെ സംസ്ഥാനതല ഉദ്ഘാടനം തിരുവനന്തപുരം പട്ടം ഗവ. മോഡല്‍ ഗേള്‍സ് ഹയര്‍സെക്കന്‍ഡറി സ്കൂളില്‍ 9.30നു മുഖ്യമന്ത്രി പിണറായി വിജയന്‍ നിര്‍വഹിക്കും.


പുതിയ വിദ്യാലയ വര്‍ഷത്തില്‍ എല്ലാ വിദ്യാര്‍ഥികള്‍ക്കും മുഖ്യമന്ത്രി പിണറായി വിജയന്‍ ആശംസ നേര്‍ന്നു. ആഹ്ലാദകരവും സമാധാനപൂര്‍ണവും നല്ല പഠനാന്തരീക്ഷം ലഭിക്കുന്നതുമായ വിദ്യാലയവര്‍ഷം ഒരുക്കാന്‍ സര്‍ക്കാര്‍ പ്രതിജ്ഞാബദ്ധമാണെന്നും മുഖ്യമന്ത്രി പറഞ്ഞു.



വിദ്യാര്‍ഥികളുടെ സുരക്ഷ ഉറപ്പാക്കാന്‍ എല്ലാ നടപടികളും സ്വീകരിച്ചുവെന്ന് ഉറപ്പുവരുത്തണമെന്നു പൊലീസിനും മോട്ടോര്‍ വാഹനവകുപ്പിനും നിര്‍ദേശം നല്‍കി. വിദ്യാലയ പരിസരങ്ങളില്‍ ലഹരിമരുന്നു വില്‍പന, ഉപഭോഗം, കൈമാറ്റം എന്നിവ ഇല്ലാതാക്കാന്‍ കര്‍ശന പൊലീസ് നിരീക്ഷണം വേണമെന്നും മുഖ്യമന്ത്രി നിര്‍ദേശിച്ചു.