കൊവിഡ് കാലത്തെ പഠനം: മടുപ്പില്ലാതെ പഠിക്കാൻ ഈ സൂത്രങ്ങൾ പ്രയോഗിക്കാം

ക്ലാസ്റൂമുകളിലിരുന്ന് പഠിക്കുന്ന രീതിയിൽ നിന്ന് മാറി പൂർണായും വീടിനുള്ളിൽ പഠന സമയം ചെലവഴിക്കേണ്ട സാഹചര്യം വരുമ്പോൾ ആദ്യം പഠിക്കാനുള്ള അന്തരീക്ഷം സൃഷ്ടിക്കുകയാണ് വേണ്ടത്. നിങ്ങൾക്ക് സൗകര്യമുള്ള രീതിയിൽ ഇത് ക്രമീകരിക്കാം. ചിലർക്ക് മുറിക്കുള്ളിലിരുന്ന് പഠിക്കാനാണ് താൽപ്പര്യമെങ്കിൽ മറ്റ് ചില കൂട്ടർ‍ക്ക് ഉദ്യോനം പോലെ തുറസായ സ്ഥലാമായിരിക്കും താൽപ്പര്യം. എന്തൊക്കെയായാലും വലിയ ബഹളമൊന്നുമില്ലാത്ത വൃത്തിയായ ഒരു സ്ഥലം തെര‍ഞ്ഞെടുക്കാം.

സ്കൂളുകളിലും കോളേജുകളിലും പഠിക്കുമ്പോൾ നിരന്തരം വിദ്യാർത്ഥികളും അധ്യാപകരുമായി സമ്പർക്കത്തിൽ ഏർപ്പെടാൻ കഴിയുന്നു. എന്നാൽ വീട്ടിലിരുന്നുള്ള പഠനത്തിൽ ഇതൊന്നും നടക്കില്ല. വിരസത ഒഴിവാക്കാനായി ഓൺലൈനായി അവരുമായി ചർച്ചകൾ നടത്താൻ ശ്രമിക്കാം. ഇതിന് പുറമെ വീട്ടിലുള്ളവരുമായി സംസാരിക്കാനും സമയം കണ്ടെത്തുക. നിങ്ങൾ നേരിടുന്ന പ്രശ്നങ്ങൾ അവരുമായി പങ്കുവയ്ക്കാം.

Also Read: സംസ്ഥാനത്തെ ടെക്‌നിക്കൽ ഹൈസ്‌കൂളുകളിലേക്കുള്ള എട്ടാം ക്ലാസ് പ്രവേശന പരീക്ഷ നടത്തും

അധ്യാപകർ മുഴുവൻ സമയവും ക്ലാസുകളുമായി ഓൺലൈനിൽ നിങ്ങൾക്കു മുന്നിലുണ്ടെങ്കിലും നിങ്ങൾ നേരിടുന്ന ബുദ്ധിമുട്ടുകൾ പരിഹരിക്കാനും അവർ സമയം കണ്ടെത്തും. ഏതെങ്കിലും വിഷയത്തിൽ സംശയമുണ്ടെങ്കിൽ അവരുമായി സംസാരിച്ച് ആ സംശയം തീർത്ത് മുന്നോട്ട് പോകാം. വിദ്യാർത്ഥികൾ നേരിടുന്ന മാനസിക പിരിമുറുക്കത്തിന് അവർക്കും പരിഹാരം കണ്ടെത്താൻ കഴിഞ്ഞേക്കും.

നാലു ചുവരുകൾക്ക് നടുവിൽ മണിക്കൂറുകൾ ലാപ്ടോപ്പിന് മുന്നിലോ മൊബൈലിന് മുന്നിലോ ഇരിക്കുമ്പോൾ ആരോഗ്യം മോശമായേക്കാം. പോഷകസമൃദ്ധമായ ഭക്ഷണവും ഒപ്പം വ്യായാമവും ചെയ്യാൻ ശ്രദ്ധിക്കുക. വ്യായാമം ചെയ്യാനായി രാവിലെയോ വൈകുന്നേരമോ അൽപ്പം സമയം മാറ്റിവെക്കുക.

Also Read: പ്ലസ്ടു ക്ലാസുകൾ ഇന്നു മുതൽ; ഫസ്റ്റ്ബെൽ 2.0 കൈറ്റ് വിക്ടേഴ്സ് ആപ്പിൽ

മണിക്കൂറുകൾ നീണ്ട പഠനം വിരസത സൃഷ്ടിച്ചേക്കും. ഇത് ഒഴിവാക്കാൻ അടിക്കടി ഇടവേള എടുക്കുന്നത് നല്ലതായിരിക്കും. നിങ്ങൾക്കിഷ്ടപ്പെട്ട ഏതെങ്കിലും ഒരു വിനോദത്തിൽ ഏർപ്പെടാം. അൽപ്പം നേരം മയങ്ങുന്നതും നല്ലതായിരിക്കും.