പഠിക്കുമ്പോള് ഉറക്കം വരുന്നുവോ? ഈ സൂത്ര വിദ്യകള് പ്രയോഗിച്ചു നോക്കൂ
നിര്ണ്ണായകമായ സമയങ്ങളില് ഉറക്കമെന്ന വില്ലന് അലട്ടിയാല് പഠനത്തെ അത് സാരമായി ബാധിക്കുന്നു. ഈ സമയങ്ങളില് ഉറക്കത്തെ മാറ്റി നിര്ത്താന് ചില സൂത്ര വിദ്യകള് പ്രയോഗിക്കാം.
നല്ല അന്തരീക്ഷം സൃഷ്ടിക്കുക
പഠനമുറിയില് നല്ല പ്രകാശമുണ്ടെന്ന് ഉറപ്പു വരുത്തുക. പകല് ആണെങ്കില് ജനാലകള് തുറന്നിട്ട് സൂര്യപ്രകാശം കടക്കാന് അനുവദിക്കാം. രാത്രിയില് നല്ല വെളിച്ചമുള്ള ലൈറ്റുകള് ക്രമീകരിക്കുക. ടേബിള് ലാമ്പ് ഉള്പ്പടെയുള്ളവ ഉപയോഗിച്ച് പഠിക്കുന്നവരുണ്ട്. എന്നാല് ഇത് ഉറക്കം വരാനുള്ള സാധ്യത വര്ദ്ധിപ്പിച്ചേക്കാം. മുറിയില് മുഴുവനും പ്രകാശമെത്തുന്ന തരത്തില് ക്രമീകരിച്ചാല് ഉറക്കം വരാനുള്ള സാധ്യത കുറയും.
നട്ടെല്ല് നിവര്ന്ന്
മണിക്കൂറുകള് നീണ്ട പഠനമാണെങ്കില് നട്ടെല്ലിന് താങ്ങ് ലഭിക്കുന്ന കസേരയില് ഇരിക്കുന്നതാകും നല്ലത്. അതിന് തക്കതായ ഒരു മേശയും ഉപയോഗിക്കുക. ഇത് നിവര്ന്ന് ഇരുന്നുള്ള പഠനത്തിന് സഹായിക്കും. കട്ടിലില് കിടന്നും മറ്റും പഠിക്കുന്നവരെ ധാരാളം കാണാം. എന്നാല് ഒരു സമയം കഴിഞ്ഞാല് തളര്ച്ച അനുഭവപ്പെടാം. പതിയെ ഉറക്കത്തിലേക്ക് കടക്കുകയും ചെയ്യും. കസേരയില് ഇരിക്കുമ്പോളും കൃത്യമായ ഇടവേളകളില് നിങ്ങളുടെ ശരീര ഭാഗങ്ങള് ഇളക്കാനും ശ്രമിക്കുക.
അമിത ഭക്ഷണം വേണ്ട
പരീക്ഷ അടുക്കുമ്പോള് നീണ്ട സമയം പഠനത്തിനായി മാറ്റിവെക്കാറുണ്ട്. ഈ സമയങ്ങളില് പഠിക്കാനിരിക്കുന്നതിന് മുമ്പ് അമിതമായി ഭക്ഷണം കഴിക്കാതിരിക്കുക. ഭക്ഷണം കൂടുമ്പോള് ഉറക്കം വരാനുള്ള സാധ്യതയും കൂടും. എന്നാല് അതിന് ഭക്ഷണം തീരെ കഴിക്കാതെയിരുന്നാലും ദോഷമാണ്. മിതമായ രീതിയില് ഭക്ഷണം ക്രമീകരിച്ച് കഴിക്കാം. രാത്രി വൈകി ഇരുന്ന് പഠിക്കുമ്പോഴാണ് ഇക്കാര്യം കൂടുതല് ശ്രദ്ധിക്കേണ്ടത്.
വെള്ളം കുടിക്കാം
ഉറക്കം വരാതിരിക്കാന് ഉപയോഗിക്കാവുന്ന ഒരു സൂത്രവിദ്യ കൂടിയാണ് ധാരാളം വെള്ളം കുടിക്കുക എന്നത്. ശരീരത്തെയും തലച്ചോറിനെയും ഹൈഡ്രേറ്റ് ചെയ്ത് നിര്ത്താന് ഇത് സഹായിക്കും.
ഉച്ചത്തില് വായിക്കാം
ഉച്ചത്തില് വായിച്ചു പഠിക്കുക എന്നതാണ് ഉറക്കത്തെ അകറ്റി നിര്ത്താന് പറ്റിയ മറ്റൊരു മാര്ഗം. നിങ്ങള് നിങ്ങളുടെ ശബ്ദം തന്നെ തന്നെ കേട്ട് പഠിക്കുന്നു. ടീച്ചര് പഠിപ്പിച്ചു തരുന്ന അതേ ശൈലിയില് നിങ്ങള് വായിക്കുക. ഇത്തരത്തിലുള്ള പഠനം ബോറടിപ്പിക്കില്ല. പഠിക്കുന്ന ഭാഗങ്ങള് എളുപ്പത്തില് മറക്കുകയുമില്ല.
Also Read: ഇന്സ്റ്റിറ്റ്യൂട്ട് ഓഫ് ഫാഷന് ഡിസൈനിങ് പ്രവേശനം
എഴുതി പഠിക്കാം
വായിച്ചു പഠിക്കുമ്പോഴും കൈയില് ഒരു പേപ്പറും പേനയും കരുതാന് ശ്രദ്ധിക്കുക. വായിക്കുന്ന ഭാഗങ്ങള് അടിക്കടി കുറിച്ചിടാം. ഇത് ഉറക്കം വരാതിരിക്കാനും കാര്യങ്ങള് എളുപ്പത്തില് മനസ്സിലാക്കാനും സഹായിക്കുന്നു.
Also Read: സ്കോള്-കേരള: ഏതു പ്രായക്കാര്ക്കും പ്ലസ് വണ്ണിന് ചേരാം
കട്ടിയുള്ള ഭാഗങ്ങള്
രാത്രിയില് പഠിക്കാനിരിക്കുമ്പോള് താരതമ്യേന എളുപ്പമുള്ള ടോപ്പിക്കുകള് തെരഞ്ഞെടുക്കുക. പലര്ക്കും പല ടോപ്പിക്കായിരിക്കും താല്പ്പര്യം. അത് സ്വയം മനസ്സിലാക്കി രാത്രിയില് പഠിക്കാനായി തെരഞ്ഞെടുക്കുക.