പഠിക്കാനും പഠിക്കണോ...?

പഠിക്കാനും പഠിക്കണോ എന്ന് ചോദിച്ചാൽ നിങ്ങളുടെ ഉത്തരം എന്തായിരിക്കും. പഠിച്ചല്ലേ പറ്റൂ, പരീക്ഷ അടുത്തു, ടെൻഷനാണ് എന്നൊക്കെയാവും ഭൂരിഭാഗം ആളുകളുടേയും മറുപടി. പഠന കാലയളവിൽ പഠനത്തിന് പ്രാധാന്യം നൽകുക എന്നതാണ് ഏറ്റവും പ്രധാനം.

സമയത്തിൻ്റെ പ്രാധാന്യം തിരിച്ചറിഞ്ഞ് പഠനം എങ്ങനെ ആസൂത്രണം ചെയ്യാം എന്ന് നോക്കാം;

ലക്ഷ്യം

എന്ത് പഠിക്കണം, എന്തിന് പഠിക്കണം, എങ്ങനെ പഠിക്കണം എന്ന് തുടങ്ങി തുടക്കം മുതലേ ഓരോ കാര്യത്തിനും കൃത്യമായി ലക്ഷ്യം വേണം. ഓരോരുത്തരുടേയും ലക്ഷ്യം പലതാണ്. മറ്റുള്ളവരുടെ ലക്ഷ്യങ്ങൾക്ക് പിന്നാലെ പോവാതെ സ്വന്തം ലക്ഷ്യങ്ങളിൽ ശ്രദ്ദ കേന്ദ്രീകരിക്കാൻ എപ്പോഴും ശ്രദ്ധിക്കണം.

പ്ലാനിങ്

എപ്പോൾ പഠിക്കണം, വിശ്രമിക്കണം, എത്ര മണിക്കൂർ പഠിക്കണം തുടങ്ങി ഓരോ ചെറിയ കാര്യങ്ങളും ഉൾപ്പെടുത്തി ടൈംടേബിൾ ഉണ്ടാക്കുന്നത് പഠനത്തിൽ സഹായിക്കും. പഠന സമയം കൃത്യമായി ആസൂത്രണം ചെയ്യുന്നതോടെ ഓരോ മിനിറ്റും വേണ്ടവിധം ഉപയോഗിക്കാൻ കുട്ടികൾക്കും മുതിർന്നവർക്കും സാധിക്കും.

വിശ്രമം

പഠനത്തിനോടൊപ്പം വിശ്രമവേളകളും അനിവാര്യമാണെന്ന് പ്രത്യേകം എടുത്ത് പറയേണ്ടതില്ലല്ലോ. ഓരോ 45 മണിക്കൂർ കഴിയുമ്പോഴും 5 മുതൽ 10 മിനിറ്റ് വരെ റെസ്റ്റ് എടുക്കുന്നതാണ് അഭികാമ്യം. ഇത് മനസ്സിനെ ആനന്ദകരമാക്കാൻ സഹായിക്കും.

പഠന സ്ഥലം

നട്ടെല്ല് നിവർത്തിയിരുന്നുള്ള പഠനം ഏകാഗ്രത കൈക്കൊള്ളാൻ സഹായിക്കും. മാത്രമല്ല, പച്ച പെയിൻ്റടിച്ച മുറി, നിശബ്ദദ എന്നിവയും ഏകാഗ്രത കൈവരിക്കാൻ സഹായിക്കും.

ഒരുമിച്ചുള്ള പഠനം

ചില സമയങ്ങളിൽ കൂട്ടുകാരുമൊത്തുള്ള പഠനം ഒറ്റയ്ക്കുള്ള പഠനത്തേക്കാൾ സഹായിക്കും. എന്നാൽ, കൂട്ടുകാരെയും സ്റ്റഡി ഗ്രൂപ്പുകളേയും തിരഞ്ഞെടുക്കുമ്പോൾ പ്രത്യേകം ശ്രദ്ദിക്കണം.

ബി പോസിറ്റീവ്

എന്ത് പ്രശ്നങ്ങൾ വന്നാലും അതിനെ പോസിറ്റീവ് ആയി അഭിമുഖീകരിക്കുക എന്നതാണ് ഏറ്റവും പ്രധാനം. ഇനി അത് പരീക്ഷയിൽ മാർക്ക് കുറഞ്ഞതാണെങ്കിലും. പോയ മാർക്കിനെ കുറിച്ചോർത്ത് ദുഖിക്കുന്നതിലും നല്ലത് അടുത്ത പരീക്ഷയ്ക്ക് മുൻപേ തെറ്റുകൾ കണ്ടെത്തി അത് തിരുത്തുന്നതല്ലേ. മാത്രമല്ല, എപ്പോഴും എന്തിനും നെഗറ്റീവ് പറയുന്നവരെ ഒരുകാരണവശാലും കൂടെ കൂട്ടിയേക്കരുത്.

നല്ല ഭക്ഷണം

പഠിക്കുന്നതിനു മുമ്പ് തന്നെ ഭക്ഷണം കഴിക്കുന്നതാണ് നല്ലത്. എന്നാൽ വയറു നിറച്ച് കഴിച്ച് ഉറക്കം വരാതിരിക്കാൻ പ്രത്യേകം ശ്രദ്ധിക്കണം. ഫ്രൂട്ട്സ്, വൈറ്റമിൻസ്, വെള്ളം എന്നിവ ധാരാളം കഴിക്കാനും ശ്രദ്ദിക്കണം.

സ്വയം പരിശീലനം

ഓരോ ഭാഗവും പഠിച്ച് കഴിഞ്ഞ് സ്വന്തമായി അനാലിസിസ് നടത്തുന്നത് വളരെ നല്ലതാണ്. അവിടെ ചോദ്യമിടുന്നതും ഉത്തരം എഴുതുന്നതും പേപ്പർ നോക്കുന്നതും നിങ്ങൾ തന്നെയാവും. സ്വന്തം തെറ്റുകൾ സ്വയം കണ്ടെത്തി മുന്നോട്ട് പോവാൻ ഇത് സഹായിക്കും.

എങ്ങനെ വായിക്കണം

ഓരോ പാഠഭാഗങ്ങളും മനസ്സിരുത്തിവേണം വായിക്കാൻ. നോട്ട് ചെയ്യേണ്ട ഭാഗങ്ങൾ അപ്പോൾ തന്നെ കുറിച്ചിടാനും അർഥം മനസ്സിലാവത്തയുടെ അർഥം അപ്പപ്പോൾ തന്നെ കണ്ടെത്തി പോവുന്നതുമാണ് മനസ്സിരുത്തിയുള്ള വായന. നിങ്ങൾ നിങ്ങൾക്ക് വേണ്ടിയാണ് വായിക്കുന്നത് എന്ന് എപ്പോഴും ഓർമ്മ വേണം.

റിവ്യു

പഠിച്ച ഭാഗങ്ങൾ വിണ്ടും വീണ്ടും പഠിക്കുക, സംശയമുള്ള ഭാഗങ്ങൾ അറിയാവുന്നവരോട് ചോദിച്ച് മനസ്സിലാക്കുക, മറന്നു പോകുന്ന ഭാഗങ്ങൾ ആവർത്തിച്ച് വായിക്കുക എന്നിവയാണ് റിവ്യു ഭാഗത്ത് വരുന്നത്.