കെ.എ.എസ് പരീക്ഷക്ക് ഇനി ദിവസങ്ങൾ മാത്രം. പി.എസ്.സിയുടെ സാധാരണ പരീക്ഷകളോടുള്ള സമീപനമല്ല കെ.എ.എസിനോട് വേണ്ടതെന്ന് എടുത്ത് പറയേണ്ടതില്ലല്ലോ. ഫെബ്രുവരി 22നാണ് പ്രാഥമിക പരീക്ഷ.

ജനറൽ സ്റ്റഡീസിൻ്റെ രണ്ട് പേപ്പറുകളാണ് പരീക്ഷക്ക് ഉള്ളത്. റീസണിങ്, ലഘുഗണിതം, ഭാഷാ പരിജ്ഞാനം എന്നിവയിൽ നിന്നൊക്കെ ചോദ്യങ്ങളുണ്ടാവും. പ്രാദേശിക ഭാഷക്ക് പ്രത്യേക വിഭാഗം തന്നെയുണ്ട്. മാതൃഭാഷക്ക് 30 മാര്‍ക്കും ഇംഗ്ലീഷിന് 20 മാര്‍ക്കുമാണ്.

പരീക്ഷാ സമയം നോക്കുകയാണെങ്കിൽ നൂറ് ചോദ്യങ്ങൾക്ക് 90 മിനിറ്റിൽ ഉത്തരം കണ്ടെത്തണം. ഒരു ചോദ്യത്തിന് ഒരു മിനിറ്റ് പോലും ലഭിക്കില്ലെന്ന് സാരം. അതിനാൽ പരീക്ഷാ ഹാളിനുള്ളിൽ സമയ നിയന്ത്രണം കൃത്യമായി പാലക്കണം. ചോദ്യം വായിച്ച് മനസിലാക്കുന്നതും ഉത്തരം കണ്ടെത്തുന്നതും അത് അടയാളപ്പെടുത്തുന്നതൊക്കെ ഈ സമയ ക്രമീകരണത്തിൽ വരണം. ചോദ്യം മുഴുവൻ വിശദമായി വായിച്ച ശേഷം പിന്നെ ഉത്തരം എഴുതാം എന്ന് ചിന്തിക്കരുത്. വേഗം ചോദ്യം വായിച്ച് ഉറപ്പുള്ള ഉത്തരം ആദ്യമാദ്യം അടയാളപ്പെടുത്തുന്നതാണ് നല്ലത്. സംശയമുള്ള ഉത്തരങ്ങൾക്ക് ബുദ്ധിപരമായി ഊഹിച്ച് ഉത്തരം നൽകുന്നതിൽ തെറ്റില്ല.

പ്രാഥമിക പരീക്ഷയിൽ മലയാളം, ഇംഗ്ലീഷ് വിഭാഗങ്ങൾക്ക് പൂര്‍ണമായി ഉത്തരം കണ്ടെത്താൻ സാധിച്ചാൽ വിജയ സാധ്യത ഉയരും. ഭാഷാ ചോദ്യങ്ങൾക്ക് ഊന്നൽ നൽകി പഠിക്കുന്നതാണ് അപ്പോൾ നല്ലത്. എന്തെന്നാൽ, ജനറൽ സ്റ്റഡീസിന് മുഴുവൻ മാര്‍ക്ക് നേടുക എന്നത് വളരെ ബുദ്ധിമുട്ടേറിയ കാര്യമാണ്. യു.പി.എസ്.സിയുടെ സിവിൽ സര്‍വീസ് പരീക്ഷയിൽ പ്രാഥമിക പരീക്ഷയുടെ രണ്ടാം പേപ്പറിന് അത്ര പ്രാധാന്യം ഇല്ലെങ്കിലും കെ.എ.എസിന് രണ്ട് പേപ്പറും തുല്യമാണ്. രണ്ട് പേപ്പറിനും കൂടി ലഭിക്കുന്ന മാര്‍ക്ക് ചേര്‍ത്താണ് പ്രാഥമിക പരീക്ഷാഫലം വരുന്നത്. കെ.എ.എസിൻ്റെ കൃത്യമായ കട്ട്ഓഫ് മാര്‍ക്ക് അറിയില്ലെങ്കിലും ഏതാണ്ട് യു.പി.എസ്.സിയുടെ രീതിയിലായിരിക്കും. ചോദ്യങ്ങൾ താരതമ്യേന എളുപ്പമാണെങ്കിൽ കട്ട്ഓഫ് മാര്‍ക്ക് ഉയര്‍ന്നേക്കാം.

PSC പരീക്ഷക്ക് തയ്യാറെടുക്കുകയാണോ? ഈ വിഭാഗം പ്രധാനം

അതേസമയം, സംസ്ഥാനത്തൊട്ടാകെ രണ്ടായിരത്തോളം പരീക്ഷാ കേന്ദ്രങ്ങൾ സജ്ജമാക്കും. എല്ലാ സെൻ്ററിലും പി.എസ്.സി ഉദ്യോഗസ്ഥരെ നിയമിക്കാൻ സാധിക്കാത്തതുക്കൊണ്ട് പരീക്ഷയുടെ മേൽനോട്ടം അധ്യാപകര്‍ക്കാണ്. പോലീസ് പരീക്ഷയിലെ തട്ടിപ്പിനെ തുടര്‍ന്ന് കര്‍ശന സുരക്ഷാ വ്യവസ്ഥകളാണ് പി.എസ്.സി പ്രഖ്യാപിച്ചിരിക്കുന്നത്. എന്നാൽ, കെഎഎസ് ജൂനിയർ ടൈം സ്കെയിൽ ആയി നിയമനം ലഭിക്കുന്നവർക്ക് 10 മാസമാണ് പരിശീലനം. 15 ദിവസം കുറയാതെയുള്ള പരിശീലനമാണ് നൽകുന്നത്. 2 വർഷമാണ് പ്രൊബേഷൻ കാലാവധി. അതേസമയം, ഒന്നാം ധാരയിൽ 1,71,550 അപേക്ഷകളും രണ്ടാം ധാരയിൽ 3,146 അപേക്ഷകളും മൂന്നാം ധാരയിൽ 168 അപേക്ഷകളും അസാധുവായി. പരീക്ഷ എഴുതുമെന്ന ഉറപ്പ് പി.എസ്.സിക്ക് നൽകാത്തതിനെ തുടര്‍ന്നാണ് അപേക്ഷകൾ അസാധുവായത്. എന്നാൽ, ഭരണഘടനാ സ്ഥാപനങ്ങളായ പി.എസ്.സി, നിയമസഭ സെക്രട്ടറിയേറ്റ്, അഡ്വക്കേറ്റ് ജനറൽ ഓഫീസ് തുടങ്ങിയവയിലെ ജീവനക്കാരിൽ ചിലര്‍ രണ്ടാം ധാരയിൽ അപേക്ഷിച്ച് പരീക്ഷയെഴുതുമെന്ന് ഉറപ്പ് നൽകിയിരുന്നെങ്കിലും ഇവരുടെ അപേക്ഷകൾ പി.സ്.സി അസാധുവാക്കി.