നാഷണല് സ്കില്സ് ക്വാളിഫിക്കേഷന് ഫ്രയിംവര്ക്ക് (എന്.എസ്.ക്യൂ.എഫ്) പാഠ്യപദ്ധതി തൃശൂര് ജില്ലയിലെ മുഴുവന് വിഎച്ച്എസ്ഇ സ്കൂളുകളിലും നടപ്പിലാക്കുന്നു. ഹയര് സെക്കന്ഡറി തലത്തില് അക്കാദമിക് വിഷയങ്ങള്ക്കൊപ്പം തൊഴില് നൈപുണ്യവും ശക്തിപ്പെടുത്തുന്നത് ലക്ഷ്യമിട്ടാണ് പൊതുവിദ്യാഭ്യാസ വകുപ്പ് പദ്ധതി പ്രാവര്ത്തികമാക്കിയത്. ഇത് പ്രകാരം ഈ അദ്ധ്യയന വര്ഷം മുതല് വി എച്ച് എസ് ഇ സ്കൂളുകളില് നടത്തുന്ന വൊക്കേഷണല് കോഴ്സുകള് എന് എസ് ക്യു എഫ് അധിഷ്ഠിത പാഠ്യപദ്ധതിക്കനുസൃതമായ കോഴ്സുകളിലേക്ക് മാറ്റിയിട്ടുണ്ട്.
ജില്ലയില് 36 വൊക്കേഷണല് ഹയര്സെക്കന്ററി സ്കൂളുകളിലും ഈ അദ്ധ്യയന വര്ഷം മുതല് എന് എസ് ക്യു എഫ് പദ്ധതിയാണ് അവലംബിച്ചിരിക്കുന്നത്. ഇതില് 11 സ്കൂളുകളില് കഴിഞ്ഞ അദ്ധ്യയന വര്ഷത്തില് പദ്ധതി നടപ്പാക്കിയിരുന്നു. കേന്ദ്ര സ്കില്ഡ് ഡെവലപ്മെന്റ് മന്ത്രാലയത്തിനു കീഴിലുള്ള സ്കില്ഡ് ഡെവലപ്മെന്റ് കോര്പ്പറേഷനാണ് കോഴ്സുകള്ക്ക് രൂപം നല്കിയിരിക്കുന്നത്. ഹയര്സെക്കന്ഡറി സര്ട്ടിഫിക്കറ്റിനോടൊപ്പം ഒരു തൊഴില് പഠിക്കാനും അതില് പ്രാവീണ്യം നേടാനും ദേശീയ നിലവാരത്തിലുള്ള സര്ട്ടിഫിക്കറ്റുകള് കരസ്ഥമാക്കാനും ഈ കോഴ്സുകള് സഹായിക്കുന്നു.
മാത്രമല്ല, ഗ്രൂപ്പ് ബി വിഭാഗത്തില് വൊക്കേഷണല് വിഷയങ്ങള് തിരഞ്ഞെടുക്കുന്നവര്ക്ക് ഫിസിക്സ്, കെമിസ്ട്രി, ബയോളജി എന്നീ ഓപ്ഷണല് വിഷയങ്ങളോടൊപ്പം താല്പര്യമുണ്ടെങ്കില് ഗണിതം ഒരു അധിക വിഷയമായി എടുത്ത് പഠിക്കാനും സാധിക്കും. ഇതനുസരിച്ച് മെഡിക്കല് പ്രവേശനപരീക്ഷയോടൊപ്പം എഞ്ചിനീയറിങ് കോഴ്സുകളിലേക്കുള്ള പ്രവേശന പരീക്ഷയും എഴുതുന്നതിനുള്ള സൗകര്യം ഉണ്ടായിരിക്കും എന്നതാണ് പ്രത്യേകത. ഇതിനായി വിദ്യാര്ത്ഥികള് കേരള സ്റ്റേറ്റ് ഓപ്പണ് സ്കൂളില് രജിസ്റ്റര് ചെയ്യേണ്ടതും അവിടെ നിന്ന് ലഭിക്കുന്ന നിര്ദ്ദേശങ്ങള്ക്ക് അനുസൃതമായി സമ്പര്ക്ക ക്ലാസുകളില് പങ്കെടുത്ത് മൂല്യനിര്ണയ സ്കോറുകള് നേടുകയും വേണം.
കുഫോസ് പ്രവേശനം: അവസാന തീയതി നീട്ടി
കോഴ്സുകളിലേക്കുള്ള പ്രവേശന നടപടികള് ജൂലൈ 29 മുതല് ആരംഭിച്ചിട്ടുണ്ട്. കോവിഡ് 19 ന്റെ സാഹചര്യത്തില് പൂര്ണ്ണമായും ഓണ്ലൈന് സംവിധാനത്തിലാണ് പ്രവേശന നടപടികള്. ഓഗസ്റ്റ് 14 വരെ വിദ്യാര്ത്ഥികള്ക്ക് വി എച്ച് എസ് ഇ അഡ്മിഷന് സൈറ്റായ www.vhscap.kerala.gov.in ലെ 'അപ്ലൈ ഓണ്ലൈന്' എന്ന ലിങ്കിലൂടെ അപേക്ഷകര്ക്ക് സ്വന്തമായി ഓണ്ലൈനായി അപേക്ഷ സമര്പ്പിക്കാം. വിദ്യാര്ത്ഥികളൈ സഹായിക്കാനായി എല്ലാ പ്രവൃത്തി ദിവസങ്ങളിലും സ്കൂളുകളില് ഹെല്പ്പ് ഡെസ്ക്കുകളും സജ്ജീകരിച്ചിട്ടുണ്ട്. കോഴ്സുകളുടെ വിശദവിവരങ്ങളും ഏതൊക്കെ സ്കൂളുകളില് ഏതൊക്കെ വിഷയങ്ങള് ലഭ്യമാണെന്നും കോഴ്സ് കോഡുകളും വെബ്സൈറ്റില് ലഭ്യമാണ്.
കേരള കലാമണ്ഡലത്തില് പ്ലസ് വണ് പ്രവേശനം
അക്കാദമിക് വിഷയങ്ങള്ക്കൊപ്പം ഒരു വര്ഷം 300 മണിക്കൂര് ദൈര്ഘ്യമുള്ള കോഴ്സ് കഴിയുമ്പോള് ഉപരിപഠനവും തൊഴില് മേഖലയില് പോകേണ്ടവര്ക്ക് അതിനുള്ള സാഹചര്യവും കൂടാതെ തൊഴില് പഠനം ഐഛിക വിഷയമായി എടുക്കുന്നവര്ക്ക് യു ജി സി. കോളേജ് തലത്തില് നടത്തുന്ന ബി വോക്ക്, എം വോക്ക് കോഴ്സുകള്, പ്രൊഫഷണല് ഡിഗ്രി കോഴ്സുകള് തുടങ്ങിയവയ്ക്കും സാധ്യതയുണ്ട്. കൂടുതല് വിവരങ്ങള്ക്ക് 9497304240, 9539838080, 9446721601 എന്നീ നമ്പറുകളുമായി ബന്ധപ്പെടാം.