എന്തൊക്കെ ശ്രദ്ധിക്കണം
ഞാൻ മാത്രമല്ല ഈ കോഴ്സ് പഠിക്കുന്നതെന്നും എന്നെപ്പോലെ ആയിരം ആളുകൾ ലോകത്തിൻ്റെ പല കോണിൽ നിന്നും ഈ കോഴ്സിൽ പങ്കുചേരുന്നുമുണ്ടെന്നാണ് ആദ്യം മനസിലാക്കേണ്ടത്. ചര്ച്ചയിലും മറ്റും പങ്കെടുക്കുമ്പോൾ വിവരങ്ങൾ കൃത്യമായി പങ്കുവെക്കണം. അസൈമെൻ്റ്, ക്വിസുകൾ എന്നിവ സമയബന്ധിതമായിതന്നെ തീര്ക്കണം. പ്രായമേതായാലും ഇഷ്ടമുള്ള കോഴ്സുകൾ പഠിക്കാൻ സഹായിക്കുന്ന ഉപാധിയാണ് മൂക് കോഴ്സുകൾ. പല കോഴ്സുകൾക്കും അടിസ്ഥാന യോഗ്യത എന്നൊന്നില്ല എന്നതാണ് മറ്റൊരു പ്ലസ് പോയിൻ്റ്. പഠിക്കാനുള്ള താത്പര്യം മാത്രമാണ് ഈ കോഴ്സുകൾ ആവശ്യപ്പെടുന്നത്. മിക്കവാറും കോഴ്സുകൾ ഇംഗ്ലീഷിലാണെങ്കിലും ഇത് ഒരു പരിമിതിയല്ല എന്ന ബോധ്യവും ആദ്യം മുതലേ വേണം.
ഏത് ഭാഷ
ഭാഷ ഏതാണെങ്കിലും പരിജ്ഞാനത്തിന് പരിമിതിയില്ല എന്നതാണ് സത്യം. പല കോഴ്സുകളും വായിക്കാനുള്ള ഭാഗങ്ങൾ, ക്ലാസിൻ്റെ വീഡിയോ, യൂട്യൂബ് ഉൾപ്പെടെയുള്ള മറ്റ് വീഡിയോകൾ, പ്രെസൻ്റേഷനുകൾ തുടങ്ങിയ വ്യത്യസ്ഥ മാധ്യമങ്ങൾ വഴിയാണ് പഠിതാക്കൾ പഠിക്കുന്നത്. പൊതുവെ ഇംഗ്ലീഷിലാണ് പഠിപ്പിക്കുന്നതെങ്കിലും അത് മനസിലാക്കി എടുക്കാൻ നിരവധി മാര്ഗങ്ങളാണ് ഇന്നുള്ളത്. പൊതു ചര്ച്ചകളിൽ ഇംഗ്ലീഷാവും ഉപയോഗിക്കുന്നത്. എന്നിരുന്നാലും ഇത് വലിയൊരു പ്രശ്നമാവില്ല എന്നാണ് അനുഭവസ്ഥര് പറയുന്നത്. പിന്നെ, പ്രായപരിധി ഇല്ലാത്തതിനാൽ കുട്ടിക്കും അമ്മക്കും മുത്തശ്ശനും ഒരുമിച്ചിരുന്ന് പഠിക്കാം എന്നതാണ് മറ്റൊരു പ്രത്യേകത. ഇംഗ്ലീഷ് ഭാഷയിൽ പ്രാവീണ്യം നേടാൻ ഇത് അവസരമൊരുക്കുന്നുണ്ട് എന്നും മറക്കണ്ട.
ഓൺലൈൻ പഠനം
ഓൺലൈൻ പഠനത്തിൻ്റെ സാധ്യതകൾ മനസിലാക്കുന്നതിനോടൊപ്പം പഠനത്തെയും വിജ്ഞാനത്തെയും പരമ്പരാഗത നിര്വചനങ്ങളിൽനിന്ന് വിപുലീകരിച്ച് പുതിയ അറിവുകളും നൈപുണികളും നേടാനും ഈ അവധിക്കാലം ഉപയോഗിക്കാവുന്നതാണ്. ഇനി ഓൺലൈനെക്കുറിച്ച് ഒന്നും അറിയാത്തവരെ സംബന്ധിച്ച് പഠനാരംഭമാണ്. നമ്മുടെ ഔദ്യോഗിക വിദ്യാഭ്യാസ സമ്പ്രദായങ്ങളിൽ പലപ്പോഴും നഷ്ടപ്പെട്ടു പോകുന്ന അതിജീവന കഴിവുകൾ നേടിയെടുക്കുന്നതും വിദ്യാഭ്യാസം വഴി തന്നെയാണ്. നാട്ടിലെ സാങ്കേതിക വിദ്യയും വിദ്യാഭ്യാസവും ഓൺലൈൻ സാധ്യതകളെ പരമാവധി ഉപയോഗിക്കേണ്ടതിനെക്കുറിച്ചും ഈ ലോക്ഡൗൺ ഓര്മിപ്പിക്കുന്നുണ്ട്. ഓൺലൈൻ പഠനവും ഇൻ്റര്നെറ്റ് ഉപയോഗവും സ്കൈപ്പും വീഡിയോ കോളും ഓൺലൈൻ ട്യൂഷനുമൊക്കെ ആര്ക്കും സാധിക്കുന്ന കാര്യങ്ങളാണെന്നും ലോക്ക്ഡൗൺ വീണ്ടും വീണ്ടും ഓര്മിപ്പിക്കുന്നു.
ഇ-പിജി പഠനശാല
സാമൂഹിക ശാസ്ത്രം, ആര്ട്സ്, ഫൈൻ ആര്ട്സ്, മാനവിക ശാസ്ത്രം, പരിസ്ഥിതി, ഗണിത ശാസ്ത്രം തുടങ്ങി എഴുപത് വിഷയങ്ങളിലെ ബിരുദാനന്തര കോഴ്സുകൾക്ക് ഉന്നത നിലവാരമുള്ള കരിക്കുലാധിഷ്ഠിത സംവേദനാത്മക ഇ-ഉള്ളടക്കം അടങ്ങിയിട്ടുള്ള 23000 മോഡ്യൂളുകൾ ഇ-പിജി പഠനശാലയിൽ ലഭ്യമാണ്. യുജിസി പങ്കുവെച്ച പഠനത്തിനായുള്ള വിവിധ ഓൺലൈൻ പ്ലാറ്റ്ഫോമുകളിലൊന്നാണ് ഇത്. ഓൺലൈൻ പഠനത്തിലേര്പ്പെട്ട് ഓരോ സമയവും ഉത്പാദക്ഷമമായി ഉപയോഗിക്കണമെന്നാണ് യുജിസി പറയുന്നത്. അധ്യാപകര്ക്കും വിദ്യാര്ഥികൾക്കും സര്വകലാശാല ഗവേഷകര്ക്കും ഒരുപോലെ ഉപകാരപ്പെടുന്ന കാര്യമാണ് ഇത്. അതേസമയം, ഇന്ന് ഒരു കോഴ്സ് തൻ്റെ അഭിരുചിക്ക് ചേര്ന്നതാണോ എന്ന് തിരിച്ചറിയാൻ വര്ഷങ്ങൾ കളയേണ്ടതില്ല എന്നതാണ് മറ്റൊരു സത്യം. ഓൺലൈനിൽ തന്നെ ചെറിയ കോഴ്സുകൾ ചെയ്ത് തുടങ്ങണമെന്ന് പറയുന്നത് അതുകൊണ്ടാണ്.
സ്വയം പ്രഭ
നിങ്ങളുടെ കേബിൾ ഓപ്പറേറ്റര് മുഖേന ലഭിക്കാവുന്ന ഒരു ചാനലാണ് ഇത്. 32 ഡിടിഎച്ച് ചാനലുകളുടെ കൂട്ടായ്മയിലൂടെ രാജ്യത്ത് നടപ്പിലാക്കുന്ന പദ്ധതിയാണ് ഇത്. ആര്ട്ട്സ്, സയന്സ്, കോമേഴ്സ്, പെര്ഫോമിംഗ് ആര്ട്ട്സ്, സാമൂഹിക ശാസ്ത്രം മാനവിക വിഷയങ്ങള്, എഞ്ചിനീയറിംഗ്, സാങ്കേതികവിദ്യ, നിയമം, മെഡിസിന്, കൃഷി തുടങ്ങി വൈവിധ്യ വിഷയങ്ങൾ ഇതിൽ ലഭ്യമാവും. ഇനി വിദ്യാര്ഥികളോട് പ്ലസ്ടു അല്ലേ കഴിഞ്ഞുള്ളൂ എന്ന ചിന്തയാണ് നിങ്ങൾ ആദ്യം മാറ്റേണ്ടത്. അവര് തന്നെ ഇത്തരത്തിലുള്ള കോഴ്സുകൾ ഭാവിയിൽ കണ്ടുപിടിക്കും എന്നും വാശിവേണ്ട. പകരം, പല അഭിപ്രായങ്ങൾ പറയാതെ, ഏതെങ്കിലും ഒരു ഏരിയായിൽ അവര്ക്ക് കൂടുതൽ താത്പര്യം ജനിപ്പിക്കാൻ സാധിച്ചാൽ ബാക്കി കാര്യങ്ങൾ അവര് സ്വയം ഏറ്റെടുത്തോളും.