സംസ്ഥാന യുവശാസ്ത്രജ്ഞ പുരസ്കാരത്തിന് അപേക്ഷ ക്ഷണിച്ചു

സംസ്ഥാനത്തെ ശാസ്ത്ര സാങ്കേതിക മേഖലകളില്‍ ഗവേഷണ നേട്ടങ്ങള്‍ കൈവരിച്ചിട്ടുള്ള യുവശാസ്ത്രജ്ഞര്‍ക്കായി ഏര്‍പ്പെടുത്തിയ യുവശാസ്ത്രജ്ഞ പുരസ്‌കാരത്തിന് കേരള ശാസ്ത്ര സാങ്കേതിക പരിസ്ഥിതി കൗണ്‍സില്‍ അപേക്ഷ ക്ഷണിച്ചു.

ഇന്ത്യയില്‍ ജനിച്ച് കേരളത്തില്‍ ശാസ്ത്ര സാങ്കേതിക മേഖലകളില്‍ ഗവേഷണം നടത്തുന്ന 37 വയസുവരെയുള്ള യുവശാസ്ത്രജ്ഞര്‍ക്ക് പതിനാല് വിഭാഗങ്ങളിലായി ഈ പുരസ്‌കാരത്തിന് അപേക്ഷിക്കാം. ഗവേഷണ പുരസ്‌കാരങ്ങള്‍ക്കുള്ള നാമനിര്‍ദ്ദേശങ്ങള്‍ സര്‍ട്ടിഫിക്കറ്റുകളുടെ പകര്‍പ്പ് സഹിതം ഒക്ടോബര്‍ 15 വരെ സമര്‍പ്പിക്കാം.

പുരസ്‌കാര ജേതാക്കള്‍ക്ക് അന്‍പതിനായിരം രൂപയും പ്രശസ്തി പത്രവും ലഭിക്കും. തുടര്‍ന്ന് അന്‍പത് ലക്ഷം രൂപയുടെ പ്രോജക്ട് ചെയ്യാനുള്ള അവസരവും ലഭിക്കും. നാമനിര്‍ദ്ദേശങ്ങള്‍ അയക്കേണ്ട വിലാസം : ഡയറക്ടര്‍, കേരള സംസ്ഥാന ശാസ്ത്ര സാങ്കേതിക പരിസ്ഥിതി കൗണ്‍സില്‍, ശാസ്ത്രഭവന്‍, പട്ടം, തിരുവനന്തപുരം - 695 004. വിശദവിവരങ്ങള്‍ www.kscste.kerala.gov.in