അന്‍വർ‍ മടങ്ങിയെത്തുന്നതിന് മുന്നേ പ്രചരണം തുടങ്ങി സിപിഎം; നിലമ്പൂരിൽ പടുകൂറ്റൻ ബോര്‍ഡുകളും പോസ്റ്ററുകളും

മലപ്പുറം: നിയമസഭാ തെരഞ്ഞെടുപ്പ് തീയതികള്‍ പ്രഖ്യാപിച്ചിട്ടും ആഫ്രിക്കയിലെ സിയറാ ലിയോണിൽ തുടരുന്ന പി വി അൻവറിന് വേണ്ടി പ്രചരണ പരിപാടികള്‍ ആരംഭിച്ചു. മണ്ഡലത്തിന്റെ വിവിധ ഭാഗങ്ങളിൽ പി വി അൻവറിന്റെ ചിത്രങ്ങളടക്കമുള്ള പോസ്റ്ററുകള്‍ നിരന്നു കഴിഞ്ഞു.

Also Read : ഒരു കാലത്ത് മമതയുടെ വലംകൈ, ഇപ്പോൾ ബിജെപി പാളയത്തിൽ, നന്ദിഗ്രാം പിടിച്ചെടുക്കാൻ സുവേന്ദു അധികാരി; 12ന് പത്രിക സമര്‍പ്പിക്കും

നഗരത്തിന്റെ പ്രധാന ഭാഗങ്ങളില്‍ അടക്കം പടുകൂറ്റൻ ബോര്‍ഡുകളും സ്ഥാപിച്ചിട്ടുണ്ട്. നിലമ്പൂർ‍ കാത്തിരിക്കുന്നുവെന്ന അടിക്കുറിപ്പോടെയാണ് പോസ്റ്ററുകള്‍ പ്രത്യക്ഷപ്പെട്ടിരിക്കുന്നത്.

അതിനൊപ്പം അന്‍വർ മണ്ഡലത്തിൽ നടത്തിയ വികസന പ്രവര്‍ത്തനങ്ങളും ഈ ബോര്‍ഡുകളില്‍ ഉയരുന്നുണ്ട്.

വ്യാഴാഴ്ച അൻവർ ആഫ്രിക്കയിൽ നിന്നും നാട്ടിലേക്ക് തിരികെ എത്തുമെന്ന് അറിയിച്ചിരുന്നു. ഫേസ്ബുക്കിലൂടെയാണ് മടങ്ങിവരവിന്റെ കാര്യം വ്യക്തമാക്കിയത്. രണ്ട് മാസത്തിലേറെയായി ബിസിനസുമായി ബന്ധപ്പെട്ട് വിദേശത്താണ് എംഎൽഎ.

എതിരാളികളുടെ ആരോപണങ്ങള്‍ക്ക് ഫേസ്ബുക്ക് ലൈവിലൂടെ എത്തിയാണ് എംഎൽഎ മറുപടി നൽകിയിരുന്നത്. രാഷ്ട്രീയത്തിൽ നിന്നും താനൊന്നും തിരിച്ച് പ്രതീക്ഷിച്ചിട്ടില്ലെന്നും അൻവ‍ർ ലൈവില്‍ പറഞ്ഞിരുന്നു.

എംഎൽഎ ആയി കഴിഞ്ഞ നാലേമുക്കാൽ വര്‍ഷത്തിനിടെ ഒരു ബ്രിട്ടാനിയ ബിസ്കറ്റു വാങ്ങാനുള്ള പണം പോലും സര്‍ക്കാര്‍ നൽകുന്ന ശമ്പളത്തിൽ നിന്നും എടുത്തിട്ടില്ല. നിയമസഭാ സാമാജികൻ എന്ന നിലയ്ക്ക് ഒരു ലാഭവും താൻ ഉണ്ടാക്കിയിട്ടില്ലെന്നും അൻവ‍ർ പറഞ്ഞു.

മൂന്നു ലക്ഷം രൂപയുടെ ഡീസലും ട്രെയിന്‍ അലവന്‍സും അല്ലാതെ ഒരു പൈസയും സര്‍ക്കാരില്‍ നിന്ന് സ്വീകരിച്ചിട്ടില്ലെന്നും വിശദീകരിക്കുന്ന അന്‍വറിന്റെ വീഡിയ വൈറലായിരുന്നു.

അതേസമയം, ഇത്തവണ മണ്ഡലം പിടിച്ചെടുക്കാനുള്ള കഠിന പരിശ്രമത്തിലാണ് യുഡിഎഫ്. ഇതിന്റെ ഭാഗമായി രണ്ട് മാസമായി മണ്ഡലത്തില്‍ ഇല്ലാതിരുന്ന എംഎൽഎയെ കാണാനില്ലെന്ന് കാണിച്ച് യൂത്ത് കോണ്‍ഗ്രസ് പോലീസിൽ പരാതി നൽകിയിരുന്നു. ഇതിനെ പരിഹസിച്ച് പി വി അൻവര്‍ വീഡിയോ ഇട്ടുകയും ചെയ്തിരുന്നു.