സംസ്ഥാനത്ത് ഇന്ന് 9 പുതിയ കൊവിഡ്, ആകെ രോഗബാധ 112

തിരുവനന്തപുരം։ സംസ്ഥാനത്ത് ഇന്ന് 9 പേര്‍ക്ക് കൂടി കൊവിഡ്-19 രോഗബാധ സ്ഥിരീകരിച്ചു. ഇതില്‍ നാലുപേര്‍ ദുബായിയില്‍ നിന്നും ഒരാള്‍ യുകെ, ഫ്രാന്‍സ് എന്നിവിടങ്ങളില്‍ നിന്നും വന്നവരാണ്. ഇതോടെ നിലവില്‍ ചികിത്സയില്‍ കഴിയുന്നവരുടെ എണ്ണം 112 ആയി ഉയര്‍ന്നു. ഇന്നുമാത്രം 122 പേരെ മാത്രം ആശുപത്രിയില്‍ പ്രവേശിപ്പിച്ചു. 3 പേര്‍ക്ക് സമ്പര്‍ക്കം വഴിയാണ് രോഗബാധ ഉണ്ടായത്. 12 പേര്‍ സുഖം പ്രാപിച്ചു. അതേസമയം, ചികിത്സയിലുള്ള 6 പേരുടെ പരിശോധനാഫലം നെഗറ്റീവെന്ന് മുഖ്യമന്ത്രി വാര്‍ത്താ സമ്മേളനത്തിലൂടെ പറഞ്ഞു.

എറണാകുളം-3, പത്തനംതിട്ട- 2, പാലക്കാട്-2, ഇടുക്കി-1, കോഴിക്കോട്-1 എന്നിങ്ങനെയാണ് ഇന്ന് സംസ്ഥാനത്ത് കൊവിഡ്- 19 സ്ഥിരീകരിച്ചത്. നിലവില്‍ സംസ്ഥാനത്ത് 76,542 ആളുകളാണ് നിരീക്ഷണത്തില്‍ കഴിയുന്നത്. ഇതില്‍ 76010 പേര്‍ വീടുകളിലാണ്. 542 പേര്‍ ആശുപത്രികളിലാണ്. 4905 സാമ്പിളുകളാണ് പരിശോധനയ്ക്ക് അയച്ചത്. ഇതില്‍ 3465 എണ്ണം നെഗറ്റീവായി തിരികെ വന്നു.

നിയന്ത്രണങ്ങള്‍ കൂടുതല്‍ ശക്തമാക്കുമെന്ന് മുഖ്യമന്ത്രി. അനാവശ്യമായി പുറത്തിറങ്ങുന്നവര്‍ക്കെതിരെ കടുത്ത നടപടികള്‍ കൊണ്ടുവരും. പുറത്തിറങ്ങാന്‍ ഐഡി കാര്‍ഡോ പാസോ കരുതണം. അത്യാവശ്യത്തിന് മാത്രമേ പുറത്തിറങ്ങാന്‍ പാടുള്ളുവെന്ന് മുഖ്യമന്ത്രി പറഞ്ഞു. പകര്‍ച്ചവ്യാധി തടയുന്നതിന് ഓര്‍ഡിനന്‍സ് ഇറക്കുമെന്ന് അദ്ദേഹം വ്യക്തമാക്കി.

Also Read: LIVE: ബ്രിട്ടനിലെ കിരീടവകാശി ചാള്‍സ് രാജകുമാരന് കൊവിഡ് 19, ആരോഗ്യനില തൃപ്തികരം

സംസ്ഥാനത്ത് നിലവില്‍ 112 പേര്‍ക്കാണ് വൈറസ് ബാധ റിപ്പോര്‍ട്ട് ചെയ്തിരിക്കുന്നത്. ഇതില്‍ നാല് പേര്‍ക്ക് രോഗം ഭേദമായി ആശുപത്രി വിട്ടിരുന്നു. കഴി‍ഞ്ഞ ദിവസം ഒരു ആരോഗ്യ പ്രവര്‍ത്തകയ്ക്കും രോഗബാധ റിപ്പോർട്ട് ചെയ്തിരുന്നു.

ഇന്നലെ സംസാരിച്ചതിൽനിന്നു വ്യത്യസ്തമായ സാഹചര്യമാണ് ഉണ്ടായിട്ടുള്ളത്. ഇന്നലെ ലോക്ക് ഡൗൺ നടപ്പാക്കി. നമ്മൾ അതിനു മുൻപ് തന്നെ ലോക്ക് ഡൗൺ പ്രഖ്യാപിച്ചതാണ്. സ്ഥിതി കൂടുതൽ ഗൗരവമാകുന്നുവെന്നാണ് ഇതിൽനിന്നു വ്യക്തമാക്കുന്നത്. സംസ്ഥാനം കൂടുതൽ നിയന്ത്രണങ്ങളിലേക്കു പോകേണ്ടതുണ്ട്. ജനങ്ങള്‍ക്കു ജീവിതം മുന്നോട്ടുകൊണ്ടുപോകേണ്ട സാഹചര്യം ഭദ്രമാക്കണമെന്നും മുഖ്യമന്ത്രി പറഞ്ഞു.

കൊവിഡ്-19 രോഗബാധയുടെ അടിസ്ഥാനത്തില്‍ പ്രധാനമന്ത്രി നരേന്ദ്ര മോദി ചൊവ്വാഴ്ച രാത്രി മുതല്‍ രാജ്യത്ത് സമ്പൂര്‍ണ്ണ ലോക്ഡൗണ്‍ പ്രഖ്യാപിച്ചിരുന്നു. എല്ലാവരും വീടിന് മുന്നില്‍ ഒരു ലക്ഷ്മണ രേഖ വരയ്ക്കണമെന്നും, അത് താണ്ടി ആരും പുറത്ത് പോകില്ല എന്ന് ഉറപ്പുവരുത്തണമെന്നും അദ്ദേഹം ഇന്നലെ രാജ്യത്തെ അഭിസംബോധന ചെയ്ത് പറഞ്ഞിരുന്നു.