വയനാട്ടിൽ രാഹുൽ ഗാന്ധിക്ക് വൻ ലീഡ്, അമേഠിയിൽ പിന്നിൽ

അമേഠി: വയനാട്ടിൽ കോൺഗ്രസ് അധ്യക്ഷൻ രാഹുൽ ഗാന്ധിക്ക് വൻ ലീഡ്. രാഹുൽ ഗാന്ധി ലീഡ് നില 20,000 കടന്നു. അതേസമയം ഉത്തര്‍പ്രദേശിലെ അമേഠിയിൽ രാഹുൽ ഗാന്ധി പിന്നിലാണ്. ആദ്യ ഫലസൂചനകള്‍ പുറത്ത് വരുമ്പോള്‍ എൻഡിഎ 225, യുപിഎ 115 എന്നിങ്ങനെയാണ് ലീഡ് നില.

അമേഠിയിൽ ബിജെപി സ്ഥാനാര്‍ത്ഥി സ്‍മൃതി ഇറാനിയാണ് മുന്നിൽ നിൽക്കുന്നത്. സ്‍മൃതി ഇറാനിയുടെ ലീഡ് നില 2,000 കടന്നു. 2014 ൽ അമേഠിയിൽ ഒരു ലക്ഷം വോട്ടുകളുടെ ഭൂരിപക്ഷത്തിലാണ് രാഹുൽ ഗാന്ധി വിജയിച്ചത്. രാഹുൽ ഗാന്ധി 4 ലക്ഷം വോട്ടുകളും സ്‍മൃതി ഇറാനി 3 ലക്ഷം വോട്ടുകളുമാണ് അമേഠിയിൽ പിടിച്ചത്.

അതേസമയം ലോകത്തെ ഏറ്റവും വലിയ ജനാധിപത്യ പ്രക്രിയയുടെ ഫലം അറിയാൻ ആകാംക്ഷയോടെ കാത്തിരിക്കുകയാണ് രാജ്യം. ഏഴ് ഘട്ടങ്ങളിലായി 542 സീറ്റുകളിലേക്ക് 8,049 സ്ഥാനാര്‍ത്ഥികളാണ് ജനവിധി തേടിയത്. ഇന്ന് രാവിലെ എട്ട് മണിക്കാണ് വോട്ടെണ്ണൽ ആരംഭിച്ചത്.