ഞായറാഴ്‌ച പുതിയ സർക്കാർ സത്യപ്രതിജ്ഞ ചെയ്‌തേക്കും

ന്യൂഡൽഹി: ഞായറാഴ്ച പുതിയ സർക്കാർ സത്യപ്രതിജ്ഞ ചെയ്ത് അധികാരമേൽക്കുമെന്ന് സൂചന. 349 സീറ്റുകൾ നേടിയാണ് എൻഡിഎ മുന്നണി രണ്ടാമതും അധികാരത്തിലെത്തുന്നത്. ബിജെപി ഒറ്റക്ക് 304 സീറ്റുകൾ നേടി. അതെ സമയം,കോൺഗ്രസിന് ദേശീയ തലത്തിൽ വലിയ പരാജയമാണ് ഇത്തവണ നേരിട്ടത്. പുതിയ എംപിമാരെ സ്വീകരിക്കാനായി വിപുലമായ ഒരുക്കങ്ങളാണ് രാഷ്ട്രപതിഭവനിൽ ഒരുക്കിയിരിക്കുന്നത്.

പുതിയ സര്‍ക്കാരിന്‍റെ സത്യപ്രതിജ്ഞയ്ക്കും പതിനേഴാം ലോക്സഭയിലെ അംഗങ്ങളെ സ്വാഗതം ചെയ്യുന്നതിനുമുള്ള ഒരുക്കങ്ങളാണ് പൂർത്തിയായതായി ലോക്സഭാ സെക്രട്ടറി ജനറൽ സ്നേഹലതാ ശ്രീവാസ്തവ അറിയിച്ചു. ഇതിന്‍റെ ഭാഗമായി രാഷ്ട്രപതിഭവനിൽ വിളിക്കേണ്ട അതിഥികളുടെ പട്ടിക തയ്യാറാക്കുന്നത് ഉള്‍പ്പെടെയുള്ള പ്രവര്‍ത്തനങ്ങള്‍ തുടങ്ങി. ഡൽഹി വിമാനത്താവളത്തിലും റെയിൽവേ സ്റ്റേഷനുകളിലും ഒരുക്കങ്ങള്‍ നടത്തിയിട്ടുണ്ട്. ഇവിടങ്ങളിൽ ഹെൽപ്പ് ഡസ്കുള്‍ തുറന്നു.

പുതിയ എംപിമാരെ പഞ്ചനക്ഷത്ര ഹോട്ടലുകള്‍ക്ക് പകരം ജൻപഥ് റോഡിലെ വെസ്റ്റേൺ കോര്‍ട്ടിലും വിവിധ സംസ്ഥാനങ്ങളുടെ ഭവനുകളിലുമായിരിക്കും താമസിപ്പിക്കുക. ഇതിനായി മൂന്നൂറോളം മുറികളും സജ്ജീകരിച്ചിട്ടുണ്ട്. കഴിഞ്ഞ ലോക്സഭാ തെരഞ്ഞെടുപ്പിൽ പുതുതായി തെരഞ്ഞെടുക്കപ്പെട്ടത് 300ലധികം അംഗങ്ങളായിരുന്നു. എന്നാൽ മുൻ ലോക്സഭയിലെ ചില അംഗങ്ങള്‍ ഔദ്യോഗിക വസതികള്‍ ഒഴിയാൻ തയ്യാറാകാതെ വന്നതോടെ പുതിയ അംഗങ്ങളെ താമസിപ്പിക്കുന്നതിൽ വലിയ പ്രതിസന്ധഇി നേരിട്ടു.

പുതിയ അംഗങ്ങള്‍ക്കായി പഞ്ചനക്ഷത്ര ഹോട്ടലുകള്‍ വാടകയ്ക്ക് എടുക്കേണ്ടി വന്നതോടെ 30 കോടി രൂപയോളം മുടക്കിയാണ് അംഗങ്ങള്‍ക്കായി പഞ്ചനക്ഷത്ര ഹോട്ടൽ മുറികള്‍ വാടകയ്ക്കെടുത്തത്. ഇതേത്തുടര്‍ന്ന് വെസ്റ്റേൺ കോര‍്ട്ടിൽ പുതുതായി 88 ബ്ലോക്കുകള്‍ പണിയാൻ സര്‍ക്കാര്‍ തീരുമാനിക്കുകയായിരുന്നു. ഇവിടെ 100 എംപിമാര്‍ക്ക് താമസസൗകര്യം ഒരുക്കിയിട്ടുണ്ട്. ഇതിനു പുറമെ 265 പേരെ സംസ്ഥാന ഭവനുകളിൽ പാര്‍പ്പിക്കാനും സൗകര്യമൊരുക്കിയിട്ടുണ്ട്.