പ്രധാനമന്ത്രിയുടെ ശബരിമല പരാമർശം; സിപിഎം തെരഞ്ഞെടുപ്പ് കമ്മീഷന് പരാതി നൽകി

തിരുവനന്തപുരം: പ്രധാനമന്ത്രിയുടെ ശബരിമല പരാമർശത്തിൽ തെരഞ്ഞെടുപ്പ് കമ്മീഷനെ സമീപിച്ച് സിപിഎം. കേന്ദ്ര തെരഞ്ഞെടുപ്പ് കമ്മീഷനാണ് സിപിഎം പരാതി നൽകിയത്. എൽഡിഎഫിന്റെ മണ്ഡലം കമ്മിറ്റിവഴിയും സിപിഎം നേരിട്ടുമാണ് പരാതി നൽകിയിരിക്കുന്നത്. ശബരിമല വിഷയം തെരഞ്ഞെടുപ്പിൽ ഉന്നയിക്കരുതെന്നുള്ള തെരഞ്ഞെടുപ്പ് കമ്മീഷന്റെ നിർദ്ദേശത്തിന്റെ ലംഘനമാണിതെന്ന് സിപിഎം ചൂണ്ടിക്കാണിക്കുന്നു. ചെന്നൈയിലും മംഗലാപുരത്തും ശബരിമല വിഷയം നരേന്ദ്ര മോദി ഉന്നയിച്ചിരുന്നു. വിശ്വാസം തകർക്കാനുള്ള ശ്രമം കേരളത്തിൽ നടക്കുകയാണെന്ന് തമിഴ്നാട്ടിലെ രാമനാഥപുരത്ത് മോദി പ്രസംഗിച്ചിരുന്നു. മുസ്ലിം ലീഗിനെതിരെയും കടുത്ത ഭാഷയിലാണ് മോദി വിമർശനം ഉന്നയിച്ചത്.

തെരഞ്ഞെടുപ്പ് ചട്ടലംഘനം ആകുമെങ്കിലും ശബരിമല വിഷയം ഉയർത്തിക്കാട്ടി വോട്ടുപിടിക്കാനാണ് ബിജെപിയുടെ നീക്കം. പത്തനംതിട്ടയിലെ ബിജെപി സ്ഥാനാർത്ഥി കെ സുരേന്ദ്രൻ ശബരിമല വിഷയം ഉന്നയിച്ച് വോട്ട് ചോദിക്കുന്നതിന്റെ വീഡിയോ കഴിഞ്ഞ ദിവസങ്ങളിൽ സമൂഹമാധ്യമങ്ങളിൽ പ്രചരിച്ചിരുന്നു.