രാജിവെക്കാനൊരുങ്ങി രാഹുൽ: പിന്തിരിപ്പിച്ച് മുതിർന്ന നേതാക്കൾ

ന്യൂഡൽഹി: ലോക്‌സഭാ തെരഞ്ഞെടുപ്പിൽ കോൺഗ്രസിന് നേരിട്ട തോൽവിയുടെ ഉത്തരവാദിത്തം ഏറ്റെടുത്ത് അധ്യക്ഷസ്ഥാനം ഒഴിയാൻ തയ്യാറായി രാഹുൽ ഗാന്ധി. എന്നാൽ, മുതിർന്ന നേതാക്കൾ രാഹുൽ ഗാന്ധിയെ തടഞ്ഞുവെന്നും കടുത്ത തീരുമാനങ്ങൾ ഇപ്പോൾ കൈക്കൊള്ളരുതെന്നും ഉപദേശിച്ചുവെന്നാണ് സൂചന.

എഐസിസിയുടെ പ്രവർത്തക സമിതി ചേരുന്നത് വരെ കടുത്ത തീരുമാനങ്ങൾ കൈക്കൊള്ളരുതെന്നാണ് മുതിർന്ന നേതാക്കൾ രാഹുലിന് നൽകിയ നിർദേശം. എഐസിസി പ്രവർത്തക സമിതി ചേർന്ന് രാഹുലിന്റെ രാജി തീരുമാനം പരിശോധിക്കുമെന്ന് എഐസിസി ജനറൽ സെക്രട്ടറി കെ.സി വേണുഗോപാൽ ഏഷ്യാനെറ്റ് ന്യൂസിന് നൽകിയ അഭിമുഖത്തിൽ പറഞ്ഞു.

അതെ സമയം, രാഹുൽ ഗാന്ധി നടത്തിയ വാർത്താസമ്മേളനത്തിൽ രാജി തീരുമാനത്തെ കുറിച്ച് വ്യക്തമാക്കിയില്ല. അത് താനും പ്രവർത്തക സമിതിയും ചർച്ച ചെയ്യേണ്ട വിഷയമാണ് എന്ന് രാഹുൽ വാർത്താസമ്മേളനത്തിൽ പ്രതികരിച്ചു. 50 സീറ്റുകൾ മാത്രം നേടിയ കോൺഗ്രസിന് ഇത്തവണയും കേന്ദ്ര പ്രതിപക്ഷ നേതൃപദവി ലഭ്യമാകാൻ സാധ്യതയില്ല.