പ്രചാരണത്തിന് സ‍്‍മൃതി ഇറാനി വയനാട്ടിലേക്കില്ല; പകരം പ്രതിരോധ മന്ത്രി

കൽപ്പറ്റ: എൻഡിഎ സ്ഥാനാര്‍ത്ഥി തുഷാര്‍ വെള്ളാപ്പള്ളിയുടെ പ്രചാരണത്തിന് കേന്ദ്രമന്ത്രി സ്‍മൃതി ഇറാനി വയനാട്ടിൽ എത്തില്ല. നടുവേദന മൂലം സ്‍മൃതി ഇറാനി ചികിത്സയിലാണെന്ന് ബിജെപി നേതൃത്വം അറിയിച്ചു. അതേസമയം പ്രതിരോധ മന്ത്രി നിര്‍മ്മല സീതാരാമൻ നാളെ ബത്തേരിയിലെ റോഡ് ഷോയിൽ പങ്കെടുക്കും.

ഉത്തരേന്ത്യയിൽ കോൺഗ്രസ് അധ്യക്ഷൻ രാഹുൽ ഗാന്ധി മത്സരിക്കുന്ന അമേഠിയിലെ എതിര്‍സ്ഥാനാര്‍ത്ഥിയാണ് സ്മൃതി ഇറാനി. ദക്ഷിണേന്ത്യയിൽ രാഹുൽ മത്സരിക്കുന്ന വയനാട്ടിൽ സ്മൃതി ഇറാനിയെ പ്രചാരണത്തിനിറക്കി പോരാട്ടം ശക്തമാക്കാനായിരുന്നു ബിജെപി തീരുമാനിച്ചത്.
ഇന്നലെയാണ് ആദ്യം സ‍്‍മൃതി ഇറാനിയുടെ റോഡ് ഷോ നടത്താനിരുന്നത്. എന്നാൽ പരിപാടി നാളത്തേക്കു മാറ്റുകയായിരുന്നു. എന്നാൽ അവസാനം സ്മൃതി ഇറാനി എത്തില്ലെന്നും പകരം പ്രതിരോധ മന്ത്രി എത്തുമെന്നും ബിജെപി കേന്ദ്ര നേതൃത്വം അറിയിക്കുകയായിരുന്നു.

അതേസമയം നാളെ രാവിലെ കോഴിക്കോട്ടെത്തുന്ന നിര്‍മ്മല സീതാരാമൻ സെൻ്റ് മേരീസ് കോളേജ് ഗൗണ്ടിൽ ഹെലികോപ്ടറിൽ ഇറങ്ങും.