നികുതി വെട്ടിപ്പിലൂടെ ഇന്ത്യയ്ക്ക് പ്രതിവര്‍ഷം നഷ്ടമാകുന്നത് 75,000 കോടി രൂപ

ഓരോ വര്‍ഷവും നികുതി വെട്ടിപ്പിലൂടെ ഇന്ത്യയ്ക്ക് നഷ്ടമായിക്കൊണ്ടിരിയ്ക്കുന്നത് ഒന്നും രണ്ടും രൂപയല്ല. 75,000 കോടി രൂപയാണ്. ഈ നികുതി വെട്ടിപ്പിൽ വ്യക്തിഗത നികുതി ദായകര്‍ മാത്രമൊന്നുമല്ല വൻകിട കമ്പനികളും കോര്‍പ്പറേറ്റ് സ്ഥാപനങ്ങളും ഒക്കെ ഉൾപ്പെടുന്നുണ്ട്. ഓരോ വര്‍ഷവും ആദായ നികുതി വകുപ്പ് നികുതി വലകൾ ശക്തമാക്കുമ്പോഴും ഈ വലയിൽ അകപ്പെടുന്ന മദ്ധ്യവരുമാനക്കാര്‍ക്കും സാധാരണക്കാര്‍ക്കും പുറമെ വഴുതിപ്പോകുന്ന വമ്പൻ സ്രാവുകൾ നിരവധിയാണ്.

അന്താരാഷ്ട കോര്‍പ്പറേറ്റ് നികുതി വെട്ടിയ്ക്കുന്നതിലൂടെയുമുണ്ട് കോടികളുടെ നഷ്ടം.എല്ലാ രാജ്യങ്ങളുടെയും പ്രധാന വരുമാന മാര്‍ഗങ്ങളിൽ ഒന്നാണ് നികുതി. ലോകമെമ്പാടുമുള്ള രാജ്യങ്ങൾക്ക് നികുതി വെട്ടിപ്പിലൂടെ പ്രതിവര്‍ഷം നഷ്ടമാകുന്നത് 42,700 കോടി ഡോളര്‍ ആണ്.

നിയുക്ത അമേരിയ്ക്കൻ പ്രസിഡൻറ് ജോ ബൈഡൻസമഗ്ര നികുതി പരിഷ്കരണങ്ങൾക്ക് തയ്യാറായേക്കും എന്ന റിപ്പോര്‍ട്ടുകൾ ഉണ്ട്. സമ്പന്നര്‍ തങ്ങളുടെ ആസ്തിയ്ക്ക് അനുസരിച്ച് കൂടുതൽ നികുതി നൽകണം എന്നാണ് അദ്ദേഹത്തിൻെറ കാഴ്ചപ്പാട്. യുഎസിൻെറ സാമ്പത്തിക വളര്‍ച്ചയ്ക്കും തൊഴിൽ സൃഷ്ടിയ്ക്കുന്നതിനുമുള്ള പദ്ധതികൾക്കും മറ്റുമായി നികുതി വര്‍ധന ഉൾപ്പെടെയുള്ള നടപടികൾ സ്വീകരിച്ചേക്കും.

Also Read: നേപ്പാൾ, ബംഗ്ലേദേശ്, ശ്രീലങ്ക; അയൽ രാജ്യങ്ങളുടെയും വാക്സിൻ ഹബ് ആകാൻ ഒരുങ്ങി ഇന്ത്യ

എന്നാൽ ഇന്ത്യ പോലെ സമ്പന്നര്‍ ഓരോ വര്‍ഷവും അതിസമ്പന്നര്‍ ആയിക്കൊണ്ടിരിയ്ക്കുന്ന വികസ്വര രാജ്യത്ത് നികുതി വര്‍ധനയേക്കാൾ നികുതി വെട്ടിപ്പ് തടയാനാണ് കൂടുതൽ പ്രാധാന്യം നൽകേണ്ടത്.
ഇന്ത്യയുടെ മൂന്ന് ലക്ഷം കോടി ഡോളര്‍ ജിഡിപിയുടെ 0.41 ശതമാനമാണ് നികുതി വെട്ടിപ്പിലൂടെ എല്ലാ വര്‍ഷവും നഷ്ടമാകുന്നത്. ആദായ നികുതിയിൽ മാത്രമല്ല ചരക്കു സേവന നികുതിയിലുമുണ്ട് വെട്ടിപ്പുകൾ. നികുതി വ്യവസ്ഥ പരമാവധി സുതാര്യമാക്കുകയും നികുതി സമ്പ്രദായം കര്‍ശനമാക്കുകയുമാണ് നികുതി വെട്ടിപ്പ് തടയാൻ ഉള്ള പ്രധാന മാര്‍ഗം.

നികുതി കുടിശ്ശികകളും തര്‍ക്കങ്ങളും തീര്‍ക്കാൻ സര്‍ക്കാര്‍ നടപ്പാക്കിയ വിവാദ് സേ വിശ്വാസ് പദ്ധതി പ്രകാരം നവംബര്‍ 17വരെ ആദായ നികുതി വകുപ്പിന് ലഭിച്ചത് 72,480 കോടി രൂപയാണ്. കേന്ദ്ര പൊതുമേഖലാ സ്ഥാപനങ്ങളും പദ്ധതിയ്ക്ക് കീഴിൽ 1 ലക്ഷം കോടി രൂപ വരുന്ന നികുതികൾ തീര്‍പ്പാക്കിയിരുന്നു. നികുതി ദായകരുടെ പ്രശ്നങ്ങൾ പരിഹരിയ്ക്കുന്നതിനുള്ള ഇത്തരം പദ്ധതികളും നടപടികളും പ്രോത്സാഹനാര്‍ഹമാണ്. ഒപ്പം വൻകിട കോര്‍പ്പറേറ്റ് നികുതി വെട്ടിപ്പ് തടയുന്നതിനുള്ള നടപടികളും കര്‍ശനമാക്കണം