ഡ്രൈവറുടെയും ക്രൂവിന്റെയും ക്ഷീണം മാറ്റാൻ ആണെങ്കിൽ അവർ മാറിക്കയറിയാൽ പോരെ?

തിരുവനന്തപുരത്ത് നിന്ന് വടക്കോട്ട്‌ പോകുന്ന കെ എസ് ആര്‍ ടി സി ബസ് യാത്രക്കാർ അങ്കമാലിയില്‍ ഇറങ്ങി ബസ് മാറിക്കയറണം എന്ന് വാര്‍ത്ത.

ഡ്രൈവറുടെയും ക്രൂവിന്റെയും ക്ഷീണം മാറ്റാന്‍ ആണെങ്കില്‍ അവര്‍ മാറിക്കയറിയാല്‍ പോരെ ? അവര്‍ക്കാണ് ഡിപ്പോയിലെ സൗകര്യങ്ങളും സ്ഥലവും എല്ലാം പരിചയമുള്ളത്. ട്രെയിന്‍ ഉള്‍പ്പെടെ മറ്റു പൊതുഗതാഗത വാഹനങ്ങള്‍ യാത്രക്കാരോട് മാറാന്‍ പറയാറില്ലല്ലോ ... !

നാടും നഗരവും അറിയാത്തവര്‍, പ്രത്യേകിച്ച് പ്രായമായവരും കൂടെ കുഞ്ഞുങ്ങള്‍ ഉള്ളവരുമെല്ലാം ഒരു കാര്യവുമില്ലാതെ ഇറങ്ങിക്കയറണം എന്ന് പറയുന്നത് തെമ്മാടിത്തരമാണ്. പലരുടെ കയ്യിലും വലിയ ലഗേജുകളും ഉണ്ടാവാം. അല്ലെങ്കിലേ തിരുവനന്തപുരം തൊട്ട് അങ്കമാലി വരെ ഇരുന്നു നടുവൊടിഞ്ഞവര്‍ പിന്നെ കൂടും കുടുക്കയും എടുത്തു വേറെ ബസില്‍ കേറണം പോലും ! !

ട്രെയിന്‍ കിട്ടാത്ത ദൗര്‍ഭാഗ്യവാന്മാര്‍ ആണ് പൊതുവേ ഇത്രേം നീണ്ട ബസ് യാത്ര തിരഞ്ഞെടുക്കാറുള്ളത്. അവരെ ഒന്നൂടെ ദുരിതത്തിലാക്കുന്നത്‌ എന്തിനാണാവോ! വല്ലാത്ത കഷ്ടമാണ് ഇത്തരം തീരുമാനങ്ങള്‍.

സത്യത്തില്‍ എന്താണ് കെ എസ് ആര്‍ ടി സി മാനേജ്‌മന്റ്‌ ഇത് കൊണ്ടൊക്കെ ഉദ്ദേശിക്കുന്നത് ? ഇത്തരം തുഗ്ലഖ് പരിഷ്കാരങ്ങള്‍ പ്രതിസന്ധിയില്‍ ആണ്ടു കിടക്കുന്ന കെ എസ് ആര്‍ ടി സിയെ കൂടുതല്‍ ദുരിതത്തിലേക്ക് തള്ളിയിടുകയേ ഉള്ളൂ. സാധാരണക്കാര്‍ ആശ്രയിക്കുന്ന ഒരു സര്‍വീസ് ഇങ്ങനെ ബുദ്ധിമുട്ടുകള്‍ ഉണ്ടാക്കരുത്.

മാറി ചിന്തിക്കുമെന്ന് തന്നെ പ്രതീക്ഷിക്കുന്നു.

ലേഖക : Dr. Shimna Azeez

(ഈ ആർട്ടിക്കിളിൽ പ്രതിപാദിച്ചിട്ടുള്ള കാര്യങ്ങൾ ലേഖകൻ്റെ വ്യക്തിപരമായ അഭിപ്രായങ്ങളാണ്, സമയം മലയാളത്തിൻ്റേതല്ല. ഡോ ഷിമ്നാ അസീസ് തൻ്റെ ഫേസ്ബുക്കിൽ കുറിച്ച് പോസ്റ്റ് ആണ് ആർട്ടിക്കിളിൻ്റെ ആധാരം.)