ബിജെപി നേതാവിന്‍റെ മകന്‍റെ ആഡംബര ബൈക്കില്‍ മാസ്കും ഹെൽമറ്റും ഇല്ലാതെ ചീഫ് ജസ്റ്റീസ്; വിമര്‍ശനവുമായി സോഷ്യല്‍ മീഡിയ

ആഡംബര ബൈക്ക് ആയ ഹാർലി ഡേവിഡ്‌സൺ സിവിഒ 2020 സൂപ്പർ ബൈക്കിൽ സുപ്രീംകോടതിയുടെ തലവനായ ചീഫ് ജസ്റ്റിസ് എസ് എ ബോബ്ഡെ ഇരിക്കുന്ന ചിത്രങ്ങളാണ് സോഷ്യല്‍ മീഡിയയില്‍ വൈറലായിരിക്കുന്നത്. ചീഫ് ജസ്റ്റിസിന്‍റെ ജന്മനാടായ നാഗ്പൂരിൽ നിന്നാണ് ചിത്രങ്ങള്‍ എത്തിയിരിക്കുന്നത്.

ആഡംബര ബൈക്കുകളോട് സിനിമക്കാരും രാഷ്ട്രീയക്കാരും ഇഷ്ടങ്ങള്‍ പറയുന്നതും അത് സ്വന്തമാക്കുന്നതും നമ്മള്‍ കണ്ടിട്ടുണ്ട്. എന്നാല്‍ സുപ്രീംകോടതി ചീഫ് ജസ്റ്റിസിന് ഇത്തരത്തിലൊരു പ്രണയം ഉള്ളത് ചിലപ്പോള്‍ ആദ്യമായിരിക്കും. അത് കൊണ്ട് തന്നെയാണ് ബൈക്കിലിരിക്കുന്ന ചീഫ് ജസ്റ്റിസിന്‍റെ ചിത്രങ്ങള്‍ പെട്ടന്ന് വൈറലായതും.





ചിത്രങ്ങള്‍ പുറത്തുവന്നപ്പോള്‍ വലിയ ചര്‍ച്ചകളാണ് സോഷ്യല്‍ മീഡിയയില്‍ നടക്കുന്നത്. ചീഫ് ജസ്റ്റിസ് ഇരിക്കുന്ന ആഡംബര ബൈക്ക് ബിജെപി നേതാവിന്‍റെ മകന്‍റെ ആണ്. ഇത് തന്നെയാണ് ചര്‍ച്ചക്ക് പ്രധാന കാരണവും. നാഗ്പൂരിൽ നിന്നുള്ള ബിജെപി നേതാവ് സോൻബ സുസലേയുടെ മകൻ രോഹിത് സോൻബാജിയുടെ മകന്‍റെ ബൈക്കാണിത്. എന്നാല്‍ മാസ്കും ഹെൽമറ്റും ധരിക്കാത്തതിന് വിമർശനവുമായി ചിലർ രംഗത്തെത്തി. സൂപ്പർ കൂൾ ചീഫ് ജസ്റ്റിസ് , സ്പീഡ് ബൈക്ക് ആണല്ലോ അപ്പോള്‍ നീതിയും അങ്ങനെ ആകാം, സംഭവം കളറായിട്ടുണ്ട്, ഈ കൊവിഡ് കാലത്ത് മാസ്ക് നിര്‍ബന്ധമാണെന്ന് അറിയില്ലായിരിക്കും എന്നിങ്ങനെ ചില അഭിപ്രായങ്ങള്‍ സോഷ്യല്‍ മീഡിയയില്‍ ഉയരുന്നുണ്ട്.




കൊവിഡ് നിയമങ്ങളുടെ ലംഘനമായ സാമൂഹിക അകലം പാലിച്ചിട്ടില്ല. ഇത് ചീഫ് ജസ്റ്റിസിന് ബാധകമാകില്ലെന്ന ചോദ്യവും സോഷ്യല്‍ മീഡിയയില്‍ ഉയരുന്നുണ്ട്. കൂടാതെ ബോബ്ഡെ തിരുപ്പതി ദര്‍ശനത്തിന് പോയപ്പോള്‍ വൈറലായ ചിത്രങ്ങള്‍, ഭക്ഷണം ലഭിക്കുന്നുണ്ടെങ്കിൽ അവർക്കെന്തിനാണ് പണം എന്ന് കുടിയേറ്റ തൊഴിലാളികളുടെ വിഷയത്തിൽ സ്വീകരിച്ച നിലപാട് എന്നിവ ഉയര്‍ത്തി കാണിച്ച് പല കുറിപ്പുകളും സോഷ്യല്‍ മീഡിയയില്‍ പ്രത്യക്ഷപ്പെട്ടു തുടങ്ങി.



നവംബറിൽ ആണ് സുപ്രീംകോടതി ചീഫ് ജസ്റ്റിസ് ആയി ബോബ്ഡെ ചുമതയേല്‍ക്കുന്നത്.പിന്നീട് പല അഭിമുഖങ്ങളിലും അദ്ദേഹം ബൈക്കുകളോട് ഉള്ള തന്‍റെ പ്രണയം തുറന്ന് പറഞ്ഞിരുന്നു. എന്നാല്‍ ചീഫ് ജസ്റ്റിസിനെതിരെ വിമര്‍ശനങ്ങള്‍ ഉന്നയിക്കുന്നവര്‍ മാത്രമല്ല എത്തുന്നത് അനുകൂലിക്കുന്നവരും ഉണ്ട്. വ്യത്യസ്‌ത തൊഴിലുകളിൽ പ്രവർത്തിക്കുമ്പോൾ, നമുക്കെല്ലാവർക്കും വ്യത്യസ്‌ത ഇഷ്ടങ്ങള്‍ ആയിരിക്കും അത് പോലെ തന്നെയാണ് ചീഫ് ജസ്റ്റിസിന്‍റെ കാര്യവും എന്ന അഭിപ്രായങ്ങളും ഉയരുന്നുണ്ട്. സോഫ്റ്റ് വെയര്‍ എഞ്ചിനീര്‍ ആയ ഒരാള്‍ക്ക് ഗിറ്റാർ വായിക്കാന്‍ താല്‍പര്യമുണ്ടെങ്കില്‍ അത് പാടില്ലെന്ന് പറയാനും അതിനെ വിമര്‍ശിക്കാനും നില്‍ക്കുന്നത് നല്ല സംസ്കാരം അല്ലെന്ന അഭിപ്രായങ്ങളും എത്തുന്നുണ്ട്. ഒരോ ആളുകളുടെ ഇഷ്ടങ്ങളും താല്‍പര്യങ്ങളും വേറെയാണ്.സുപ്രീംകോടതി ജ‍ഡ്ജ് ആയതിനാല്‍ അത് മാറ്റിവെക്കണം എന്ന് പറയുന്നതിനോട് യോജിക്കുന്നില്ലെന്ന അഭിപ്രായങ്ങളും എത്തുന്നുണ്ട്.