ഭാര്യയുടെ ഗർഭത്തിന് 'ഉത്തരവാദി' പൂച്ചയെന്ന് ഭർത്താവ്?! സംഗതി ശരിയെന്ന് സമ്മതിച്ച് ഭാര്യയും!

ഭാര്യ ഗർഭിണിയായതിന് തനിക്ക് ഉത്തരവാദിത്വമില്ലെന്ന് ഭർത്താവ്. ഒരു പൂച്ച പറ്റിച്ച പണിയാണ് എല്ലാത്തിനും കാരണമെന്നാണ് ഭർത്താവിൻെറ വാദം. സാമൂഹ്യ മാധ്യമമായ റെഡ്ഡിറ്റിൽ എഴുതിയ ഭർത്താവിൻെറ കുറിപ്പ് വൈറലാവുകയാണ്. പ്ലേടോണിക് വൺ എന്ന പേരിലാണ് കാര്യങ്ങൾ വിശദീകരിച്ചിരിക്കുന്നത്. വീട്ടിൽ വളർത്തുന്ന പൂച്ചയെയയാണ് ഗർഭത്തിന് ഉത്തരവാദിയായി ഇവർ കണ്ടെത്തിയിരിക്കുന്നത്. ഭാര്യയും ഭർത്താവ് പറയുന്നത് സമ്മതിച്ചിരിക്കുന്നുവെന്നതാണ് മറ്റൊരു കൗതുകകരമായ കാര്യം.

രണ്ടാമത്തെ കുട്ടി ഇപ്പോൾ വേണ്ടെന്ന് കരുതിയതാണ്

കഴിഞ്ഞ വ‍ർഷമാണ് ദമ്പതികൾക്ക് ആദ്യത്തെ കുട്ടി ഉണ്ടായത്. ആൺകുട്ടിയാണ് ആദ്യത്തെ കുട്ടി. പ്രസവ സമയത്ത് ഏറെ ബുദ്ധമുട്ടുകൾ അനുഭവിച്ചിരുന്നു. നേരത്തെ പ്രസവം ആയതിനാൽ അതുമായി ബന്ധപ്പെട്ടുള്ള ബുദ്ധിമുട്ടും ഉണ്ടായി. രണ്ടാമത്തെ കുട്ടി പെട്ടെന്ന് വേണ്ടെന്ന് ഇവർ തീരുമാനിച്ചിരുന്നു. കൊവിഡ് പ്രതിസന്ധി കാലം കൂടിയായതിനാൽ രണ്ടാമത്തെ കുട്ടി വൈകി മതിയെന്ന് ഉറപ്പിക്കുകയും ചെയ്തു.

കൊവിഡ് കാലത്ത് പൂച്ച പറ്റിച്ച പണി

കൊവിഡ് പ്രതിസന്ധി കാലത്ത് ശ്രദ്ധയോടെയാണ് ദമ്പതികൾ ലൈംഗികബന്ധത്തിൽ ഏ‍ർപ്പെട്ടിരുന്നത്. ഗർഭ നിരോധന ഉറകൾ ഉപയോഗിച്ച് ലൈംഗിക ബന്ധത്തിൽ ഏർപ്പെട്ടിട്ടും ഭാര്യ ഗർഭിണിയായി. ഇതോടെയാണ് ഭാര്യയും ഭർത്താവും ഇതിന് പിന്നിൽ പൂച്ചയുടെ കൈകളാണെന്ന് മനസ്സിലാക്കുന്നത്. ദമ്പതികൾ ഏറെ സ്നേഹത്തോടെ ഓമനിച്ച് വളർത്തുന്ന ടോം എന്ന പൂച്ചയാണ് വില്ലനായത്. വീട്ടിൽ സൂക്ഷിച്ചിരുന്ന ഗർഭ നിരോധന ഉറകളിൽ ഓട്ടയിട്ട് കൊണ്ടാണ് ടോം പണി പറ്റിച്ചത്!

മേശവലിപ്പിൽ കണ്ടത് ഇതാണ്...

ഗർഭ നിരോധന ഉറകൾ വെക്കറുള്ള മേശവലിപ്പ് പരിശോധിച്ചപ്പോഴാണ് സംഗതി ശരിക്കും മനസിലായതെന്ന് ഭർത്താവ് കുറിപ്പിൽ പറയുന്നു. പലതിലും പൂച്ചയുടെ നഖം പോറിയതിൻെറ അടയാളമുണ്ട്. ചിലതൊക്കെ പൂർണമായും നശിപ്പിക്കപ്പെട്ടിട്ടുണ്ട്. ഏതായാലും വളർത്തുപൂച്ച വലിയ പണി തന്നെയാണ് ഈ ഭർത്താവിനും ഭാര്യക്കും നൽകിയത്.